Ofis Cichanoŭskaj — pra zabłakavanyja rachunki biełarusaŭ va Ukrainie i prapanovy handlu palitviaźniami
Ofis Śviatłany Cichanoŭskaj raskazaŭ, jak źbirajucca vyrašać prablemu zabłakavanych bankaŭskich rachunkaŭ biełarusaŭ va Ukrainie i jak hladziać na prapanovy asłabić sankcyi ŭ abmien na vyzvaleńnie častki palitviaźniaŭ.
Hetyja i inšyja pytańni hučali padčas niefarmalnaj sustrečy ŭ Vilni z byłymi palitviaźniami i svajakami tych, chto ciapier za kratami.
Siarod uźniatych prablem — błakiroŭka bankaŭskich rachunkaŭ va Ukranie. Da pačatku vajny z-za pahrozy represij tudy źjazdžali mnohija biełarusy.
Ofis kaža, što dasyłaŭ u Nacbank Ukrainy list na imia staršyni, adnak palityčnaje rašeńnie ab admienie abmiežavańniaŭ na siońnia nie vyhladaje mahčymym. Pytańniem zajmajecca taksama pradstaŭnictva ofisa ŭ Kijevie.
«Staić prablema vieryfikacyi. Paśla pačatku vajny jany nie mahli raździalić — heta aktyvist ci łukašenkaŭskaja ahientura. Im było efiektyŭniej zamarozić rachunki ŭsim. Zaraz vieryfikacyju moža pravodzić Słužba biaśpieki Ukrainy.
My ciapier prymajem zaŭjaki, kab padać ich u SBU dla pravierki. Takaja pravierka pakul mahčyma dla tych, chto znachodzicca va Ukrainie. Da kanca miesiaca schiema prajaśnicca», — paviedamiŭ daradca Cichanoŭskaj Franak Viačorka.
Abmiarkoŭvałasia taksama, jak dapamahać palitviaźniam i siemjam — unutry krainy i za miažoj.
«My prasoŭvajem ideju ab reabilitacyi palitviaźniaŭ, ab adpačynku dla dziaciej palitźniavolenych. Kab čałaviek, kali vyjšaŭ, razumieŭ, što ŭ jaho jość mahčymaść padlačycca, adpačyć miesiac», — padzialiłasia Śviatłana Cichanoŭskaja.
Ciapier, naprykład, nievialikaja hrupa biełaruskich dziaciej jedzie pa prahramie kulturnaha abmienu ŭ Narviehiju. Viaducca pieramovy ź Italijaj i Hiermanijaj.
Hučała prapanova ab tym, kab dla studentaŭ, jakija za kratami, zahadzia padbirać adukacyjnyja prahramy ŭ jeŭrapiejskich univiersitetach.
Što da pytańnia sankcyj, pazicyja Cichanoŭskaj zastajecca raniejšaj.
«Razmovu pra źniaćcie sankcyj možna vieści tolki paśla vyzvaleńnia ŭsich źniavolenych. Nie 10, nie 100 čałaviek, a ŭsich. Chacia ŭ niekatorych pradstaŭnikoŭ demakratyčnych sił jość inšaje bačańnie — što možna pasłablać sankcyi, navat kali niekalki čałaviek vyjdzie», — adznačyła jana.
«Usie pavinny być vyzvalenyja, reabilitavanyja, a kryminalnyja spravy — zakrytyja. Vycisnuć Cichanoŭskaha i Statkieviča z krainy — nie vyzvaleńnie. Pieravieści pad chatni aryšt — nie vyzvaleńnie», — udakładniŭ Franak Viačorka ŭmovy, pry jakich praces pieramoŭ moža być zapuščany.
Ciapier čytajuć
Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe20
Kamientary