Rašeńnie pra pieradaču Ukrainie źniščalnikaŭ F-16 moža być pryniataje ŭ najbližejšy čas
Da pryniaćcia stanoŭčaha rašeńnia ŭžo mohuć zastavacca «tydni».
Pradstaŭnik Minabarony ZŠA i dva inšyja vysokapastaŭlenyja vajskovyja čynoŭniki 28 studzienia ananimna paviedamili vydańniu Politico, što Pientahon usio bolš schilajecca da pieradačy Ukrainie źniščalnikaŭ F-16.
Va Ukrainie praciahvajucca ciažkija bai, jany iduć na paŭdniovym froncie, u tych abłaściach krainy, jakija Rasija abviaściła svaimi.
«Ja nie dumaju, što my suprać. Adnak Ukrainie jašče treba dakazać nam, što pastaŭka źniščalnikaŭ žyćciova nieabchodnaja dla viadzieńnia niepasrednaj baraćby i biez hetaha jana nie zmoža adoleć rasijan. Adpraŭka F-16 nie dapamoža Ukrainie adrazu ž vyrašyć prablemu z rasijskimi rakietami i bieśpiłotnikami», — skazaŭ nienazvany vysokapastaŭleny pradstaŭnik Minabarony ZŠA.
Pry hetym, pavodle jaho słoŭ, ZŠA vydatna razumiejuć stan ukrainskaj avijacyi i vykazvajuć zaniepakojenaść adnosna mahčymaha vyčarpańnia Ukrainaj zdolnaści abaraniać svajo nieba pry dapamozie sastarełych savieckich źniščalnikaŭ.
Zhodna z padlikam prajekta Oryx, z pačatku vajny Ukraina straciła jak minimum 16 samalotaŭ Mih-29. Da vajny jana mieła ich 43. Akramia taho, stračana, jak minimum, 7 z 26 Su-27. Realnyja straty mohuć być i bolšyja, bo Oryx uličvaje tolki vizualna paćvierdžanyja straty.
Pa zajavach dvuch inšych nienazvanych čynoŭnikaŭ ź Pientahona i inšych viedamstvaŭ, sučasnyja źniščalniki F-16 mohuć stać adnym z rašeńniaŭ hetaj prablemy. F-16 niasuć rakiety kłasa «pavietra-pavietra», jakija mohuć źbivać varožyja rakiety i bieśpiłotniki.
«U adroźnieńnie ad Patriot i inšych zachodnich sistem abarony, jakija ŭžo adpraŭlajucca va Ukrainu, F-16 mohuć chutka pieramiaščacca pa miascovaści dla źniščeńnia roznych abjektaŭ, što zabiaśpiečyć vialikuju pieravahu na poli boju», — paviedamili čynoŭniki.
Jany pry hetym dadali, što, navat kali ZŠA vyrašać nie pasyłać F-16, inšyja zachodnija krainy taksama majuć źniščalniki amierykanskaj vytvorčaści i mohuć sami ich pastavić Ukrainie. Adnak dla hetaha ŭsio roŭna patrebny dazvoł ZŠA.
Hety dazvoł, pa słovach adnaho z čynoŭnikaŭ, moža być vydadzieny ŭžo praź niekalki tydniaŭ.
«Da mahčymaha stanoŭčaha rašeńnia ab pastaŭkach ułasnych samalotaŭ i reekspartu F-16 ź inšych krain mohuć zastavacca tydni», — skazaŭ jon.
Nahadajem, što niadaŭna Ukraina paprasiła krainy Zachadu terminova pieradać sučasnyja źniščalniki i vielmi spadziavajecca, što heta buduć mienavita F-16. Kraina ŭžo rychtuje adpaviednyja ŭźlotnyja pałosy. Navučańnie piłotaŭ kiravać hetymi źniščalnikami zojmie da šaści miesiacaŭ.
Čytajcie jašče:
Niamiecki kancern Rheinmetall hatovy biesprecedentna naraścić vytvorčaść zbroi
Va Ukrainie stvarajucca pieršyja ŭ śviecie roty apierataraŭ udarnych bieśpiłotnikaŭ
«Majem dakładny płan»: MZS Ukrainy pra hatoŭnaść da mahčymaha abvastreńnia z boku Biełarusi
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič3
Kamientary