«Na złodziei i šapka haryć». Łukašenka vykazaŭsia pra padryŭ Kachoŭskaj HES
Alaksandr Łukašenka na sustrečy z sakratarami savietaŭ biaśpieki dziaržaŭ — siabroŭ ADKB vykazaŭsia nakont padryvu Kachoŭskaj HES, jak pieradaje BIEŁTA. I pradkazalna abvinavaciŭ Ukrainu.
«Vy, dumaju, zdahadvajeciesia, chto ŭzarvaŭ Kachoŭskuju HES. Kažuć, na złodziei i šapka haryć. Chto pieršym pra heta zakryčaŭ? — zadaŭ pytańnie Łukašenka. — Zrazumieła, što ŭkrainskamu boku treba było schavać try dni «kontrnastupu», dzie amal dźvie sotni broniemašyn źniščyli i bolš za 2 tysiačy čałaviek zahinuli (Łukašenka raspaŭsiudžvaje infarmacyju Minabarony RF — NN). Tamu Kachoŭka, Kachoŭka, a pra toje [straty pry sprobie kontrnastupleńnia] nichto nie kaža. A heta ž usio vidać», — skazaŭ Łukašenka.
«I vy bačycie, jakuju akuratnuju, aściarožnuju pazicyju zaniali ZŠA, — praciahnuŭ Łukašenka. — Abaviazany addać im naležnaje. Jany adrazu skazali: «My pakul nie možam skazać, chto heta zrabiŭ. My pavinny razabracca». Padumajcie, z čaho b heta?»
U noč na 6 červienia vybucham była źniščanaja Kachoŭskaja HES. Sotni miastečak akazalisia ŭ zonie zatapleńnia. Pačałasia evakuacyja žycharoŭ niebiaśpiečnych rajonaŭ.
Kijeŭ i Maskva vinavaciać adno adnaho. Bieły dom zajaviŭ, što RF adkaznaja za razbureńnie Kachoŭskaj HES: jaje razbureńnie było b niemahčymym, kali b rasijskaja armija nie ŭvarvałasia va Ukrainu.
Ciapier čytajuć
Adzin z zahinułych siońnia vajskoŭcaŭ — 26‑hadovy minčuk Kirył. Što pra jaho viadoma8
Kamientary