Viktoryja Nułand: ZŠA padtrymlivajuć udary ŭkraincaŭ pa rasijskich vajskovych abjektach u Krymie
Niezaležna ad taho, kali i jak skončycca ciapierašniaja rasijska-ŭkrainskaja vajna, nieabchodna zabiaśpiečyć harantyi dla taho, kab Rasija nie raźviazała jaje znoŭ, zajaviła namieśnik dziaržsakratara ZŠA pa palityčnych spravach Viktoryja Nułand.
Vieryć słovam Pucina abo taho, chto stanie na čale Rasii paśla jaho, nielha budzie navat paśla zakančeńnia vajny, miarkuje jana.
«My ni ŭ jakim razie nie pavinny vieryć, pakul Uładzimir Pucin ci chtości typu jaho znachodzicca va ŭładzie, što heta sapraŭdy skončana. Navat kali budzie dasiahnuty spraviadlivy mir, usio roŭna spatrebicca doŭhaterminovy płan i vybudoŭvańnie ŭkrainskaj armii budučyni, jakaja zmahła b adbić u Pucina ŭsiakuju achvotu zadumać što-niebudź u dalejšym», — skazała Viktoryja Nułand.
U chodzie anłajn-dyskusii ŭ vašynhtonskim Fondzie Karniehi Nułand skazała, što ZŠA hladziać nie tolki na toje, jakija ŭzbrajeńni možna adpravić na pole boju va Ukrainie prosta ciapier, ale taksama na tyja, jakija spatrebiacca dla nadziejnaha strymlivańnia Rasii ŭ dalejšym.
Adkazvajučy na pytańnie viadučaha, ci nie aścierahajucca ŭ Vašynhtonie pierasiekčy jakija-niebudź praviedzienyja Kramlom «čyrvonyja linii», akazvajučy padtrymku Ukrainie, u pryvatnaści, kali ŭ Kijevie vyrašać viarnuć vajennym šlacham zachopleny Rasijaj u 2014 hodzie Krym, namieśnik kiraŭnika amierykanskaj dypłamatyi skazała, što ZŠA nikoli nie pryznavali Krym rasijskim i Ukrainie naležyć usia jaje terytoryja ŭ mižnarodna pryznanych miežach.
«Ja nie budu budavać zdahadak, dzie ŭkraincy vyrašać vajavać. Ci jakim čynam jany vyrašać dziejničać u dačynieńni da Kryma ŭ karotkaterminovaj, siarednieterminovaj i doŭhaterminovaj pierśpiektyvach. My ličym Krym Ukrainaj», — skazała Nułand.
Sa słoŭ Nułand, paśla akupacyi Kryma Rasija pieratvaryła paŭvyspu ŭ svoj vajskovy płacdarm, raźmiaściŭšy tam bajavyja mahutnaści, składy ŭzbrajeńniaŭ i kamandnyja centry, jakija pahražajuć i buduć pahražać biaśpiecy Ukrainy da toj pary, pakul tam znachodziacca.
Hetyja vajskovyja abjekty, jakija Rasija raźmiaściła ŭ Krymie, ZŠA razhladajuć jak lehitymnyja celi i padtrymlivajuć naniasieńnie ŭkrainskaj armijaj udaraŭ pa ich, skazała namieśnik dziaržsakratara.
«Heta zakonnyja celi. Ukraina nanosić pa ich ŭdary. I my padtrymlivajem heta. Ukraina nikoli nie budzie ŭ biaśpiecy, pakul Krym, jak minimum, nie demilitaryzavany», — miarkuje Nułand.
Pry hetym Nułand dadała, što pierš čym padyści da pytańnia ab Krymie, ukrainskim vajskoŭcam nieabchodna jašče viarnuć značnyja terytoryi. «I mienavita na hetym jany ciapier skancentravanyja», — skazała jana.
Kamientary