«U metach ekanomii samaloty absłuhoŭvali sami». Što viadoma pra avijakampaniju «Hrodna», čyj samalot raźbiŭsia ŭ Rasii?

Avijakampanija «Hrodna» była zarehistravanaja 6 sakavika 2003 hoda. Heta adkrytaje akcyjaniernaje tavarystva, 100% akcyj jakoha naležyć dziaržavie. Jana maje 16 hruzavych samalotaŭ: An-32, An-30, An-12 i adzinaccać An-2. Samaloty pracujuć pa ŭsim śviecie. Akramia hruzavych pieravozak kampanija robić aerafotazdymki, ahladnyja paloty i tranśfiernyja rejsy ŭ minski aeraport. 

«U 2017 hodzie avijakampanijaj «Hrodna» byŭ zabiaśpiečany biezavaryjny 1111-hadzinny nalot, biez avijacyjnych zdareńniaŭ. Pavietranymi sudami pieravieziena 1941 tona hruzaŭ, hruzaabarot skłaŭ kala 2150 tysiač tona-kiłamietraŭ, — raskazvaŭ dyrektar AAT «Avijakampanija Hrodna» Aleh Kačałaŭ. — Našy samaloty vykonvali paloty ŭ krainy Jeŭrapiejskaha Sajuza, Hruziju, Kazachstan, Afhanistan, Iran, Indyju. Na praciahu miesiaca An-12 avijakampanii dastaŭlaŭ humanitarnyja hruzy z Džybuci ŭ Jemien u ramkach Suśvietnaj charčovaj prahramy AAN».

Načalnik učastka pa techničnym absłuhoŭvańni pavietranych sudoŭ Dźmitryj Harmanienka, jaki pracavaŭ u avijakampanii z 2004 hoda, kazaŭ: «Dla nas asnoŭnaje — zabiaśpiečyć biaśpieku ludziej, techniki, hruzaŭ. Avijacyja pamyłak nie daruje, tamu kantrol u nas najstražejšy. U 2009 hodzie avijakampanija vyrašyła pašyryć śfieru dziejnaści: ažyćciaŭlać hruzavyja pieravozki, dla čaho ŭziała ŭ arendu An-32, u 2015-m try An-12, jakija mohuć dastaŭlać pa pryznačeńni da 20 ton hruzu.

Pryčym techničnaje absłuhoŭvańnie hetych samalotaŭ pradpryjemstva pravodzić samastojna. Navučylisia my ŭ metach ekanomii na svajoj vytvorčaj bazie adnaŭlać i ramantavać An-2. Usio, što možna zrabić va ŭmovach pradpryjemstva, staralisia vykonvać sami. 

Padrychtavali my i šerah svaich śpiecyjalistaŭ pa techničnym absłuhoŭvańni An-12, choć raniej karystalisia dapamohaj zaprošanych. Voś ciapier staić na absłuhoŭvańni adzin samalot, i da padaŭžeńnia resursu jaho rychtujuć našy techniki i inžyniery.

Padydzie nieŭzabavie jašče adzin naš An-12, jaki pracuje ŭ rajonie Afhanistana, budziem jaho absłuhoŭvać. My pastajanna pracujem nad tym, kab u nas było jak maha bolš svaich śpiecyjalistaŭ.

Kala miesiaca-dvuch praciahvajecca absłuhoŭvańnie kryłataj mašyny, a zatym pracu pravodziać supracoŭniki kanstruktarskaha biuro Antonava, jakija pryjazdžajuć u Hrodna z Kijeva. Pry praviadzieńni ŭsich rabot abaviazkovy dvuchuzroŭnievy kantrol. Jakaść rabot harantavanaja, pradpryjemstva siertyfikavana pa standarcie ISO».

Darečy, dyrektar pradpryjemstva Aleh Kačałaŭ sam lataje na An-30 šturmanam. «Aerafotazdymačnyja raboty iduć u Biełarusi i za jaje miežami. Kali ŭ niejkija pieryjady jany nie pravodziacca, samalot vykarystoŭvajecca ŭ jakaści hruzavoha, prastojvać padrychtavanym kryłatym mašynam tut nie dazvalajuć», — paviedamlałasia ŭ artykule.

Taksama avijakampanija absłuhoŭvaje łajniery inšych arhanizacyj, zabiaśpiečvajučy pry hetym pracaj svoj inžynierny skład.

U ciapierašni čas na pradpryjemstvie surjozna zadumvajucca ab nabyćci avijatechniki zachodniaha ŭzoru. Bo, atrymlivajučy zakazy, avijatary sutykajucca i z takim mierkavańniem: «Savieckaja technika dobraja, ale voś mienavita ŭ hetych umovach nam patrebnyja inšyja samaloty». 

«Hruzavy samalotny park vykarystoŭvajem savieckaj pabudovy. Zamianić An-12 nie zmahli b: paśla raspadu Savieckaha Sajuza ničoha padobnaha nie vypuskałasia. Zaraz vyznačajem toj typ samalota, ź jakim lepš za ŭsio budzie pracavać, — kazaŭ dyrektar Kačałaŭ. — Zachodnija samaloty patrabujuć dosyć vysokaha ŭzroŭniu vałodańnia techničnaj anhlijskaj movaj, i my ŭžo pačali rychtavać takich śpiecyjalistaŭ.

Dy i ŭ cełym moładź aryjentujem na pastajannaje ŭdaskanaleńnie. Šmat vydatnych chłopcaŭ u apošnija hady pryjšło da nas ź Biełaruskaj akademii hramadzianskaj avijacyi. Siarod ich inžynier pa ekspłuatacyi samalotaŭ i ruchavikoŭ Dźmitryj Harmanienka».

Inžynier Dźmitryj Harmanienka — adzin z zahinułych u katastrofie pad Irkuckam, dzie raźbiŭsia AN-12 hrodzienskaj kampanii.

• 0
• 0
• 0
• 0
• 0
• 0
• 0
• 0