Sapieha adpraŭlajuć u kałoniju na 6 hadoŭ, niahledziačy na supracu jaje i Pratasieviča sa śledstvam

Taksama Sapieha abaviazali vypłacić paciarpiełym kampiensacyju maralnaj škody na sumu 167 500 rubloŭ i sudovuju pošlinu — 7 488 rubloŭ.

23 maja 2021 hoda Raman Pratasievič i Safija Sapieha lacieli rejsam avijakampanii Ryanair pa maršrucie «Afiny — Vilnia». Da Vilni Sapieha i Pratasievič nie dalacieli — samalot pryziamliŭsia ŭ Minsku z-za paviedamleńnia pra bombu na borcie. Maładych ludziej źniali z rejsa i zatrymali.

14 červienia na bryfinhu biełaruskich uładaŭ ab pasadcy samalota, u jakim udzielničaŭ i sam Raman Pratasievič, upieršyniu byli aficyjna nazvanyja artykuły, pa jakich padazrajuć Sapieha. Kiraŭnik SK Dźmitryj Hara raspavioŭ, što pieršapačatkova dziaŭčynu zatrymali ŭ aeraporcie pa padazreńni ŭ hrubym parušeńni paradku, ale «praktyčna adrazu jana była pryciahnutaja ŭ jakaści abvinavačanaj pa inšaj kryminalnaj spravie» — za raspalvańnie sacyjalnaj varožaści.

Praź niekalki dzion paśla bryfinhu Sapieha i Pratasieviča pieraviali pad damašni aryšt. Niezadoŭha da zaviaršeńnia rasśledavańnia pa spravie Sapieha jaje ajčym raspavioŭ, što dziaŭčyna napisała prašeńnie ab pamiłavańni na imia Alaksandra Łukašenki i što Sapieha ŭžo bolš za dva miesiacy nie žyvie z Pratasievičam i znachodzicca pad chatnim aryštam u kvatery ŭ Lidzie.

U śniežni Sapieha vystavili abvinavačvańnie pa siami artykułach KK:

— č. 3 art. 130 (raspalvańnie varožaści ŭ składzie hrupy asob),

— č. 4 art. 16 i 364 (arhanizacyja hvałtu i pahroz u dačynieńni da milicyjanieraŭ),

— č. 4 art. 16 i 365 (arhanizacyja pahroz, paklopu ci raspaŭsiudžvańnie źviestak pra milicyjanieraŭ),

— č. 4 art. 16 i 366 (arhanizacyja hvałtu i pahroz u dačynieńni da słužbovych asob),

— č. 4 art. 16 i 389 (arhanizacyja pahrozy zabojstvam ci hvałtu ŭ dačynieńni da sudździaŭ),

— č. 4 art. 16 i 198 (arhanizacyja pieraškod dziejnaści žurnalistaŭ z pahrozaj užyvańnia hvałtu),

— č. 1 i 2 art. 203-1 (naŭmysny zbor infarmacyi i piersanalnych źviestak inšaj asoby).

Sofju Sapieha pryznali vinavataj pa č.3 art. 130 i č. 1 art. 179 (niezakonnyja zbor abo raspaŭsiudžvańnie źviestak ab pryvatnym žyćci, jakija składajuć asabistuju abo siamiejnuju tajamnicu inšaj asoby, bieź jaje zhody, jakija pryviali da pryčynieńnia škody pravam, svabodam i zakonnym intaresam paciarpiełych).

Safija Sapieha budzie adbyvać pakarańnie ŭ kałonii ahulnaha režymu. Jaje ŭziali pad vartu ŭ zali suda.

• 6
• 0
• 0
• 5
• 0
• 1
• 18
• 0