«Načnoje žyćcio Minska pieražyvaje svaje najhoršyja časy». Kryk dušy staličnaha dydžeja pra kryzis u tusovačnaj śfiery
Biełaruski dydžej Illa Tryšyn, viadomy taksama jak Diana Advocat, padniaŭ u svaim błohu temu načnoha žyćcia ŭ stalicy.
Chłopiec zaniaty ŭ kłubnaj śfiery kala piaci hadoŭ. Jon zaŭvažaje, što kryzis pačaŭsia daŭno, jon sistemny i ciapier dasiahnuŭ piku.
Čamu tak zdaryłasia? Dydžej pieraličvaje ŭ svaim tyktoku hałoŭnyja, na jaho pohlad, pryčyny.
«Pa-pieršaje, u Biełarusi praktyčna adsutničajuć niejkija ŭciamnyja pryvozy. Kaniečnie, da nas pryjazdžajuć niejkija małaviadomyja artysty, u asnoŭnym — z Maskvy i Piciera. Ale heta ŭsio nie taja infanahoda, kab sabrać vialikuju kolkaść ludziej. Ja ŭžo maŭču pra toje, što zachodnich artystaŭ u 2025 hodzie było kala nula.
Usio heta vielmi psuje jakaść, viečaryny robiacca adnastajnymi, łakalnyja dydžei, kaniečnie, małajcy, ale kali jany varacca va ŭłasnym soku, usio heta pačynaje tuchnuć», — kamientuje Illa.
Druhim punktam dydžej ahučvaje hłabalny trend — moładzi ŭsio mienš cikava chadzić u kłub, nie spać usiu noč, pić ałkahol i potym dva dni valacca z pachmiella.
«Ciapier heta niedapuščalnaja raskoša. Raniej vychad u kłub — heta było niejkaje «vaŭ», niejki flor i mahija. A siońnia vy byli ŭ kłubie «58»? Nijakaj mahii tam niama. Lepš schadzić na niejki kviz, kvest, pakatacca na łyžach, paskakać na batucie — niejki aktyŭny adpačynak».
Treciaj pryčynaj Illa nazyvaje ekanamičnuju situacyju.
«Schadzić patusavacca siońnia kaštuje vielmi i vielmi niatanna. Uvachody na viečaryny — niedzie 50 rubloŭ. Taksi tudy-nazad — jašče niedzie 50. Vielmi darahim staŭ ałkahol: kaktejli pa 20-cy, piva pa 15. Patusavacca ŭsiu noč — heta minimum 200‑250 rubloŭ».
Praciahvajučy, chłopiec nie abychodzić uvahaj i samich arhanizataraŭ.
«Ludzi bajacca mocnych ŭlotaŭ — składana lehalizavacca, tvajo mierapryjemstva mohuć zabaranić u dzień padziei, a ty ŭžo pradaŭ kvitki, vydatkavaŭ vialikuju kolkaść hrošaj na mantaž, arendu śviatła i huku, rekłamu… A tabie prosta ŭ niejki dzień skažuć: «Sory, my admianiajem vaša hastrolnaje paśviedčańnie, tamu što my tak zachacieli. Mienavita tamu nichto nie choča ryzykavać — usie robiać takija tusovački, što kali navat ulaciš, to ničoha strašnaha, a voś maštabnaść — sabie daražej».
U kancy dydžej zadajecca łahičnym pytańniem: jak z hetaha vyjści?
«Mabyć, treba prydumać niejki novy farmat — mahčyma, mienš načnoha žyćcia, bolš viečarovaha. Nie chapaje farmataŭ dla ludziej, jakija nie mohuć dazvolić sabie tusavacca ŭsiu noč, u kaho jość siamja, dzieci. Ja sam, naprykład, z zadavalnieńniem adyhraŭ by na viečarynie, jakaja pačynałasia b u 19.00 i zakančvałasia ŭ hadzinu-druhuju nočy. Kab my mahli narmalna patusavacca, a zamiest ałkaholu papić, naprykład, kłasnych pueraŭ ci filtr-kavu».
U kamientarach mnohija pahadzilisia z Tryšynym, pairanizavaŭšy, praŭda, z taho, jak jon sprytna pieraličyŭ roznyja pryčyny, abychodziačy hałoŭnuju — palityčny kryzis u krainie, praź jaki źjechała vialikaja kolkaść restarataraŭ, artystaŭ, tvorčaj moładzi, a taksama zakrylisia stylovyja i kultavyja ŭ minułym miescy.
«My žyviom i tak u dosyć ciomnyja časy, tamu načnoje žyćcio nie aktualnaje», «2020 hod + vajna = majem, što majem», «Paśla abłaŭ na Zybickaj niejak niama ŭžo nastroju lažać pysaj u padłohu», «Heta vy jašče ŭ Homieli nie byli — zastalisia adny ŭspaminy» — dzielacca bolem u kamientarach.
«Ja nie zaśpieła tusoŭki na Ok16, a «Maf» začyniŭsia pierad samym nosam, ale ślozy navaročvajucca, kali prachodžu mima byłych «Chajda», «Łoŭfaja» i «Kamuny» — adčuvańnie, što kali ŭ Minska adabrali hetyja miescy siły, ciapier prosta niama čym dychać», — pieraličvaje zhublenyja miescy, jakija trymali ŭzrovień tusovak na vulicy Kastryčnickaj, adna z žycharak stalicy.
Bolšaść sychodzicca na tym, što ałkahol sapraŭdy staŭ užo nie taki modny, jak raniej, pryčym pa ŭsim śviecie, i heta pryvodzić da zakryćcia kłubaŭ i placovak navat u takich prahresiŭnych, tusovačnych haradach, jak Bierlin.
«Ranišniki! Ja znajšła takoje vyjście dla siabie! Vielmi pryšpilna ŭ subotu ranicaj pryjści ŭ kłasnuju kaviarniu z pryhožymi stylovymi ludźmi i pasłuchać kłasnuju elektronnuju muzyku», — rekamienduje adna z kamientatarak alternatyvu.
U jakaści novych zabaŭ častka kamientataraŭ raić źviarnuć uvahu i na siłoŭni.
Kamientary