Pieramovy, jak paviedamlaje pres-słužba biełaruskaha prezidenta, doŭžylisia bolš jak try hadziny. «Dźmitryj Anatoljevič ź vialikim razumieńniem adreahavaŭ...»
Takoj ščyraj i adkrytaj razmovy, jak siońnia, z prezidentam Rasii «ŭ nas nie było nikoli», zajaviŭ Alaksandr Łukašenka žurnalistam 27 žniŭnia paśla sustrečy ź Dźmitryjem Miadźviedzievym u Sočy. Pieramovy, jak paviedamlaje pres-słužba biełaruskaha prezidenta, doŭžylisia bolš jak try hadziny.
«Vielmi škada, što čas i tyja prablemy, jakija ŭ nas siońnia jość, — jany nas padšturchnuli da hetaha dyjałohu, — skazaŭ Łukašenka. — Ale siońnia prezident Rasii inicyjavaŭ hetuju adkrytuju razmovu, skažu, vielmi ščyruju, u maim duchu. Ja vielmi lublu ščyraść. Asabliva kali sustrakajucca siabry, tavaryšy, kalehi, a my vielmi družnyja z prezidentam Rasii. Duch — heta hałoŭnaje, što pracinaje ŭsie pytańni: finansaŭ, ekanomiki, dypłamatyi, źniešniaj palityki. My zmahli abmierkavać usie prablemnyja pytańni, jakija pierad nami byli».
Kiraŭnik biełaruskaj dziaržavy nazvaŭ pryčyny, pavodle jaho słoŭ, «praciahłaj paŭzy» ŭ sustrečach z prezidentam Rasii.
«Sapraŭdy, my nie razmaŭlali tak intensiŭna, jak na pačatku hoda. Ale heta nie aznačaje, što my nie razmaŭlali naohuł, — skazaŭ Łukašenka. — Było šmat i pazityŭnaha, i niehatyŭnaha, ale my nie pierapyniali kantaktaŭ ź Dźmitryjem Anatoljevičam. Napeŭna, dapuścili pamyłku, što nie infarmavali hramadskaść. My padtrymlivali pastajanny kantakt z prezidentam Rasijskaj Fiederacyi, heta było, ale infarmacyi pra heta było mała».
Kab bolš nie pisali, što my redka sustrakajemsia, my vyrašyli intensifikavać sustrečy, — adznačyŭ prezident Biełarusi. — U nas niama adarvańnia adzin ad adnaho. Niama alerhii adzin na adnaho. Heta absalutna ščyra».
Padčas pieramoŭ, paviedamiŭ Łukašenka, dasiahnuta damoŭlenaść ab tym, što prezident Rasii pryjedzie ŭ Biełaruś u vieraśni — na sumiesnyja biełaruska-rasijskija vučeńni, «samyja maštabnyja, niahledziačy na kryzis». «Heta biełaruska-rasijskaja hrupoŭka na zachodnim napramku, asnovu jakoj składaje biełaruskaja armija. Vučeńni buduć pryśviečany funkcyjanavańniu hetaj hrupoŭki: nakolki jana efiektyŭnaja, nakolki moža abaraniać našy zachodnija miežy», — skazaŭ Łukašenka.
«Druhim razam jon da nas pryjedzie ŭ kancy listapada — u nas projdzie pasiadžeńnie JeŭrAzES. I trecim razam my sustreniemsia sioleta ŭ pačatku śniežnia na pasiadžeńni Vyšejšaha dziaržsavieta Sajuznaj dziaržavy, jakoje projdzie ŭ Maskvie», — dadaŭ prezident Biełarusi.
«My zakranali, abmiarkoŭvajučy tyja ci inšyja prablemy, zachodni viektar, toje, jak u nas składvajecca dyjałoh z Zachadam. Ale my nie abmiarkoŭvali nijakaj kankretnaj temy našaj źniešniaj palityki, jakaja skiravana na Zachad», — paviedamiŭ Alaksandr Łukašenka 27 žniŭnia žurnalistam u Sočy paśla zaviaršeńnia pieramoŭ z prezidentam Rasii Dźmitryjem Miadźviedzievym.
«My raźvivali i budziem raźvivać naša supracoŭnictva ź Jeŭropaj, Amierykaj, tamu što ŭ cełym heta toj ža tavaraabarot, što i z Rasijaj, — cytuje kiraŭnika biełaruskaj dziaržavy jaho pres-słužba.
— Dźmitryj Anatoljevič ź vialikim razumieńniem adreahavaŭ, skazaŭ, što na toje i dziaržava i kiraŭnictva hetaj dziaržavy, kab intares padtrymlivać u toj častcy płaniety, pierš za ŭsio ŭ Jeŭropie. Tamu što Biełaruś — centr Jeŭropy, tak było skazana prezidentam Rasii».
«Mnie vielmi pryjemna, što hetaja ščyraja razmova zakončyłasia tym, što my znajšli poŭnaje parazumieńnie pa asnoŭnych pytańniach našaj sumiesnaj dziejnaści. Mnie spadabaŭsia padychod prezidenta Rasii nie tolki da abmierkavańnia prablem, ale i da imknieńnia raźviazać prablemy, što sabralisia», — skazaŭ Alaksandr Łukašenka.
Kamientary