Prychilniki Paźniaka abvinavacili ŭ zryvie vizitu svajho lidara ŭ Vilniu Ofis Cichanoŭskaj. Ofis havoryć, što jon ni pry čym
Siońnia Zianon Paźniak vydaŭ zajavu, jakaja zasmuciła jahonych vilenskich prychilnikaŭ: raniej anansavanaja sustreča z palitykam, jakaja pavinna była prajści 15 lutaha, nie adbudziecca. Prytym navat samu najaŭnaść takich płanaŭ jon asprečyŭ va ŭłaścivym jamu kateharyčnym styli, nazvaŭšy havorku pra heta «nietypovaj pravakacyjaj», zroblenaj «pa technałohii». Adnak akazałasia, što vizit u Vilniu ŭsio ž płanavaŭsia, ale znajšlisia abstaviny, jakija jamu pieraškodzili. Mini-rasśledavańnie praviało «Radyjo Svaboda».
Paplečnik Zianona Paźniaka pa ruchu «Volnaja Biełaruś» Pavieł Vusaŭ u kamientary «Svabodzie» skazaŭ, što kali jany z Paźniakom byli ŭ Bachmucie, to da jaho źviarnuŭsia adzin litoŭski aktyvist, jaki prapanavaŭ arhanizavać nievialikuju sustreču ź Zianonam Paźniakom i pradstaŭnikami pałka Kalinoŭskaha ŭ Siejmie Litvy.
«Arhanizataram pavinien byŭ vystupić deputat Emanuelis Zinhierys. Navat była zabraniravanaja Kanstytucyjnaja zała parłamienta. Razam z nami pavinien byŭ być Dźmitryj Ščyhielski i Vadzim Kabančuk z pałka Kalinoŭskaha. Arhanizatar jašče spytaŭ, ci nie budziem my suprać, kali budzie zaprošany niechta z Ofisa Śviatłany Cichanoŭskaj. My, naturalna, ničoha nie mieli suprać», — skazaŭ Vusaŭ.
Pa jaho słovach, paralelna abmiarkoŭvałasia imaviernaść sustrečy ź biełarusami ŭ Vilni, ale biez anijakaj kankretyki.
«My ni na što nie zhadžalisia, bo čakali aficyjnaha zaprašeńnia ad litoŭskaha boku. A potym 10 lutaha raptoŭna pačalisia ruchi, kali admianili reziervacyju Kanstytucyjnaj zały. I ŭvohule pačali kazać, što niadobra, kali Paźniak budzie pravodzić tut kanfierencyi.
Kali ja pačaŭ cikavicca, to pačuŭ adkaz, što niechta z Ofisa Cichanoŭskaj staŭ telefanavać ledź nie ministru zamiežnych spraŭ, što takoha być nie moža, što prymać Paźniaka ŭ Siejmie nielha. Faktyčna vizit sarvaŭsia».
Aficyjnaha zaprašeńnia z boku Siejma tak i nie pryjšło, pryznaŭ Vusaŭ. A sam Siejm Litvy na zapyt «Svabody» pakul nie adkazaŭ.
Vyśvietliłasia, što arhanizataram spatkańnia ź litoŭskaha boku byŭ hramadski aktyvist Vałdas Bartkiavičus, jaki ad 2020 hoda mocna zaanhažavaŭsia ŭ biełaruskija spravy. Jon prapanavaŭ Paźniaku z Vusavym pryjechać u Vilniu i zrabić u Siejmie kanfierencyju, tym bolš što adzin z deputataŭ, Emanuelis Zinhierys, asabista viedaje Paźniaka jašče ź jahonych zornych časoŭ. Vusaŭ z Paźniakom, viadoma, z radaściu pahadzilisia.
Litoŭskija arhanizatary pačali pracavać nad śpisam udzielnikaŭ. Siarod inšaha, była ideja zaprasić Alaksandra Dabravolskaha z Ofisa Cichanoŭskaj i Anatola Labiedźku. Ale kancylaryja Siejma dazvołu na aficyjnuju sustreču nie dała, adpaviedna pra Kastytucyjnuju zału havorka ŭžo nie išła. Zinhierys tady skazaŭ, što rady byŭ by pryniać Paźniaka ŭ svaim prastornym kabiniecie, ale, pa słovach Bartkiavičusa, «heta nie toje, što čakałasia».
Pry hetym surazmoŭca «Svabody» padkreśliŭ: sa słoŭ Emanuelisa Zinhierysa jamu stała viadoma, što mierapryjemstva zabłakavaŭ mienavita Ofis Śviatłany Cichanoŭskaj.
Sam Ofis, adnak, heta asprečvaje. Pres-sakratarka Cichanoŭskaj Hanna Krasulina zajaviła:
«Ofis Śviatłany Cichanoŭskaj nie maje dačynieńnia da arhanizacyi sustreč Zianona Paźniaka i da situacyi, jakaja skłałasia. Siejm sam prymaje rašeńnie, jakija sustrečy pravodzić, jak i Zianon Paźniak maje prava pravodzić sustrečy, jakija ličyć patrebnymi».
Deputat Zinhierys u kamientary «Svabodzie» skazaŭ, što sabrać ludziej u Siejmie ŭ taki čas prosta niemahčyma.
«Ja prapanavaŭ Zianonu Paźniaku pacisnuć ruku ŭ svaim kabiniecie jak daŭniamu baraćbitu za svabodu Biełarusi. U kabiniecie padpisanta akta ab niezaležnaści Litvy.
Naša znajomstva adbyłosia jašče ŭ 1988 hodzie. Paśla hetaha doŭhija dziesiacihodździ my nie bačylisia», — kaža Zinhierys.
Sam jon nibyta vielmi chacieŭ raspytać Paźniaka pra vizit u Bachmut.
«Cikava daviedacca pra situacyju na pieradavoj bitvy za svabodu i jeŭrapiejskaść. Połk Kalinoŭskaha, niesumnienna, razam ź inšymi ratuje honar biełaruskaha naroda, robić heta z ryzykaj dla svaich žyćciaŭ. Mnie, jak dakładčyku Rady Jeŭropy pa palityčnych nastupstvach ahresii Rasii va Ukrainie, važna pačuć pra bajazdolnaść i samaachviarnaść biełarusaŭ ź pieršych vusnaŭ».
Pry hetym Zinhierys dadaŭ, što jon nie stavić pad sumnieŭ adnosiny da Śviatłany Cichanoŭskaj jak da prezident-elekta.
Čytajcie taksama:
«Nietypovaja pravakacyja». U Vilni anansavali sustreču z Paźniakom, pra jakuju jon i sam nie viedaŭ
Ciapier čytajuć
Łukašenka zajaviŭ pra hatoŭnaść pryjechać u Kijeŭ54
Kamientary
zrešty, što tak i budzie, adrazu i padumała, jak pabačyła hetu "navinu" - nashaniva.com/310286