Seks stroha pa raskładzie, ježa i adzieńnie adnolkavyja, usio raśpisana napierad. Minčuk raskazaŭ pra svoj niezvyčajny ład žyćcia
Zvyčki Jaŭhiena zdolnyja ŭzarvać mozh u tych, chto pryvyk žyć u režymie lohkaha chaosu. Chłopiec zaŭsiody ŭstaje i kładziecca ŭ adnu i tuju ža paru, myjecca tolki chałodnaj vadoj, dzień pry dni jeść adnolkavuju ježu, nosić tolki čornyja džynsy i futbołki, słuchaje razumnyja aŭdyjaknižki zamiest zalipańnia ŭ sacsietkach. A jašče jon płanuje absalutna ŭsio — navat zvanki mamie i spatkańni ź dziaŭčynaj. Navošta heta ŭsio? Historyju raskazvaje «Anłajnier».
Jaŭhien Levy žyvie ŭ nievialikaj studyi sa svajoj dziaŭčynaj. Ciapier maładyja ludzi ŭ pracesie pierajezdu ŭ bolš prastornuju kvateru. Tam budzie niekalki pakojaŭ, kab adzin moh spać u stroha adviedzieny dla hetaha čas, a druhi — vučycca abo pracavać (hrafiki supadajuć nie zaŭsiody).
U ciapierašniaj kvatery padkreśleny minimalizm: adnatonnyja ścieny i strohi dyzajn.
Raskidanych pa kutach škarpetak vy dakładna nie ŭbačycie — choć by tamu, što Jaŭhien viadzie ich ulik, jak i ŭsiaho adzieńnia.
Jaŭhienu ŭsiaho 21, ale da hetaha vieku jon paśpieŭ pačać niekalki biznesaŭ i papracavać ź dziasiatkami kampanij jak kansultant. Hučyć nie vielmi realistyčna, ale chłopiec zapeŭnivaje, što heta tak.
— Ja pačaŭ pracavać hadoŭ u 15. Maje baćki zajmajucca biznesam, i spačatku ja padpracoŭvaŭ u mamy ŭ farmacie «pryniasi-padaj», a potym sieŭ na zvanki, nabiraŭsia dośviedu. Paśla zakančeńnia škoły zacikaviŭsia inviestycyjami i pajšoŭ spačatku ŭ finansavy kansałtynh, zrabiŭ niekalki prajektaŭ biaspłatna i ź ciaham času napracavaŭ partfolia. Z tych časoŭ čym tolki nie zajmaŭsia: markietynham, finansami, pryciahnieńniem kapitału, raźvićciom praduktaŭ u IT. Ciapier ja pracuju ŭ bujnoj kampanii, zajmajusia markietynham i raźvićciom praduktu i paralelna pravodžu kansultacyi dla biznesu.
— A jak ža vučoba?
— Paśla škoły ja nie pajšoŭ va ŭniviersitet. Dakładniej, pastupiŭ, schadziŭ na pary niekalki razoŭ, a potym prosta pajšoŭ na pierapynku i zabraŭ dakumienty. Mnie zdałosia, što tam vykładali niejkuju łuchtu. Užo tady ja nie ŭjaŭlaŭ, jak heta spatrebicca mnie ŭ žyćci.
Z taho momantu Jaŭhien całkam pryśviačaje siabie pracy. Jon nie chavaje, što maryć u budučyni stać «vialikim čałaviekam», i robić dla hetaha ŭsio mahčymaje.
— Ja chaču damahčysia nievierahodnych vynikaŭ u biznesie i dla hetaha vykrystoŭvaju dźvie rečy. Pa-pieršaje, starajusia spraścić usie žyćciovyja pracesy, kab vyzvalić čas i resurs na hłabalnyja mety. Pa-druhoje, starajusia pierabudavać mozh na toje, kab atrymlivać zadavalnieńnie ad rašeńnia składanych zadač.
Ciapier kožnamu z nas dastupna zanadta šmat prostych zadavalnieńniaŭ. Ja pracuju nad tym, kab matyvavać siabie inakš.
