Ukraincy pad Zaparožžam u dvuch miescach prarvali pieršuju liniju abarony rasijan
Ukrainskija padraździaleńni ździejśnili praryŭ u rajonie Uremieŭskaha vystupu, stvaryŭšy pahrozu akružeńnia rasijskich vojskaŭ i vymusiŭšy ich biez boju zdać vioski Niaskučnaje i Błahadatnaje, pra heta piša «Ahientstvo. Novosti». Adnačasova na poŭdzień ad Zaparožža ŭkraincy ŭziali pad kantrol sieliščy Łabkovaje i Lavadnaje.
Jak paviedamiŭ napiaredadni kanał rasijskich vajenkaraŭ «Rybar», u rajonie Uremieŭskaha vystupu šturmavyja hrupy USU z 23-j i 31-j asobnych miechanizavanych bryhad, a taksama marpiechi 37-j bryhady adnavili ataki na rasijskija pazicyi. Bai iduć u rajonie vioski Uražajnaje, na rubiažy Navadaraŭka — Navasiołka, taksama USU sprabujuć padyści da Novadanieckaha.
Vajenkary ličać, što tak ukrainskaja armija sprabuje ŭklinicca ŭ tył rasijskim vojskam na Uremieŭskim vystupie, «miarkujučy pa praktyčna sinchronnaj atacy na Uražajnaje i z boku Vialikaj Navasiołki».
Pavodle infarmacyi kanała, u vyniku USU ŭdałosia «praktyčna biez boju» zaniać vioski Niaskučnaje i Błahadatnaje — farmavańnie «DNR» «Kaskad» adstupiła praz pahrozu trapleńnia ŭ akružeńnie.
Analityk OSINTdefender paćvierdziŭ, što rasijskija vojski zdali Niaskučnaje, jany adstupili.
Analityk OSINTtechnical u jakaści paćviardžeńnia praryvu pakazaŭ videa z ukrainskaj technikaj, jakaja pierasoŭvajecca pa vakolicach Błahadatnaha. Pavodle jaho acenki, ukrainskija vojski zajšli na 7 km u tył da rasijskich vojskaŭ. Vajenny daśledčyk Rob Li pry hetym adznačyŭ, što asnoŭnaja linija abarony prachodzić u rajonie siała Uražajnaje, što za 5 km ad Błahadatnaha, adbitaha USU.
Ranicaj 11 červienia pravajenny kanał WarGonzo paviedamiŭ ab prasoŭvańni ŭkrainskich vojskaŭ i ŭ inšym rajonie Zaparožskaha napramku — na linii Kamienskaje — Piacichatki, nazvaŭšy naviny «tryvožnymi». Kanał apublikavaŭ videa z ukrainskimi technikaj i piachotaj, źniataje z rajona pasiołka Žarabianki, i zrabiŭ vysnovu, što siało Łabkovaje kančatkova pierajšło z šeraj zony pad kantrol USU.
Vałanciory OSINT-prajekta GeoConfirmed paćvierdzili prysutnaść u rajonie Łabkovaha, jany identyfikavali miesca na videa z ukrainskimi vajskoŭcami. Vyzvaleńnie Łabkovaha ŭžo častkova adlustravali na karcie Instytuta vyvučeńnia vajny (ISW).
Uładzimir Zialenski ŭ subotu ŭpieršyniu paćvierdziŭ kontrnastupleńnie Ukrainy.
U toj ža dzień brytanskaja vyviedka paviedamiła, što ŭkrainskaje vojska za apošnija 48 hadzin prarvała pieršuju liniju rasijskaj abarony ŭ niekalkich kirunkach. Pavodle źviestak śpiecsłužby, častka rasijskich sił abaraniałasia, inšyja adstupali ŭ niekatorym biesparadku.
ISW na asnovie dastupnaj publičnaj infarmacyi zrabiŭ vysnovu, što ŭkrainskija vojski nastupajuć jak minimum na čatyroch učastkach frontu i damahlisia pośpiechaŭ u rajonie Bachmuta i ŭ zachodniaj častcy Danieckaj vobłaści.
Brat biełaruskaj karalevy pryhažości trapiŭ u reanimacyju ŭ Azierbajdžanie4
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary