Abanient MTS za 4 chviliny «trapiŭ» na 2777 rubloŭ. A druhi — za vosiem chvilin na 1375 rubloŭ
Na praciahu niekalkich dzion u redakcyju Onliner.by źviarnułasia dvoje abanientaŭ MTS, ździŭlenych koštam roŭminhu. Adzin čytač «straciŭ dar movy», kali viarnuŭsia ź Jehipta i vyjaviŭ, što vinien apierataru 2777 rubloŭ. Druhi ź siamjoj adpačyvaŭ u AAE i «trapiŭ» na 1375 rubloŭ. Abanienty nie admaŭlajuć, što sami niedahledzieli. I ŭsio ž chutkaść, ź jakoj možna stracić niemałyja hrošy na pustym miescy, ździŭlaje.
4 chviliny, 41 MB, 2777 rubloŭ
«Prylacieli ź Jehipta. Pa prylocie ŭbačyli, što ŭ muža na MTS nie akazałasia hrošaj. Adkryli dadatak i prosta ŭ aeraporcie stracili dar movy — minus 2777 rubloŭ. Telefon byŭ u roŭminhu, i, pakul my prachodzili kantrol u Šarm-el-Šejchu, za 4 chviliny śpisali 2777 rubloŭ za 41 MB», — raspaviała žonka Dźmitryja.
Pavodle jaje, usio adbyłosia, kali telefon byŭ u zaplečniku. U 00:15 pryjšło pieršaje paviedamleńnie ab roŭminhu, a ŭ 00:19 novaje SMS užo paviedamiła ab zapazyčanaści i błakavańni.
«Čamu nie 27 777 rubloŭ? Čamu tak mała? Pryjechaŭ i pajšoŭ pradavać kvateru. A kali babula z synam pajedzie adpačyvać i voś tak zdarycca? Joj što, da syna iści i hrošy prasić abo ź piensii ŭ rasterminoŭku vyłačvać doŭh? Heta ž nie naŭmysnaja situacyja, a realny absurd — 69 rubloŭ za 1 MB! Dadatak jaki-niebudź abnaviŭsia — i voś vam 40 MB. Čamu błakavańnie nie pracuje paśla śpisańnia bolš drobnaj sumy, a tolki kali naźbirajecca takaja vielizarnaja?»
U MTS im paraili napisać rekłamacyju.
«Samyja darahija miehabajty ŭ maim žyćci»
Arciom razam ź siamjoj lotaŭ na adpačynak u AAE. Pa jaho słovach, da adpačynku padrychtavaŭsia dobra, ale da roŭminhu z naležnaj uvahaj nie pastaviŭsia.
«Usio adbyłosia vielmi chutka, navat apamiatacca nie paśpieli. Jak tolki prylacieli ŭ Emiraty, vyklučyŭ režym palotu i pačaŭ źbiracca na vychad. Pryjšło pieršaje SMS ad MTS ab tym, što ja ŭ roŭminhu. Ja lotaju zredku ŭ RF i sutykaŭsia z roŭminham, zaŭsiody chapała času vyklučyć pieradaču danych biez nastupstvaŭ. U hetym vypadku mnie nie pašancavała…» — uspaminaje Arciom.
Chranałohija nastupnaja. U 7:31 pryjšło pieršaje SMS ab roŭminhu, u 7:35 — jašče adno, a ŭ 7:39 — treciaje, u jakim havaryłasia pra śpisańnie 1375 rubloŭ za 30 MB.
«Samyja darahija miehabajty ŭ maim žyćci, jakimi ja navat nie skarystaŭsia. Pa viartańni napisaŭ zajavu z prośbaj pierahledzieć sumu doŭhu. U adkaz — adpiska na dźvie staronki i prapanova rasterminoŭki na ŭsiu sumu. A ŭ vypadku praterminoŭki — sud».
Arciom adznačaje, što ŭśviedamlaje svaju vinu — niedahledzieŭ, zabyŭsia, atrymaŭ. Pavodle jaho słoŭ, zapazyčanaść jon u vyniku całkam apłaciŭ u adzin dzień. Ale, jak havorycca, asadak zastaŭsia. Analiz situacyi pryvioŭ abanienta da nastupnych dumak.
«1. Usim padarožnikam — być uvažlivymi. Uličvać usie momanty: i stajanku ŭ aeraporcie, i roŭminh, i h. d. Ja ŭjaŭlaju, kali b heta było nie 30 MB, a 300 MB…
2. MTS, 30 MB — heta śmiešnaja ličba dla 2023 hoda, heta abjom na paru fatahrafij. Ni dla MTS, ni dla apieratara ŭ AAE heta ničoha nie kaštuje. Zamiest taho, kab damovicca z AAE, MTS vydatkavaŭ čas, kab napisać mnie adpisku i pazbavić maju siamju 1375 rubloŭ.
3. Choć by ŭ pieršym SMS možna było b napisać, što 1 MB u roŭminhu kaštuje 40 rubloŭ. Mnohich heta padšturchnuła b adrazu vyklučyć pieradaču danych.
4. Klijentaaryjentavanaść … dakładniej, jaje adsutnaść. Ja lacieŭ dadomu, raźličvajučy na dapamohu, a ŭ vyniku moj rodny apieratar, jakim ja, maja žonka i baćki karystajucca, pahražaje sudom».
Dziakujem za vybar apieratara, doŭh i štraf možam spahnać praz sud
Adkaz Arciomu i praŭda davoli šyroki, sa spasyłkami na punkty dahavora, aznačeńnie paniaćcia «roŭminh», paradak akazańnia pasłuh i h. d. Kali koratka, to kampanija dziakuje abanientu za jaho vybar, pieraličvaje dakumienty, z umovami jakich jon pahadziŭsia, nahadvaje aznačeńnie roŭminhu i zhadžajecca z tym, što ŭ AAE Arciom vydatkavaŭ 1375 rubloŭ za 31 MB. Taryfikacyja pravodziłasia pa ŭsich praviłach, MTS i roŭminh-partnior vykanali svaje abaviazacielstvy, śpisańnie hrošaj praviedziena abhruntavana pa fakcie akazańnia pasłuh. Samaje važnaje znachodzicca ŭ samym kancy:
«U suviazi sa značnym pamieram zapazyčanaści, jakaja ŭtvaryłasia, MTS hatovy razhledzieć pytańnie ab rasterminoŭcy jaje vypłaty na 12 miesiacaŭ biez zachavańnia numara, bo numar partavany ź inšaj sietki.
Ličym nieabchodnym adznačyć, što ŭ vypadku niepahašeńnia zapazyčanaści albo praterminoŭki choć by adnaho płaciažu danaje pahadnieńnie budzie anulavana aŭtamatyčna i dakumienty buduć pieradadzienyja ŭ sud dla spahnańnia z vas doŭhu z ulikam štrafnych sankcyj».
Kamientary