Dzieviać hadzin snu — pryjarytet numar adzin
U pahoni za pośpiecham važna dakładna rasstavić dla siabie pryjarytety.
Dla Jaŭhiena heta ŭ pieršuju čarhu režym dnia i jakasny son. Kožnuju ranicu jon ustaje stroha ŭ 06:45 i kładziecca spać u 21:45 — heta dzieviać hadzin paŭnavartasnaha adpačynku.
— Da taho, jak my ź dziaŭčynaj stali žyć razam, ja ŭstavaŭ u 04:30 i kłaŭsia spać u 19:30, navat u vychadnyja. Ciapier hrafik pryjšłosia zrušyć, heta taki kampramis dla nas. Ale spadziajusia, što kali ŭ nas budzie dva pakoi, to ja viarnusia da bolš rańniaha padjomu. Usio-tki ranišnija hadziny — samyja praduktyŭnyja: ty maksimalna adpačyŭ, vyspaŭsia. A jašče ŭ ciabie jość minimum try hadziny, kali nichto nie adciahvaje ciabie ad pracy, i ty možaš uziacca za samuju surjoznuju zadaču.
Kab nie dapuścić zbojaŭ, Jaŭhien naładziŭ sabie dva budzilniki. Adzin ź ich — śvietłavy, jon pačynaje simulavać śvitanak za 15 chvilin da abudžeńnia.
Taksama ŭ chłopca jość dadatak u telefonie, kali zvanok možna adklučyć tolki skanam QR-koda, jaki znachodzicca ŭ vannym pakoi.
— A jak kłaścisia spać zaŭsiody svoječasova, raspaviedziacie?
— Treba prosta pryniać, što son — heta pryjarytet numar adzin. U ciabie nie byvaje padstavy jaho adkłaści — ni praca, ni sustreča nie mohuć hetamu pieraškodzić. Dla mianie heta lohka, tamu što na viečaryny ja nie chadžu, ni razu ŭ žyćci tam nie byŭ. Z adychodam da snu taksama prablem nie byvaje, kali zaŭsiody žyvieš pa adnym hrafiku. Voś učora ja pryjšoŭ pozna — u 21:41. Praz čatyry chviliny ŭžo spaŭ.
Ježa zaŭsiody adnolkavaja. Usio praličana da hrama
Na praciahu dnia ŭ chłopca ŭsiaho dva pryjomy ježy.
Śniadanak vielmi sytny: piać jajek i pałova pačka kurycy, pasmažanaj na patelni. Zapivaje heta Jaŭhien enierhietyčnym smuzi. U kaktejl uvachodziać małako, aŭsianka, arechi, kłubnicy i banany.
— Na abied ja zvyčajna jem 300 hramaŭ tvarahu z vareńniem. Nie idealny varyjant, viadoma, ale mnie padychodzić. Jašče padčas treniroŭki zvyčajna vypivaju sałodki napoj: chutkija vuhlavody patrebnyja, kab nie padaŭ cukar. Raniej jašče piŭ pratein z małakom, ciapier prosta źmiešvaju kakavu z małakom.
Źmieściva chaładzilnika ŭražvaje i pałochaje adnačasova. Adnolkavyja pakiety z małakom i sokam, zapas «šajbaŭ» z tvarahu, šmat upakovak jajek i kurycy.
Jaŭhien kaža, što jamu tak zručna: jaho štodzionny racyjon praličany da hrama. Jość tablica, dzie vyrazna prapisana, kolki kałoryj i vuhlavodaŭ/białkoŭ/tłuščaŭ chłopiec źjadaje za dzień. I ŭsia hetaja ježa pavinna trapić u arhanizm u intervale 8 hadzin — astatnija 16 biełarus haładaje.
— Raniej ja jeŭ čatyry razy na dzień, ale ŭ vyniku pryjšoŭ da intervalnaha haładańnia. Mnie zdajecca, što kali ty syty, to ty drenny palaŭničy, u ciabie matyvacyja naturalnym čynam padaje. Akramia taho, ježa adbivajecca i na jakaści snu. Kali ty pierad snom pajasi, horš śpiš, tamu ja starajusia jeści ŭ pieršaj pałovie dnia.
— Ale niaŭžo nie chočacca sprabavać niešta novaje?
— Ja mahu pierakusić dzieści ŭ novym miescy, naprykład, padładzić spatkańnie ź dziaŭčynaj pad białkovy abied i zamianić tvaroh na stejk. Ale heta byvaje redka, prykładna raz na miesiac.
Mnie nie treba raznastajnaść. Kali b možna było naohuł nie jeści, ja b lohka abychodziŭsia bieź ježy.
Treniroŭki — na vynik. I nijakaj haračaj vady
Składana ŭjavić sabie efiektyŭnaha čałavieka, jaki nie nadaje ŭvahi fiznahruzcy. Jaŭhien pasprabavaŭ roznyja vidy sportu, ale ŭ vyniku pryjšoŭ da paŭerliftynhu. Treniroŭki ŭ chłopca zaŭsiody praciahłyja — pa dźvie z pałovaj hadziny. Heta niaprostaje zadavalnieńnie, ale resursnaje (stoadsotkavaje traplańnie ŭ škału kaštoŭnaściaŭ).
— Heta, moža, nie samy dynamičny vid sportu, ale mnie padychodzić. Pa-pieršaje, dla mianie važna pastajanna dasiahać niejkaha vyniku. U paŭerliftynhu ja chaču stać kandydatam u majstry sportu, a potym i majstram sportu. A jašče takija treniroŭki robiać mianie bolš pryvabnym. U biehu, naprykład, kab čahości damahčysia, mnie pryjšłosia b važyć usiaho 65 kiłahramaŭ. Chočacca ŭsio-tki być mocnym, mieć mahčymaść i dziaŭčynu na ruki padniać.
Akramia sportu, Jaŭhien vielmi pavažaje hartavańnie. U jaho hadami była adklučanaja haračaja vada ŭ kvatery (pryjšłosia viarnuć tolki pa prośbie dziaŭčyny). Chłopiec ličyć, što choład daje karysnuju dychtu dla arhanizma.
— Chałodnaja vada dapamahaje pračnucca. I dla imunitetu dobra: ja zaŭvažyŭ, što mienš chvareju. Plus heta jašče adzin sposab miedytacyi, pravierki siabie i svaich mahčymaściaŭ, jak na ćvikach pastajać. Raniej ja navat zimoj sprabavaŭ pa vulicy chadzić u futbołcy, ale staŭ zanadta chutka chudnieć, tamu što arhanizm raschodavaŭ šmat enierhii na sahravańnie. U vyniku ja admoviŭsia ad hetaha ekśpierymienta.
Fiksuje ŭsie zadačy: kali pastryhčy paznohci ci schadzić u kramu
Płanavać žyćcio Jaŭhienu dapamahaje dadatak Trello. Tudy chłopiec zakidvaje try typy zadač: stratehičnyja, raptoŭnyja i tyja, što paŭtarajucca.
Da prykładu, jość meta na hod — pavialičyć prodaž. Kab hetaha dasiahnuć, treba razdrabnić vialikuju zadaču na bolš drobnyja — na kožny miesiac. Rehularna 1-ha čysła biełarus prahladaje śpis svaich zadač na miesiac i składaje tydniovy hrafik. A pa niadzielach prahladaje śpis zadač na tydzień i raskidvaje spravy pa dniach. I voś užo atrymlivajecca kankretny płan dla kožnaha dnia.
Da stratehičnych zadač dadajucca raptoŭnyja: sustrecca z žurnalistami, naprykład.
— Usie zadačy atrymlivajuć dźvie charaktarystyki: terminovaść i važnaść. I vykonvajucca ŭ paradku pryjarytetu. Kožnuju hadzinu ja prahladaju śpis zadač na dzień i vydalaju toje, što zroblena abo straciła aktualnaść, a štości pieranošu.
Jaŭhien zapisvaje navat takija spravy, jakija bolšaść z nas i nie dumaje płanavać! Naprykład, pastryhčy paznohci — u chłopca heta štotydniovaja zadača pa čaćviarhach. Abo patelefanavać mamie — heta taksama prapisana, rehularnaść — try razy na tydzień.
— A nie byvaje takoha, što prosta chočacca patelefanavać mamie? Pa-za płanam?
— Ja nie viedaju, mnie chapaje troch razoŭ na tydzień, — uśmichajecca chłopiec.
U pierapynkach — knihi i miedytacyi. Muzyka pad zabaronaj
Składanaja sistema z pastanoŭkaj zadač dazvalaje Jaŭhienu maksimalna kancentravacca na pracy — heta toje, dziela čaho ŭ pryncypie zadumvaŭsia ŭvieś płan.
— Dla mianie žyćcio i praca — heta nieparyŭnyja paniaćci. Jość, pa sutnaści, try rečy ŭ maim žyćci: treniroŭki, čas ź siamjoj (u tym liku ja adnošu siudy dziaŭčynu) i praca, jakoj ja nadaju ŭvieś astatni čas. U mianie niama inšych asablivych zachapleńniaŭ. Mahu ź dziaŭčynaj film jaki-niebudź pahladzieć, ale heta adnosicca da času ź siamjoj — sam by ja marnavać na heta resurs nie staŭ.
Z drobiaziaŭ, jakija dapaŭniajuć jaho žyćcio, Jaŭhien vyłučaje tolki miedytacyju i čytańnie. Čytaje mantry Jaŭhien dva razy na dzień pa 20 chvilin — heta čas, kali jon imkniecca adchilicca ad dumak i zadač. Svajho rodu adpačynak, jaki dazvalaje jašče bolš efiektyŭna zajmacca svajoj pracaj.
Dla čytańnia chłopiec čaściej za ŭsio vybiraje aŭdyjafarmat. Słuchaje aŭdyjaknižki pry luboj mahčymaści: u darozie, u čarzie, u pačatku treniroŭki. A voś na muzyku ŭstalavaŭ sabie zabaronu: ličyć heta zanadta «prostym zadavalnieńniem».
Spatkańni pa płanie, ustrymańnie — mahutny resurs
Jak vy ŭžo zrazumieli, dziaŭčyna taksama ŭpisana ŭ hrafik, pryčym čas znosin ź joj stroha rehłamientavany.
— U nas spatkańni zvyčajna try razy na tydzień. U čaćvier — adna hadzina, u subotu — try hadziny, a ŭ niadzielu ŭ nas paŭdnia, zvyčajna z čatyroch dnia i da adychodu da snu.
— Jak dziaŭčyna da hetaha stavicca?
— My ź joj znajomyja ŭžo vosiem hadoŭ, a sustrakajemsia amal dva hady. Mnie zdajecca, ja b ź inšaj dziaŭčynaj i nie moh syścisia. U jaje taksama hrafik ščylny. Heta značyć, jana nie sumuje bieź mianie, taksama zaŭsiody zaniataja.
— Ale vy telefanujecie adno adnamu na praciahu dnia?
— Telefanujem adno adnamu redka, čaściej pierapisvajemsia, — kaža chłopiec. — U cełym my amal nie ŭzajemadziejničajem u budnyja dni: nie viačerajem razam, nie bavim času razam. Ale na vychadnych pravodzim paŭnavartasnyja spatkańni, jakija płanujem i da jakich rychtujemsia.
Atrymlivajecca, što my žyviom razam, ale ŭzajemadziejničajem u režymie bukietna-cukieračnaha pieryjadu. Hienijalna, na moj pohlad.
U Jaŭhiena ŭ cełym davoli śpiecyfičnaje staŭleńnie da patreb čałavieka ŭ seksie.
— Seks — adna z hałoŭnych krynic matyvacyi, asabliva dla mužčyn. U mianie zaŭsiody była mocnaja pałavaja kanstytucyja, i ja karystaŭsia hetym jak resursam. Ja prytrymlivaŭsia poŭnaha ŭstrymańnia — časam da hoda. Mnie byli zabaronienyja lubaja aktyŭnaść i luboje spažyvańnie kantentu intymnaha charaktaru. I kolkaść dadatkovaj enierhii, jakuju ja atrymlivaŭ, była nievierahodnaj. Z usich zvyčak ad hetaha, napeŭna, byŭ samy mocny vynik.
— A jak z abmiežavańniami ciapier?
— Jak ja i skazaŭ, u asnoŭnym naša kamunikacyja ź dziaŭčynaj prypadaje na vychadnyja, to-bok prysutničajuć peŭnyja abmiežavańni. I mnie pa-raniejšamu stroha zabaroniena hladzieć porna i samazadavalniacca.
Hrafik myćcia i śpis rečaŭ «dla čamadana»
I jašče trochi niebanalnaj ruciny.
Kab vyhladać zaŭsiody pryvabna i nie marnavać na heta ni chviliny lišniaha času, chłopiec sabraŭ harderob z adnolkavych rečaŭ. U jaho jość siem futbołak, troje džynsaŭ, dźvie pary krasovak, adny čaraviki, dźvie kurtki na roznaje nadvorje, kaścium, palito i niekalki kašul dla dziełavych sustreč. Usio adzieńnie, za vyniatkam kašul, čornaha koleru.
Futbołki i džynsy pa čarzie prachodziać dvuchtydniovy cykł našeńnia, pierš čym iści ŭ myćcio. Tut pracuje svaja sistema.
— Pierad snom ja zdymaju futbołku i pieraviešvaju jaje ŭ kaniec šafy. Na nastupny dzień apranaju novuju i znoŭ źmiaščaju ŭ kaniec. Anałahična z džynsami. Kali takaja «karusielka» prachodzić dva koły, ja addaju adzieńnie na myćcio.
Kali Jaŭhien jedzie ŭ pajezdku pa pracy, u čamadan jon kidaje rečy pa śpisie, jaki taksama składzieny zahadzia. Tam prapisana ŭsio da drabniutkich detalaŭ. A jašče ŭ biełarusa jość tablica, dzie sabrana ŭsia majomaść, jakoj jon vałodaje. Tam paznačana, jaki termin słužby ŭ rečaŭ — heta treba, kab nie zabyvać pra amartyzacyju. Naprykład, futbołki adnym macham śpisvajucca raz na hod — tak chłopcu zručniej.
— Adkul takaja ciaha ŭsio sistematyzavać? Moža zdacca, što heta niejki dakučlivy stan.
— Kali ŭsie płanuješ, atrymlivajecca vielmi mocna razhruzić hałavu. I ŭ hetym naohuł asnoŭny sens usiaho, što ja prydumlaju. Ja chaču, kab niavažnyja zadačy vyrašalisia ź minimalnymi namahańniami.
Ci składana dzialić pobyt z takim chłopcam?
Alina raspaviała, jak joj žyviecca z takim dyscyplinavanym i metanakiravanym chłopcam:
«My znajomyja z Ženiem z šostaha kłasa. Niekatoryja ź jaho zvyčak stali zaradžacca ŭžo tady, viadoma, nie na etapie vykanańnia, a na etapie žadańniaŭ. Naprykład, jon chacieŭ sabie adnolkavy harderob, ale tady ŭjaŭlaŭ siabie ŭ kaściumach: kašulach, pinžakach i štanach.
U cełym ład žyćcia Ženi mnie zrazumieły. Ja razumieju, jakija praviły i dla čaho jon uvodzić, tamu jaho zvyčki nie zdajucca mnie dziŭnymi. Dumaju, što takim čynam jon sprabuje spraścić svajo žyćcio. I heta sapraŭdy dla jaho karysna. Bieź sistemy jon bolš zabyvajecca abo biare pad uvahu.
Nie skažu, što na mianie mocna raspaŭsiudžvajucca jaho sistema ŭ pobycie. To-bok u mianie niama «hrafika myćcia rečaŭ». Ale jość zvyčki, jakija ja pieraniała i za jakija ŭdziačnaja. Naprykład, stała spać bolš, a raniej zaŭsiody pakutavała ad niedasypańnia. A jašče stała ŭvodzić u svajo žyćcio mietady rełaksacyi.
Mabyć, mnie kamfortna dzialić z Ženiem pobyt, tamu što ja ŭziała ad jaho sistemy tolki toje, što mnie padychodzić. Ja dumaju, jamu sa mnoj žyć bolš składana, čym mnie ź im».
A što ŭsio-tki prynosić radaść? Nie kožny zrazumieje
Ałkahol, kureńnie — usio heta, naturalna, prachodzić mima Jaŭhiena, tamu što takija zvyčki zabirajuć resursy ŭ arhanizma. Anałahična z čytańniem stužki navin, bo naš hieroj ličyć heta marnavańniem času.
— Heta vielmi lohki dafamin, vy jak byccam sieryjał hladzicie. I samaje hałoŭnaje, kali adbudziecca štości realna značnaje, ja pra heta ŭsio roŭna daviedajusia ad znajomych. Toje ž tyčycca sacyjalnych sietak, pakul u mianie niama patreby tam prysutničać. Kali ŭ budučyni ja budu supierznačnym, tady, moža, i pačnu dzialicca dośviedam.
— Napeŭna, u vas jość kumiry, ź jakich vy bieracie prykład?
— Tak, u asnoŭnym heta biznesmieny. Moža być, vy čuli pra Mikałaja Staronskaha — heta bujny pradprymalnik, finansist, adzin z najbahaciejšych ludziej u śviecie. Mianie vielmi matyvuje jaho historyja. U sporcie heta Kryšcijanu Ranałdu. Mnie zdajecca, jon taksama ŭ bolšaj stupieni pierfiekcyjanist, vybudoŭvaje ŭsio žyćcio vakoł svajoj mety.
— Meta — heta vydatna, ale raskažycie pra svaje maleńkija radaści. Ja, naprykład, ranicaj maru pra kavu…
— U mianie kava pad zabaronaj, — tut ža paryruje chłopiec i dapaŭniaje: — Napeŭna, takich radaściaŭ niašmat. Chutčej, ja skiravany na vynik. Kali bolš hrošaj zarabiŭ abo dobra patreniravaŭsia, padniaŭ u zale 200 kiłahramaŭ — heta novaja ličba. Vyniki mohuć być i pramiežkavymi, nieabaviazkova kožny dzień stavić rekordy. Mnie prosta padabajecca raźvivacca, čahości dasiahać. Heta jak u hulni: ludzi prapampoŭvajuć svajho piersanaža, a ja rablu heta ŭ realnym žyćci.
— Ale čamu vy admaŭlajecie sabie ŭ zadavalnieńniach?
— U mianie jość svaja teoryja na hety kont. Evalucyjna ŭ čałavieka skłaŭsia harmanalny resurs, jaki pavinien matyvavać jaho. Naprykład, zabiŭ mamanta i pałasavaŭsia tłustym kavałačkam — atrymaj vykid dafaminu, spakusiŭ dziaŭčynu ź plemieni — znoŭ vykid dafaminu. Tak jak ludzi — razumnyja istoty, jany prydumali mnostva sposabaŭ chaknuć hetuju sistemu i atrymlivać uznaharodžańnie biez pracy.
Zaraz my zachodzim na fud-kort, a tam bahaćcie straŭ. U internecie za 10 chvilin možna ŭbačyć bolš aholenych dziaŭčat, čym u minułym ludzi mahli nie ŭbačyć i za 10 žyćciaŭ.
Ja sprabuju supraciŭlacca hetamu i nie daju mozhu adčuć, što ŭznaharoda dajecca ŭ adryvie ad namahańniaŭ. Chaču atrymlivać zadavalnieńnie ad rašeńnia składanych zadač, jak i było zadumana evalucyjaj.
Ciapier čytajuć
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia8080
Kamientary
Tovariŝ vidimo sobrałsia žiť viečno, no ona tak vsia i proniesietsia i nikakich vospominanij:)