Na miažy znoŭ pačali ŭzmocniena nadhladać ludziej. Pryčym nie tolki tych, u kaho 23.34
Čytačy paviedamlajuć, što apošnim časam biełaruski bok pačaŭ usio čaściej pravodzić pahłybleny nadhlad pry pierasiačeńni miažy. Sistemnaści ŭ padychodzie nie prahladajecca: u kahości hladzieli knihi, inšych praviarali ź mietałašukalnikam.
Z ukrainskim pašpartam — na dopyt i pahłybleny nadhlad
Čytačy paviedamlajuć, što apošnim časam pry pierasiačeńni dziaržaŭnaj miažy kantrol ź biełaruskaha boku staŭ bolš strohim.
«Pierš za ŭsio, jak ja razumieju, padazreńni vyklikajuć hramadzianie Ukrainy. Kali bačyš, što ŭ aŭtobusie niechta jedzie z ukrainskim pašpartam, to heta dadatkovyja hadzina-paŭtary na biełaruskim baku», — kaža mužčyna, jaki pieryjadyčna jeździć praź miažu na aŭtobusie.
Surazmoŭca śćviardžaje, što ŭžo dvojčy traplaŭ u situacyju, kali aŭtobus zatrymlivaŭsia na miažy praz pasažyraŭ z ukrainskim hramadzianstvam.
«Kiroŭca adrazu paviedamlaje pahraničnikam, kolki jedzie pasažyraŭ i ź jakim pašpartam. Kali siarod pasažyraŭ jość ukraincy, to ich prosiać uziać rečy, vyjści i prajści razam ź imi (pamiežnikami).
Apošni raz, kali jechaŭ maršrutkaj, to paśla prachodžańnia nami pahraničnaha kantrolu my jašče kala hadziny čakali čałavieka z ukrainskim pašpartam. Toj užo paśla prajezdu miažy raskazaŭ, što žyvie ŭ Biełarusi z 2014 hoda, ale jaho ŭsio adno dapytvali, navošta i kudy jon jedzie, jakija ŭ jaho suviazi z Ukrainaj. Praviarali telefon, padpiski ŭ telehramie, profili ŭ sacyjalnych sietkach», — kaža surazmoŭca.
Hramadzian Ukrainy adpraŭlajuć na pahłybleny nadhlad niezaležna ad taho, u jaki bok i na jakim typie transpartu tyja pierasiakajuć miažu. Kali ŭkrainiec jedzie praź miažu na aŭto, to jaho aŭtamabil prahaniajuć praz skanier, kali taki majecca ŭ punkcie propusku, kažuć vidavočcy.
«Pilna pryhladajucca da knih»
Ludzi źviartajuć uvahu, što dadatkovyja pravierki pačali prymianiać i ŭ dačynieńni da tych, chto raniej zajazdžaŭ biez prablem i nie byŭ sudzimy pa «pratesnych» artykułach.
«Pratakoły nadhladu nie vydavali, ale praviarali ŭsio vielmi pilna. U tym liku ŭsialakija papiery i dakumienty, jakija čałaviek viazie z saboj. Taksama pilna pryhladajucca da knih», — raskazaŭ adzin z surazmoŭcaŭ.
«Usich praviarali mietałašukalnikam»
Čytač, jaki vyrašyŭ źjeździć na majskija ŭ Biełaruś ź ES, zaŭvažyŭ, što nadhlad na miažy staŭ značna bolš hłyboki, čym było raniej.
«U Biełaruś jezdžu prykładna raz na paŭhoda, tamu mahu adznačyć, što hetym razam nadhlad byŭ samym pilnym za ŭsie maje papiarednija vizity. Vytrasali ŭsie rečy, u litaralnym sensie prasili vykrucić usie kišeni, praviarali ŭsich pasažyraŭ u niezaležnaści ad połu i ŭzrostu mietałašukalnikam», — kaža biełarus, jaki ŭ pieršyja dni maja jechaŭ u Biełaruś.
«Ekstremisty» prachodziać kantrol pieršymi
Inšy biełarus raskazvaje, jak pierasiakaŭ miažu z tymi, chto trapiŭ u bazu «Biesporiadki».
«Pieršy raz z takim sutyknuŭsia jašče niekalki miesiacaŭ tamu, kali adzin chłopiec sam paviedamiŭ kiroŭcu, što jon tak zvany «ekstremist» i što praz heta na ŭjeździe ŭ Biełaruś jaho buduć praviarać daŭžej za inšych, što moža zatrymać maršrutku», — uspaminaje mužčyna.
Paźniej, pa słovach mužčyny, niekatoryja kiroŭcy aŭtobusaŭ pačali sami pytacca, ci jość siarod pasažyraŭ tyja, chto pryciahvaŭsia da adkaznaści za pratesnuju dziejnaść. Takich ludziej prosiać pačynać prachodzić kantrol pieršymi, bo heta moža zaniać bolš času ŭ paraŭnańni z «čystymi» pasažyrami.
Imavierna, što čarhovaje ŭzmacnieńnie nadhladu pry ŭjeździe i vyjeździe ź Biełarusi źviazana sa stracham łukašenkaŭcaŭ pierad dziejnaściu biełaruskaha padpolla, pry ŭdziele jakoha, u pryvatnaści, byŭ paškodžany rasijski kaštoŭny samalot-raźviedčyk u Mačuliščach pad Minskam. Učora łukašenkaŭcy zajavili, što na 9 maja nibyta płanavaŭsia šerah teraktaŭ. Prapahandysty z ANT užo anansavali film-rasśledavańnie, pryśviečany ich praduchileńniu. Raniej takija filmy niaredka byli falšyŭkami, a infarmacyja ŭ ich — pierakručanaj.
«Naša Niva» — bastyjon biełaruščyny
PADTRYMAĆMinsk choča pierastrachavacca: Biełaruś uviała pahraničny kantrol na ŭjeździe z Rasii
Pandemija skončyłasia, ale «kavidny» zbor na miažy zastajecca. Voś kolki dziaržava zarablaje na im kožny miesiac
«Zialonaja karta» chutka ŭsio. Jak buduć afarmlacca strachavyja polisy na aŭto dla vyjezdu za miažu?
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka34
Kamientary
Čytacie pravilnuju litaraturu i ničoha nie bojciesia! ;)
Za eto vriemia možno było vybrať hdie łučšie ,čiem v RB