Polšča zakryła miažu dla pryčepaŭ na biełaruskich i rasijskich numarach — jak heta adabjecca na Biełarusi?
Z 1 červienia i da asablivaha rasparadžeńnia Polšča zakryvaje ruch praź biełaruska-polskuju miažu dla hruzavych aŭtamabilaŭ, ciahačoŭ, pryčepaŭ i paŭpryčepaŭ, sastavaŭ transpartnych srodkaŭ, zarehistravanych u Biełarusi i Rasii. Spytali ŭ łahista i pieravozčyka, jakich nastupstvaŭ varta čakać ad hetych abmiežavańniaŭ i jak jany źbirajucca pracavać u novych umovach.
Usia sprava ŭ pryčepach
Siarod novych pravił ad polskaha boku hałoŭnym možna nazvać zabaronu ŭjezdu hruzavoha transpartu z pryčepami i paŭpryčepami, zarehistravanymi ŭ Biełarusi i Rasii.
Jakraz hety punkt stanie najbolš adčuvalnym, bo pracavać na svajoj terytoryi transpartnym kampanijam z RB i RF ES zabaraniŭ jašče ŭ krasaviku minułaha hoda. Tamu za redkim vyklučeńniem hruzaviki, jak i firmy, zarehistravanyja ŭ Biełarusi i Rasii, nie mohuć ažyćciaŭlać pieravozki ŭžo druhi hod.
Praz sankcyi ŭ toj ža Polščy rezka pavialičyłasia kolkaść transpartnych kampanij ź biełaruskim i rasijskimi kapitałami. Tolki za 2022 hod ich kolkaść u Polščy vyrasła amal u dva razy. Kali ŭ 2021 hodzie takich kampanij było 473, to ŭ 2022-m — užo 885.
Biełarusy ź firmami ŭ Polščy vykarystoŭvali hruzaviki i ciahačy na polskaj rehistracyi, a voś pryčepy i paŭpryčepy ŭ ich čaściakom byli ź biełaruskaj abo rasijskaj «prapiskaj».
Niekatoryja pieravozčyki ŭžo padrychtavalisia
Surazmoŭca sa śfiery hruzapieravozak kaža, što niekatoryja biełaruskija pieravozčyki ŭžo adreahavali na hetaja novaŭviadzieńni.
«Viedaju, što niekalki bujnych kampanij pačali zakuplać pryčepy i paŭpryčepy jašče da taho, jak zakon byŭ aficyjna pryniaty. Z rytoryki polskaha boku było zrazumieła, što jany ŭviaduć hetyja abmiežavańni. Tamu niekatoryja bujnyja firmy vyrašyli nie adkładać hety praces i pačali zakuplacca zahadzia, kab nie spyniać pracu», — kaža pieravozčyk.
Pa nazirańniach mužčyny, 8 z 10 «polskich» pieravozčykaŭ, jakija pracujuć na našym kirunku, majuć biełaruskija karani.
«Kankretna palakaŭ na Biełaruś jeździć nie tak šmat. U asnoŭnym biełarusy sami zakryvajuć patreby ŭ pieravozkach na hetym kirunku. Bujnyja hulcy majuć firmy i transpart, zarehistravany ŭ Biełarusi, Jeŭropie, Kazachstanie. Takaja praktyka była raspaŭsiudžanaja i raniej, ale nie była takoj papularnaj, jak ciapier. Naprykład, litoŭskaja firma — adnoj z samych bujnych u Jeŭropie — daŭno mieła transpart nie tolki ź litoŭskaj prapiskaj, ale i rasijskaj», — kaža mužčyna.
Što da nastupstvaŭ, to na dumku pieravozčyka, heta pryviadzie jašče da bolšych zatoraŭ na TŁC.
«Raniej možna było rabić pieračepku, što adnosna chutka. Ciapier daviadziecca pierahružać tavary ź biełaruskaha pryčepa ŭ polski. Na heta daviadziecca vydatkoŭvać bolš času i hrošaj. Dastaŭka stanie bolš praciahłaj pa časie i napeŭna bolš darahoj», — ličyć biznesmien.
Vialikich prablem nie čakajuć, pryhladajucca da Bałtyi
Surazmoŭca sa śfiery łahistyki źviartaje ŭvahu na toj fakt, što hetaja zabarona nie ahulnajeŭrapiejskaja, a vyklučna polskaja, tamu na pieršy pohlad nie ŭsio tak kiepska.
«Jak hetaja schiema budzie pracavać na praktycy, pakul nieviadoma, bo data Ch jašče nie nadyšła. Ale z taho, jak napisana ŭ navinach, vyhladaje, što zabarona na ŭjezd hruzavikoŭ ź biełaruskimi i rasijskimi pryčepami budzie raspaŭsiudžvacca tolki na adrezak biełaruska-polskaj miažy.
To-bok ź biełaruskim abo rasijskim paŭpryčepam pa fakcie nielha budzie prajechać tolki praz punkt propusku na biełaruska-polskaj miažy. Bałtyjskija krainy ŭ hety śpis nie ŭvachodziać», — adznačaje łahist.
Na dumku śpiecyjalista, kali heta budzie mienavita tak, to vialikich prablem nie ŭźniknie.
«U nas zastajucca krainy Bałtyi, ź jakimi možna budzie praciahvać pracavać, jak i raniej. Z polskimi i biez hetaha stała składaniej supracoŭničać, kali ŭ adkaz na zakryćcio «Bierastavicy» biełaruski bok zabaraniŭ ujazdžać u našu krainu hruzavikam na polskaj rehistracyi praz punkty propusku na miažy z Łatvijaj i Litvoj (aproč niekatorych vyklučeńniaŭ. — NN).
Tamu, vidać, hetaje abmiežavańnie ŭ pieršuju čarhu zakranie polskich pieravozčykaŭ. Pryčym kiepska ad hetaha budzie ŭsim: jak firmam z polskim kapitałam, tam i z zamiežnym», — ličyć śpiecyjalist.
Surazmoŭca adznačaje, što choć bolšaść «polskich» kampanij, jakija pracujuć na ŭschodnim kirunku, naležać biełarusam abo rasijanam, chapaje i palakaŭ, jakija zarablali na pieravozcy biełaruskich i rasijskich pryčepaŭ i paŭpryčepaŭ.
Uskładnicca dastaŭka hruzaŭ u Rasiju
«Biełaruski bok nie zabaraniaje pieračapić na TŁC polski pryčep da biełaruskaha ciahača, jaki daviazie hruz u Minsk ci, naprykład, u Viciebsk. Ale kali havorka idzie pra dalejšuju dastaŭku ŭ Rasiju, to tak rabić nielha. Tamu akurat biełaruskija i ruskija pryčepy karystalisia takoj papularnaściu.
Ciapier vyhladaje, što prynamsi polskija pieravozčyki akažucca ŭ najmienš vyhadnym stanoviščy, bo tavar daviadziecca pierahružać, a heta dadatkovyja časovyja i finansavyja vydatki. Takim čynam, praca ź pieravozčykami z bałtyjskich krain budzie vyhladać bolš pryvabnaj, prynamsi kali ničoha nie źmienicca. Atrymlivajecca, što takim rašeńniem polski bok robić kiepska nie tolki biełaruskamu i rasijskam biznesu, ale i polskamu», — ličyć śpiecyjalist.
«Naša Niva» — bastyjon biełaruščyny
PADTRYMAĆCiapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ5
Kamientary
Smotriu Polaki očień pochoži na russkich, choť i antahonisty… lubiat «strielať» po svoim