Žoncy palitviaźnia i maci hadavałaj dački ŭ Viciebsku vystavili kryminalnaje abvinavačańnie
Taćcianu Pyćko, žonku viciebskaha videaapieratara-fryłansiera Viačasłava Łazarava, vinavaciać u stvareńni ekstremisckaha farmavańnia ci va ŭdziele ŭ im. Što stała padstavaj dla abvinavačańnia, pakul nieviadoma, ale tym časam adnahadovaja dačka Taćciany i Viačasłava zastałasia biez apieki, pra heta paviedamlaje «Viciebskaja viasna».
U mai minułaha hoda ŭ Taćciany Pyćko i Viačasłava Łazarava naradziłasia dačka Jeva. Paśla taho jak 6 červienia maci zatrymali, jana znachodzicca ŭ dziciačym špitali pad nahladam lekaraŭ, bo baćka dziaŭčynki taksama ŭ SIZA.
Hadavałaje dzicia ŭziataje pad apieku dziaržavy, pakul pryvatnuju apieku nie aformiać svajaki.
U 2020 hodzie Taćcianu Pyćko ŭžo sudzili i štrafavali za ŭdzieł u mirnych šeściach. Praz heta jana straciła nastaŭnickuju pracu ŭ škole. Paśla naradžeńnia małodšaj dački jana zajmałasia vychavańniem jaje i dvaich starejšych dziaciej ad pieršaha šlubu.
9 lutaha, u dzień zatrymańnia jaje muža Viačasłava Łazarava, da Taćciany Pyćko pryjšli ź pieratrusami i zabrali techniku. Na toj momant žonka z mužam užo niekalki miesiacaŭ žyli asobna, i pieratrus u Łazarava pravodzili pa miescy jahonaha žycharstva. U jaho taksama zabrali techniku, a samoha jaho źmiaścili ŭ SIZA.
Suprać videaapieratara-fryłansiera vystavili abvinavačańnie pavodle art. 361-4 Kryminalnaha kodeksa («Spryjańnie ekstremisckaj dziejnaści») za suviaź ź niedziaržaŭnym miedyja, pryznanym u Biełarusi «ekstremisckim farmavańniem».
Ciapier čytajuć
Pavieł Vinahradaŭ upieršyniu raskazvaje, jak jaho zakinuli na samaje dno biełaruskaj turmy. Jak heta — kali susiedzi za cyharetu jaduć čužoje haŭno6
Kamientary