Hary i Mehan ledź nie raźbilisia: dźvie hadziny za ich taksi hnalisia fatohrafy
Aficyjny pradstaŭnik prynca Hary i jaho žonki Mehan paviedamiŭ, što jany ledź nie raźbilisia, pakul na praciahu dźviuch hadzin ich mašynu praśledavali fatohrafy-paparacy. Incydent adbyŭsia ŭ Ńju-Jorku.
Jak udakładniŭ pradstaŭnik, incydent adbyŭsia ŭ Ńju-Jorku, paśla naviedvańnia paraj dabračynnaha viečara, dzie Mehan atrymlivała ŭznaharodu za svaju pracu ad Ms Foundation Women of Vision, piša Bi-bi-si.
Nieŭzabavie ŭ sacyjalnych sietkach źjavilisia fatahrafii Hary, Mehan i jaje maci Doryi Rehłand, jakija jechali ŭ taksi.
«Pazaŭčora ŭviečary hiercah i hiercahinia Sasekskija [tytuły Mehan i Hary] ledź nie raźbilisia padčas aŭtamabilnaj pahoni z udziełam hrupy vielmi ahresiŭnych paparacy, — skazana ŭ zajavie pary. — Pahonia, jakaja praciahvałasia bolš za dźvie hadziny, pryviała da mnostva situacyj, kali ledź nie adbylisia sutyknieńni ź inšymi kiroŭcami, piešachodami i dvuma aficerami ńju-jorkskaj palicyi».
Praz paru hadzin skandalnuju zajavu — sa značna mienšym, zrešty, dramatyzmam — prakamientavali ŭ Departamiencie palicyi Ńju-Jorka.
Jak śćviardžajecca ŭ apublikavanaj zajavie hetaha viedamstva, «kamandzie pryvatnaj achovy, jakaja supravadžała hiercaha i hiercahiniu Sasekskich», daviałosia źviarnucca pa dapamohu da palicejskich, pakolki fatohrafy, jakija praśledavali taksi, «uskładniali ich transparciroŭku». [U ciapierašni čas] «hiercah i hiercahinia Sasekskija ŭžo prybyli ŭ punkt pryznačeńnia. Nijakich paviedamleńniaŭ ab sutyknieńniach, vyklikach palicyi abo atrymanych traŭmach, jakija adbylisia padčas pieraśledu, nie pastupała. Źviazanych z hetym incydentam zatrymańniaŭ taksama nie było».
Raniej paviedamlałasia, što ŭdzieł muža i žonki ŭ viečary dabračynnaj arhanizacyi byŭ ich pieršym sumiesnym źjaŭleńniem na publicy paśla karanacyi baćki Hary, karala Karła III, na jakuju toj jeździŭ adzin.
«Raspaŭsiudžvańnie hetych fatahrafij — z ulikam taho, jakim čynam jany byli atrymanyja — pryvodzić da zaachvočvańnia praktyki, jakaja ŭjaŭlaje niebiaśpieku dla ŭsich datyčnych bakoŭ i źjaŭlajecca ŭvarvańniem u asabistaje žyćcio», — skazana ŭ zajavie.
Pryncesa Dyjana, maci Hary i spadkajemca brytanskaha trona prynca Uiljama, raźbiłasia ŭ Paryžy ŭ žniŭni 1997 hoda. Jana zahinuła ŭ vyniku aŭtakatastrofy, jakaja adbyłasia ŭ momant, kali jaje mašynu praśledavała hrupa fatohrafaŭ-paparacy.
Kamientary