Na haradziščy «Mienka» projduć maštabnyja raskopki. Pra heta siońnia zajaviŭ žurnalistam premjer-ministr Raman Hałoŭčanka paśla naviedvańnia archieałahičnych raskopak na miescy staražytnaha Minskaha zamčyšča na Miency, piša BiełTA.
«My siońnia siudy pryjechali dla taho, kab abmierkavać pytańnie, jakim čynam možna ŭdychnuć žyćcio ŭ hety ŭnikalny abjekt. Jak adznačyli historyki, jon značny pa maštabnaści nie tolki dla Biełarusi, ale i ŭsioj Uschodniaj Jeŭropy.
Naš niedahlad, što jaho raźvićciu dziaržava nie nadavała naležnaha značeńnia.
My ŭpieršyniu hetaje pytańnie padniali, kali sustrakalisia ŭ Instytucie historyi. Siońnia ž namiecili pieršačarhovyja dziejańni, jakija nieabchodna zrabić, kab nadać patrebnuju dynamiku raźvićciu pomnika», — skazaŭ siońnia Raman Hałoŭčanka.
Pa jaho słovach, kali budzie dadziena navukovaje abhruntavańnie, katehoryja pomnika budzie pavyšana jak minimum da druhoj, heta značyć pomnika respublikanskaha značeńnia. «Heta daść peŭnyja paŭnamoctvy, kab jaho adpaviednym čynam raźvivać, — źviarnuŭ uvahu premjer-ministr. — U historykaŭ isnuje kansensus, što heta haradskoje pasielišča bolš staražytnaje, čym toje, jakoje ŭźnikła na Niamizie. Taksama jość hipotezy, što jany isnavali paralelna.
Na samaj spravie heta nie tak istotna, bo biez uliku taho, ci było heta haradzišča papiarednikam sučasnaha Minska albo niama, heta, biezumoŭna, značny pomnik. Heta jašče adno śviedčańnie taho, što biełaruskaja dziaržaŭnaść nie prydumanaja, nie kimści pryŭniesienaja, a spradviečna naša».
Jak adznačyŭ Raman Hałoŭčanka, pryniata rašeńnie, što ŭ nastupnym hodzie budzie ŭzmocniena navukovaje vyvučeńnie pomnika z punktu hledžańnia archieałahičnych raskopak.
«Jość prapanova, kab studenty ŭsich histaryčnych fakultetaŭ (u krainie ich 16) nastupnym letam byli pryciahnutyja siudy dla ažyćciaŭleńnia maštabnych raskopak, jakija namiecili śpiecyjalisty-archieołahi. Tut, mahčyma, buduć cikavyja znachodki, jakija ŭ tym liku praljuć śviatło na historyju hetaha miesca, — padkreśliŭ premjer-ministr. — Taksama paralelna budziem zajmacca pytańniami stvareńnia tut historyka-archieałahičnaha kompleksu. Kancepcyja jaho raźvićcia pavinna być stvorana na asnovie navukovych rekamiendacyj. Siońnia my pra heta pryncypova damovilisia, i chutka, ja spadziajusia, prymiem aficyjnaje rašeńnie», — skazaŭ premjer Biełarusi.
Kamientary