«Adnu tabletku dzialiŭ na dźvie»: žurnalistu Siarhieju Sacuku nie pieradajuć za kraty leki

Siarhieja Sacuka ŭžo etapiravali ŭ mahiloŭskuju turmu №4, chacia apielacyjnaja skarha pakul nie razhledžana. Jak viadoma, advakat napisaŭ apielacyju na niekalki staronak, ale Siarhiej vyrašyŭ jaje samastojna dapoŭnić, i atrymałasia 85 staronak. Razhlad apielacyjnaj skarhi ŭ Viarchoŭnym Sudzie pryznačany na 10 lutaha.

— Na hetym tydni brat dasłaŭ paviedamleńnie, u jakim raspavioŭ, što maje vialikija prablemy ź lekami: na momant napisańnia lista ŭ jaho zastałasia ŭsiaho adna tabletka, — kaža Alaksandr Sacuk. — Napisaŭ, što padzielić jaje na dva dni, a dalej navat i nie viedaje, jak budzie abychodzicca bieź lekaŭ.

— Ich Siarhieju nieabchodna prymać rehularna?

— U brata sardečnaje zachvorvańnie, i jamu treba štodzień ranicaj i viečaram prymać admysłovyja tabletki. Pry hetym prapisali pryjom lekaŭ nie na tydzień ci miesiac, a pažyćciova. Jon užo hetyja tabletki kala piaci hadoŭ užyvaje, kali nie bolš.

Kali nie prymaješ, pačynajucca sardečnyja zboi. Siarhiej niejak pisaŭ, što ŭ jaho ŭžo byŭ adzin nie vielmi mocny prystup, i dziakuj bohu, što ŭsio dobra zakončyłasia. Ale ja navat i ŭjavić nie mahu, što moža zdarycca, kali, nie daj boh, brat zastaniecca naohuł bieź lekaŭ.

— Jak dajšło da takoj situacyi?

— Usie nieabchodnyja leki my pieradali Siarhieju ŭ pasyłcy, jany jość u turmie. Pytańnie ŭ tym: čamu nie addajuć? Pryčynu admovy, nakolki viadoma, nichto nie tłumačyć, chacia Siarhiej napisaŭ, što budzie dabivacca, kab tabletki jamu addali.

Asabista ja naohuł nie razumieju, u čym tut prablema. Kvalifikavanyja kardyjołahi paśla abśledavańnia pryznačyli leki, čałavieku ich nieabchodna rehularna prymać, tabletki pieradali. Čamu ich nie addajuć? Chto-niebudź adkaža na hetaje pytańnie?

— Što Siarhiej jašče napisaŭ u liście?

— Bolš ničoha asablivaha. Paviedamiŭ, što pieravodziać z adnoj kamiery ŭ druhuju, zdajecca, užo źmianiŭ piać ci šeść kamier. I, naturalna, čakaje razhladu apielacyjnaj skarhi.

Siarhieja Sacuka — hałoŭnaha redaktara partała «Ježiednievnik» — zatrymali 8 śniežnia 2021 hoda. U toj ža dzień doma ŭ jaho adbyŭsia pieratrus, a dostup da sajta «Ježiednievnika», dzie Sacuk publikavaŭ svaje žurnalisckija rasśledavańni, byŭ zabłakavany.

Siarhieja vinavacili pa troch artykułach Kryminalnaha kodeksa: «Atrymańnie chabaru» (art. 430), «Raspalvańnie varožaści» (art. 130), «Pieravyšeńnie ŭłady albo słužbovych paŭnamoctvaŭ» (art. 426).

U vyniku Siarhiej Sacuk asudžany na 8 hadoŭ źniavoleńnia z adbyćciom pakarańnia ŭ kałonii ŭzmocnienaha režymu.

Taksama žurnalistu pryznačany štraf u pamiery 500 bazavych vieličyń (16 tysiač biełaruskich rubloŭ). Jon pazbaŭleny prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, na termin 5 hadoŭ. Akramia taho, sud vyrašyŭ spahnać z abvinavačanaha ŭ dachod dziaržavy hrašovuju sumu ŭ pamiery 12384 biełaruskija rubli.

• 0
• 0
• 0
• 0
• 0
• 1
• 6
• 0