Pašyryli pieralik mierapryjemstvaŭ u ahrasiadzibach, na jakich zabaroniena vykarystoŭvać hukaŭzmacnialniki

Ciapier zabarona raspaŭsiudžvajecca nie tolki na prezientacyi, jubilei, bankiety, spartyŭna-masavyja, fizkulturna-azdaraŭlenčyja i kulturnyja mierapryjemstvy, ale i na šerah inšych imprezaŭ.

U pryvatnaści, havorka idzie pra kalandarna-abradavyja śviaty, nakiravanyja na papularyzacyju niemateryjalnych kulturnych kaštoŭnaściaŭ i falkłoru, tematyčnyja sustrečy i viečary biełaruskaj kultury, hastranamičnyja mierapryjemstvy ź miascovymi asablivaściami, a taksama siamiejnyja ŭračystaści z zachavańniem narodnych zvyčajaŭ i tradycyj.

Pry praviadzieńni takich mierapryjemstvaŭ zabaroniena karystacca ŭklučanaj hukaŭznaŭlalnaj i hukaŭzmacnialnaj aparaturaj pry adčynienych voknach i dźviarach. Taksama ŭzmacnialniki nielha vystaŭlać u adčynienyja vokny, na padakońniki i dźviery, na bałkony, łodžyi, terasy dy inšyja adkrytyja placoŭki budynkaŭ i zbudavańniaŭ abo na terytoryi ahraekasiadzibaŭ. Akramia taho, zabaroniena raźmiaščać takuju aparaturu na vonkavych pavierchniach ścien budynkaŭ i zbudavańniaŭ.

Novyja abmiežavańni źjavilisia na fonie bolš šyrokich sprobaŭ ułady rehulavać praviadzieńnie šumnych i masavych mierapryjemstvaŭ na pryvatnych terytoryjach. U červieni hetaha hoda na hramadskaje abmierkavańnie vynieśli prajekt ukaza Alaksandra Łukašenki ab udaskanaleńni dziejnaści sadavodčych tavarystvaŭ. Prajekt praduhledžvaŭ zabaronu akazańnia pasłuh, źviazanych z arhanizacyjaj zabaŭ i adpačynku, a taksama praviadzieńniem kulturna-vidoviščnych i spartyŭna-masavych mierapryjemstvaŭ.

U Ministerstvie ekanomiki nieabchodnaść takich abmiežavańniaŭ tłumačyli šmatlikimi skarhami na masavyja imprezy, jakija ładziać na zdadzienych u arendu leciščach. Jak śćviardžaje viedamstva, susiedziam pieraškadžajuć uzmocnieny šum ad muzyki, hučnych razmoŭ i krykaŭ, a taksama dym ad manhałaŭ, vohniščaŭ i paleńnia łaźniaŭ. Heta, na dumku čynoŭnikaŭ, pryvodzić da niepažadanaha ŭzajemadziejańnia z susiednimi ziemlekarystalnikami i vyklikaje ich niezadavolenaść.

U Ministerstvie ekanomiki taksama adznačali, što kali sadovy domik rehularna zdajecca na karotki termin, heta faktyčna stanovicca pradprymalnickaj dziejnaściu, jakaja prynosić dachod adnym hramadzianam, ale adnačasova moža parušać pravy i zakonnyja intaresy susiedziaŭ, jakija raźličvajuć na spakojny adpačynak na svaich učastkach u sadavodčym tavarystvie.

• 2
• 0
• 0
• 1
• 0
• 0
• 1
• 0