«Adnačasova abstalavańnie moža vytrymać da 10 tysiač čałaviek». Jak prasłuchoŭvali pratestoŭcaŭ
Padrabiaznaści taho, jak adbyvałasia prasłuchoŭvańnie ŭ 2020-m, na kanale «Tok» raskazaŭ bajpołaviec, padpałkoŭnik milicyi Stanisłaŭ Łupanosaŭ.
Jak prasłuchoŭvali pratestoŭcaŭ
Stanisłaŭ Łupanosaŭ adznačaje, što dla taho, kab niekaha pastavić na kantrol, nieabchodna atrymać sankcyju prakurora. Bieź jaje prasłuchoŭvańnie niemahčymaje. Dla taho, kab atrymać sankcyju, patrebnaja infarmacyja, čamu prasłuchoŭvańnie nieabchodna. Čałaviek pavinien ździejśnić niejkaje złačynstva, jakoje kryminalna karajecca.
U 2020 hodzie była raspačataja takaja sprava, jak masavyja biesparadki, pa 289 artykule Kryminalnaha kodeksa. Jakraz u ramkach hetaj spravy, jak śćviardžaje były siłavik, pačali ŭsich słuchać.
Pa słovach Łupanosava, na aktualny momant, ličba tych, kaho prasłuchoŭvali, składaje sotni tysiač. Jon adznačaje, što razmovy nie prasłuchoŭvalisia ŭ prostym sensie słova. Ich zapisvali pry dapamozie techničnych srodkaŭ. Adnačasova abstalavańnie moža vytrymać prasłuchoŭvańnie da 10 tysiač čałaviek. Zatym, jak zhadvaje były siłavik,
«prychodzić opier i fizična ŭsio heta adsłuchoŭvaje. Ale ŭsio nie prasłuchoŭvajecca. Vybiraješ tolki toje, što važna. Pobytavyja razmovy nie prasłuchoŭvaješ. A voś pa niejkaj spravie złačynnaj, kali čałaviek abmiarkoŭvaje svaje płany, to prasłuchoŭvaješ».
Stanisłaŭ Łupanosaŭ, jaki raniej pracavaŭ va ŭpraŭleńni «K» HUUS Minharvykankama, jakoje zajmałasia rabotaj z big data, adznačaje, što prasłuchoŭvać možna chatni i pracoŭny telefony, mabilny telefon:
«Možna słuchać mašynu, kvateru, miesca pracy, kali papiarednie tam pastavić žučok. Ale ŭ nas nie było dośviedu prasłuchoŭvańnia dadatkaŭ na mabilnych telefonach. Ni Viber, ni Telegram, ni WhatsApp u nas nie było. Ale, jak viadoma, Viber pieršapačatkova byŭ zarehistravany ŭ Biełarusi, bo jon tut byŭ zrobleny. I klučy pieršapačatkova taksama zachoŭvalisia ŭ Biełarusi.
Tamu, kab pracavać u krainie, ty pavinien padzialicca niečym. Heta pytańnie nacyjanalnaj biaśpieki. Ja ŭpeŭnieny, choć u mianie dokazaŭ niama, što Viber prasłuchoŭvajecca. Ale dazvoł na prasłuchoŭvańnie biez zhody KDB ci, jak ciapier, Apieratyŭna-analityčnaha centra ty nie atrymaješ».
Jak prasłuchoŭvali pravaabarončy centr «Viasna»
Były siłavik adznačaje, što prasłuchoŭvali ŭsich ludziej z pravaabarončaha centra «Viasna». Pa jaho słovach, u raspracoŭku ich uziali adrazu paśla vybaraŭ u 2020-m. Dakumient pryjšoŭ ad Hałoŭnaha raźviedvalnaha ŭpraŭleńnia Ministerstva abarony z Hrušaŭskaj, 22. Pryčynaj nazvali finansavańnie pratestaŭ.
«U hetym dakumiencie byli nie tolki supracoŭniki «Viasny». Tam byŭ Stryžak, Lavončyk i jašče vielmi viadomyja ciapier ludzi. Ja nie budu ich nazyvać. Ale jany viedajuć. Ja im usim skazaŭ»,
— adznačaje Łupanosaŭ.
Stanisłaŭ Łupanosaŭ raskazaŭ, što zatrymańni supracoŭnikaŭ pravaabarončaha centra «Viasna» mahli adbycca paśla taho, jak byli sabranyja niejkija dokazy:
«Dla siabie jany prydumali, što heta dokazy. Mahčyma, jany sabrali źviestki pra vialikuju kolkaść ludziej. U pravaabarončy centr «Viasna» prychodzili ludzi pa dapamohu. Tam vialisia śpisy takich ludziej. Mahčyma, siłavyja struktury atrymali niejkim čynam dostup da hetych śpisaŭ. I kali jany zrazumieli, što ŭsio pad kantrolem, to praviali zatrymańni».
Łupanosaŭ śćviardžaje, što prasłuchoŭvalisia ofisy «Viasny» ŭ Mahilovie i Homieli.
Pa słovach byłoha siłavika, prasłuchoŭvali nie tolki ofisy, ale i kvatery. Łupanosaŭ adznačaje, što i ŭ jaho kvatery pa zmoŭčańni pavinny być srodki prasłuchoŭvańnia.
«Inakš ich praca budzie niapoŭnaja. Jany nie zmohuć narmalna dać spravazdaču načalstvu».
Hladzicie całkam:
Kamientary