Džulijan Asanž paprosić adpuścić jaho z turmy na pachavańnie Viŭjen Viestvud
Zasnavalnik partała «Vikiliks» Džulijan Asanž paprosić adpuścić jaho z brytanskaj turmy strohaha režymu Biełmarš na pachavańnie viadomaj dyzajnierki Viŭjen Viestvud, paviedamlaje Bi-bi-si.
Viestvud, jakaja pamierła ŭ Łondanie 29 śniežnia, była šmathadovaj prychilnicaj i pryjacielkaj Asanža. U 2020 hodzie dyzajnier i aktyvistka źmiaściła siabie ŭ vializnuju ptušynuju kletku, padviešanuju na vyšyni kala troch mietraŭ la centralnaha kryminalnaha suda ŭ znak pratestu suprać turemnaha źniavoleńnia zasnavalnika «Vikiliks».
Pra toje, što Asanž źbirajecca prasić dazvolić jamu pajści na pachavańnie, u intervju aŭstralijskim ŚMI skazała jaho žonka Steła. «Jana była vialikim siabram i važnym prychilnikam — dla nas heta vielizarnaja strata», — skazała jana.
Pradstaŭnik Brytanskaj pienitencyjarnaj słužby Ałan Sełbi ŭ hutarcy ź Bi-bi-si skazaŭ, što prośba Asanža naŭrad ci budzie zadavolenaja — jak praviła, źniavolenych adpuskajuć tolki na pachavańnie blizkich svajakoŭ.
Pramoj zabarony na toje, kab dazvalać źniavolenym naviedvać pachavańnie siabroŭ, zrešty, taksama niama, tamu, vierahodna, rašeńnie budzie prymać niepasredna administracyja turmy, dadaŭ Sełbi.
U adpaviednaj instrukcyi havorycca, što pry razhladzie prašeńniaŭ ab takich adpačynkach varta «suadnosić mierkavańni biaśpieki ź mierkavańniami prystojnaści». Admaŭlać u ich dapuskajecca tolki na padstavie pahroz dla biaśpieki.
Viŭjen Viestvud pamierła ŭ minuły čaćvier na 82-m hodzie žyćcia ŭ asiarodździ svajoj siamji. Žonka Asanža paśla jaje śmierci apublikavała karotkuju zajavu muža: «Viŭjen była damaj i staŭpom antyisteblišmientu. Śmiełaja, tvorčaja, udumlivaja i dobry siabar. Najlepšaja pradstaŭnica Brytanii. Mnie i mnohim inšym budzie jaje žudasna brakavać».
Viestvud vystupała za vyzvaleńnie Asanža, jaki ciapier čakaje ekstradycyi ŭ ZŠA rašeńniem brytanskaha suda. U ZŠA Asanžu pahražaje pažyćciovaje źniavoleńnie za razhałošvańnie dziaržtajamnicy.
U lipieni jon padaŭ apielacyju na rašeńnie ab ekstradycyi ŭ brytanski Viarchoŭny sud.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki24
Kamientary