U Litvie ŭtraja ŭźniali ceny na strachoŭki dla aŭtamabilaŭ na biełaruskich i rasijskich numarach
Raniej strachoŭka na miesiac kaštavała kala 20 jeŭra, ciapier — 60 jeŭra i bolš. Źmieny tyčacca tolki aŭto na biełaruskich i rasijskich numarach. Što kažuć u strachavych kampanijach?
Čytačka «Našaj Nivy» raskazała, jak źmianilisia rascenki:
«U nas mašyna na rasijskich numarach — siabar dazvoliŭ joj karystacca, pakul sam žyvie ŭ Rasii. Dva hady my ŭžo na joj jeździm. Raniej strachoŭka kaštavała 24 jeŭra na miesiac. Kali my čarhovy raz chacieli jaje praciahnuć, naš ahient skazała, što košt uźniaŭsia. Ciapier treba zapłacić 60 jeŭra. Dla nas heta akazałasia doraha. Za hod atrymlivajecca 720 jeŭra. Kali brać strachoŭku na mašynu na litoŭskich numarach, to płacić treba 185 jeŭra za hod.
Jak mnie patłumačyła strachavy ahient, padaražańnie tyčycca tolki mašyn, zarehistravanych u Biełarusi i Rasii. Heta źviazana z vajnoj, ale ŭ sakaviku i krasaviku byli jašče staryja ceny. My spytali ceny ŭ roznych kampanijach, ale niekatoryja navat admaŭlajucca strachavać aŭto na rasijskich i biełaruskich numarach. U vyniku my vyrašyli pierasieści na hramadski transpart».
U adnoj ź litoŭskich strachavych kampanij paćvierdzili, što ceny vyraśli ŭ try razy.
«Padniali prykładna miesiac tamu. Nie mahu skazać, z čym heta źviazana. Tak vyrašyła kampanija. U nas ciapier 15 dzion strachavańnia na biełaruskich ci rasijskich numarach kaštuje 42 jeŭra, a było 14. Na miesiac budzie 70-75 jeŭra», — adkazaŭ strachavy ahient.
U inšaj kampanii taksama raspaviali pra pavyšeńnie cen. Strachoŭka aŭtamabila na rasijskich i biełaruskich numarach ciapier u ich kaštuje 60 jeŭra za miesiac. Raniej zapłacić treba było 24.
Adzin sa strachavych ahientaŭ raskazaŭ čytačcy «Našaj Nivy», što hramadzianam Ukrainy paŭtara miesiaca tamu strachoŭki na aŭtamabili zrabili biaspłatnymi.
«Ahient skazała, što faktyčna ciapier my my, biełarusy i rasijanie, apłačvajem ich ukraincam».
Kamientary