Biełarusam prapanujuć rabić układy ŭ juaniach. Ci heta vyhadna?
Biełarusam prapanujuć rabić układy ŭ juaniach terminam ad 35 da 364 dzion pad 1,5—3% hadavych. «Naša Niva» pacikaviłasia ŭ ekanamista, nakolki vyhadnym moža być taki chod, a taksama daviedałasia, układy ŭ jakoj valucie akazalisia najbolš vyjhryšnymi sioleta.
Kitajskaja valuta stroha rehulajujecca ŭładami
Kultura juania ŭ Biełarusi tolki pačynaje zaradžacca. Kitajskaja valuta prychodzić u masy šmat u čym dziakujučy tamu, što paśla pačatku vajny i ŭviadzieńnia sankcyj Rasija i Biełaruś zamiest zvykłych dalaraŭ i jeŭra stali pryhladacca ŭ bok valut siabroŭskich krain, pierš za ŭsio Kitaja.
«Vybar u bok Kitaja byŭ zrobleny z pryčyny taho, što jon biełaruskimi ŭładami razhladajecca jak važny handlovy partnior, ź vialikim rynkam. Choć sam prychod da juania adbyvajecca pierš za ŭsio nie z ekanamičnych mierkavańniaŭ, a z-za sankcyj.
Kitajskaja valuta stroha rehulujecca z boku ŭładaŭ, juań nie źjaŭlajecca svabodna kanviertavanaj valutaj, jaho dola ŭ ZVR inšych krain taksama składaje nievialikuju častku adnosna dalara i jeŭra. Tamu ŭ hetaha rašeńnia jość jak jak svaje plusy, tak i minusy», — tłumačyć ekśpiert BEROC Nastaśsia Łuzhina.
Banki taksama adreahavali na takuju pieraaryjentacyju na valutnym rynku i stali prapanoŭvać ŭkłady ŭ juaniach fizičnym asobam. Śpiarša takija prapanovy pačali nabirać papularnaść u Rasii. Ciapier ža juanievyja ŭkłady dabralisia i da Biełarusi (takija jość u banku VTB). A niekalki dzion tamu ŭ nas byŭ vydadzieny pieršy kredyt u juaniach.
«Łahičniej razhladać układy ŭ dalarach abo biełaruskich rublach»
Ekanamist ličyć, što ŭkłady ŭ kitajskaj valucie majuć prava na isnavańnie, ale nazyvać ich nadta vyhadnymi jana nie biarecca.
«Pa-pieršaje, 1,5-3% hadavych — heta vielmi nizkaja staŭka, pry jakoj dachodnaść pa takim ŭkładzie moža sychodzić u admoŭny dyjapazon. Kali, naprykład, da dalara biełaruski rubiel umacavaŭsia bolš, čym na 3 % u paraŭnańni z pačatkam hoda, to ŭ dačynieńni da juania ŭmacavańnie skłała blizu 10%. Zychodziačy z hetaha, łahičniej razhladać układy ŭ dalarach ZŠA abo biełaruskich rublach.
Pracentnyja staŭki pa dalarach (da 5% hadavych) pierakryvajuć devalvacyju dalara da biełaruskaha rubla, a staŭki ŭ rublach čaściakom pierakryvajuć jašče i ŭzrovień inflacyi. Tamu, uličvajučy nizkuju pracentnuju staŭku, układy ŭ juaniach mohuć być vyhadnyja chutčej tym, kamu nieabchodna mieć hrošy mienavita ŭ hetaj valucie», — adznačaje Łuzhina.
Kali ž nieabchodnaści zachoŭvać srodki ŭ kitajskaj valucie niama, to ŭkłady ŭ dalarach ci biełaruskich rublach buduć bolš vyhadnymi.
Siarod inšych minusaŭ układaŭ u juaniach ekśpiert nazyvaje mahčymaje paharšeńnie spraŭ u ekanomicy Kitaja, jakoje moža być vyklikana paharšeńniem adnosin pamiž Kitajem i jaho asnoŭnym handlovym partnioram — ZŠA — z-za situacyi vakoł Tajvania.
Taksama ekanamist adznačaje surjoznuju zaležnaść Kitaja ad zamiežnych enierhanośbitaŭ i zapavoleńnie rostu raźvićcia ekanomiki na fonie kavidnych abmiežavańniaŭ, jakija dahetul dziejničajuć u Kitai.
«Niezrazumieła, jak u takich umovach dalej budzie pracavać kitajskaja ekanomika i jak ułady buduć rehulavać kurs. Dalar i jeŭra ŭ hetym vypadku źjaŭlajucca bolš prahnazavalnymi, pakolki ich kurs rehulujecca rynkam, a nie administracyjnym šlacham, jak heta adbyvajecca ŭ Kitai. Usio heta nakładvaje dadatkovyja ryzyki, źviazanyja ź juaniem», — adznačaje ekśpiert.
Jakija ŭkłady akazalisia samymi vyhadnymi?
Što datyčyć najmienš vyhadnych układaŭ, to pa vynikach hoda imi akazalisia ŭkłady ŭ jeŭra, bo ŭmacavańnie biełaruskaha rubla ŭ adnosinach da jeŭrapiejskaj valuty na ciapierašni momant składaje kala 20%.
«Atrymlivajecca, što kali chtości hod tamu adkryŭ układ u jeŭra, to praz hod, pry pieravodzie hrošaj ź jeŭra ŭ biełaruskija rubli, jon atrymaje prykmietna mienš hrošaj, čym heta było hod tamu. Tak atrymałasia za košt taho, što za hety pieryjad mocna źmianilisia suadnosiny ŭ pary dalar-jeŭra», — tłumačyć ekanamist.
U suviazi z hetym ŭkłady ŭ dalarach pa vynikach hoda akazalisia značna bolš vyhadnymi za układy ŭ jeŭra.
Vyhadnymi akazalisia taksama ŭkłady ŭ biełaruskich rublach, dzie pracentnyja staŭki tradycyjna vyšejšyja, čym u valucie. Akramia taho, bolš, čym na 3% dalar devalvavaŭsia da rubla. Ahułam atrymlivajecca, što čałaviek, jaki hod tamu adkryŭ ŭkład u nacyjanalnaj valucie i siońnia moža źniać hrošy, pry abmienie ich na dalary ci jeŭra atrymaje bolš, čym jon mieŭ u valutnym vyražeńni hod tamu.
Tym nie mienš patencyjnym układčykam ekanamist rekamienduje dyviersifikavać hrošy i adkryvać układy ŭ roznych valutach, naprykład biełaruskich rublach i dalarach.
«Naša Niva» — bastyjon biełaruščyny
PADTRYMAĆČytajcie taksama:
Biełaruski bank upieršyniu vydaŭ kredyt u juaniach
Litva budzie dabivacca ŭraŭnavańnia sankcyj dla Rasii i Biełarusi, a mytnia zrobić pravierku hruzaŭ stražejšaj
Pavieličeńnie stavak i skaračeńnie lhot. Jakija padatkovyja źmieny čakajuć nas u 2023 hodzie
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary