«Zładzili maleńki Kitaj». Što viadoma pra novuju vytvorčaść chaładzilnikaŭ u Baranavičach

Chaładzilniki «Midea»: abjom vytvorčaści i ekspart

Hod tamu staršynia Bresckaha abłvykankama Piotr Parchomčyk raspavioŭ, što pry realizacyi novaha prajekta ŭ Baranavičach pryciahnuta $28,8 młn pramych zamiežnych inviestycyj, zavieziena «ŭnikalnaje» technałahičnaje abstalavańnie i staić meta vypuskać da 850 tysiač chaładzilnikaŭ štohod.

Prykładna stolki ž u minułym vypuskaŭ biełaruski «Atłant» (kala 1 miljona adzinak chaładzilnaj techniki za hod).

Biełstat aktualnyja źviestki pa vytvorčaści chaładzilnikaŭ u 2025—2026 hadach nie pryvodzić, ale ŭ sakaviku kiraŭnik administracyi SEZ «Brest» Vadzim Kraŭčuk zajaviŭ, što na vytvorčaści «Midea» ŭ Baranavičach u minułym hodzie vypuścili bolš za 80 tysiač chaładzilnikaŭ, a ŭ 2026‑m płanujuć vypuścić 250 tysiač. I dadaŭ, što idzie «praciah vialikaha budaŭnictva».

Kali hetyja ličby adpaviadajuć rečaisnaści, to možna skazać, što z punktu hledžańnia abjomu vytvorčaści spravy na novaj vytvorčaści iduć niadrenna.

Sama kampanija «Midea Refryžerejtar Manufakturynh» źviestak pra raźvićcio svajoj vytvorčaści i ekspartu nie publikuje.

Pavialičyć

Siońnia chaładzilniki «Midea» z paznakaj «vytvorčaść — Biełaruś» možna vyjavić na handlovych placoŭkach u Rasii i Kazachstanie.

«Zładzili maleńki Kitaj»

Mienš radasnaj karcina vyhladaje z ulikam uzroŭniu zarobku na pradpryjemstvie.

Voś što raspavioŭ «Salidarnaści» žychar Baranavičaŭ:

— U minułym filijał «Atłanta» pa vytvorčaści kampresaraŭ da chaładzilnikaŭ, Baranavicki stankabudaŭničy zavod, byŭ samym paśpiachovym pradpryjemstvam u horadzie, kudy ŭładkavacca možna było tolki pa błacie. Ale heta ŭžo daŭno nie tak. Tamu kali adkryvali «Midea», ludzi navat uzradavalisia.

Kali na BSZ zarobak prostaha rabočaha ŭpaŭ da 900 rubloŭ na ruki, to tam abiacali minimum 1300. Pa fakcie ŭsio było nie tak. Ludzi sychodzili z BSZ na «Midea», a im płacili tyja ž 900 rubloŭ. Cyrk na drocie.

Ciapier na «Midea» vostraja niastača piersanału.

Ludziej zavablivajuć jak mohuć. U tym liku tak: prychodź z pašpartam, pracuj adzin dzień i atrymlivaj 50 rubloŭ. Kali pracavaŭ narmalna, skažuć «prychodź jašče». Nie pamiataju, kab u Biełarusi takoje raniej było, zładzili tut maleńki Kitaj.

Pavialičyć

Raskaz žychara Baranavičaŭ uskosna paćviardžajecca bahaćciem vakansij ź nievysokaj zajaŭlenaj apłataj. Naprykład, ślesaram-zborščykam bytavoj techniki na «Midea» abiacajuć 1100—1500 rubloŭ, naładčykam abstalavańnia — 1500—2300. Pry tym siaredni zarobak u Baranavičach składaje na ruki kala 1950 rubloŭ.

Pra isnavańnie prablemy daŭ zrazumieć i kiraŭnik administracyi SEZ «Brest» Vadzim Kraŭčuk, jaki zajaviŭ, što na «Midea» «staić pytańnie pracoŭnych resursaŭ» i što z kiraŭnictvam novaha pradpryjemstva «my havorym pra ŭzrovień zarobku».

Pytańni, jakija zastajucca biez adkazu

Viasnoj hetaha hoda staršynia Bresckaha abłvykankama Piotr Parchomčyk zajaviŭ, što kitajcy chočuć pavialičyć vytvorčaść chaładzilnikaŭ u Baranavičach.

Adnak, vyhladaje, što ŭsie vydatki pa realizacyi prajekta niasie biełaruski bok. Abjom pramych inviestycyj pry zapusku prajekta byŭ nievialikim, pry hetym «Midea» jak rezidentu SEZ «Brest» dali šerah ilhot, a zarobak na pradpryjemstvie śmiašyć navat žycharoŭ Baranavičaŭ.

Hod tamu Parchomčyk dakładaŭ Alaksandru Łukašenku, što na «Midea» praduhledžana «maštabnaja łakalizacyja» — ale bolš pra jaje nie ŭspaminajuć. Niezrazumieła, ci vyrablajuć u Biełarusi detali dla chaładzilnikaŭ «Midea» abo ŭ Baranavičach prosta zastajecca zborka ich kitajskich kampanientaŭ.

I ŭsie hetyja pytańni zastajucca biez adkazu na fonie taho, što ŭłady dapamahajuć pramomu kankurentu ajčynnaha «Atłanta». Ciažka ŭjavić, kab kitajskuju vytvorčaść vyrašyli zapuścić biez asabistaha adabreńnia Łukašenki.

Ale ci vyhadna heta biudžetu i chto źjaŭlajecca bienieficyjaram u hetaj historyi — pakul niezrazumieła.

• 0
• 0
• 4
• 2
• 0
• 0
• 0
• 0