Ahranom, deputat, kiraŭnik prafsajuza i pamočnik Łukašenki. Što viadoma pra novaha ministra sielskaj haspadarki

«Ź niekalkich kandydatur, jakija mnie prapanavali tydzień tamu, ja vybiraju vas. Tamu što ŭ vas prystojny žyćciovy šlach. Vielmi važna, kab ministr abaviazkova papracavaŭ i kiraŭnikom sielskahaspadarčaha pradpryjemstva. Heta nadzvyčaj važna», — skazaŭ Łukašenka, pryznačajučy Siarhiej Bartaša. 

Try adukacyi čynoŭnika

Siarhieju Bartašu 49 hadoŭ. Jon naradziŭsia ŭ Pružanskim rajonie Bresckaj vobłaści i mienavita tam pačynaŭ svaju prafiesijnuju dziejnaść.

Skončyŭ Hrodzienski dziaržaŭny sielhasinstytut, potym Instytut pavyšeńnia kvalifikacyi i pierapadrychtoŭki Bresckaha dziaržaŭnaha techničnaha ŭniviersiteta i Akademiju kiravańnia. Maje dypłomy pa śpiecyjalnaściach «ahranomija», «mieniedžmient u APK», «kiravańnie pradpryjemstvami APK».

U Pružanskim rajonie Siarhiej Bartaš pracavaŭ ahranomam, inžynieram-hidratechnikam, potym bolš za 10 hadoŭ kiravaŭ ahrarnym pradpryjemstvam «Linoŭskaje». Byŭ deputatam Pružanskaha rajonnaha Savieta deputataŭ i ŭznačalvaŭ Pružanskaje rajonnaje abjadnańnie arhanizacyj prafsajuzaŭ.

U 42 hady kančatkova pierajšoŭ u sistemu vykanaŭčaj ułady

Z 2016 hoda Siarhiej Bartaš pracavaŭ namieśnikam Kobrynskaha rajvykankama, potym uznačalvaŭ kamitet sielskaj haspadarki Bresckaha abłvykankama.

Ale ŭ 2020-ym jaho pryznačyli kiravać Biarozaŭskim rajvykankamam, a praz dva hady Bartaš «vyras» adrazu da pamočnika Łukašenki pa Homielskaj vobłaści.

Inicyjatyvy pa prapahandzie sielskaj haspadarki

U 2019 hodzie na pasadzie kiraŭnika kamiteta sielskaj haspadarki Bresckaha abłvykankama jon padtrymaŭ inicyjatyvu ab vydańni «Knihi honaru», pryśviečanuju «najlepšym ahraryjam Brestčyny za 80 hadoŭ».

Na prezientacyi knihi Siarhiej Bartaš adznačaŭ, što Bresckaja vobłaść «dadała ŭ vytvorčaści małaka» i «ekspartuje 58% ad ahulnadziaržaŭnaha abjomu małočnaj pradukcyi».

U statusie pamočnika Łukašenki pa Homielskaj vobłaści adstojvaŭ nieabchodnaść pavieličeńnia i raźvićcia ŭ rehijonie sadavodstva pavodle «intensiŭnych technałohij».

Na infarmacyjnych sustrečach raskazvaŭ pra «kłasičnyja siamiejnyja kaštoŭnaści» i jadziernuju zbroju

Apošni hod Siarhiej Bartaš, jak i bolšaść čynoŭnikaŭ, pravodziŭ «infarmacyjnyja» sustrečy ŭ ahraharadkach i sa studentami. Na ich raskazvaŭ, što robić dziaržava dla palapšeńnia demahrafii i prapahandy «kłasičnych siamiejnych kaštoŭnaściaŭ».

«Heta, u pieršuju čarhu, realizacyja dziaržprahram, jakija ŭklučajuć sistemu padrychtoŭki moładzi da siamiejnaha žyćcia, zabieśpiačeńnia jakaści i dastupnaści mieddapamohi žančynam i dzieciam, padtrymku siemjaŭ ź dziećmi i palapšeńnie ŭmoŭ ichniaha žyćcia praz nadańnie roznych ilhot i vypłaty siamiejnaha kapitału», — cytavali pamočnika Łukašenki na aficyjnym sajcie Homielskaha abłvykankama.

Na sustrečy ŭ Biełaruskim dziaržaŭnym univiersitecie transpartu sioleta ŭ krasaviku Siarhiej Bartaš pierakonvaŭ studentaŭ i piedahohaŭ, što Biełaruś nie ŭstupić «va ŭzbrojeny kanflikt». «Kali ahresija budzie skiravanaja suprać nas, to my, viadoma ž, adkažam», — skazaŭ jon i faktyčna paŭtaryŭ słovy Łukašenki ab tym, što jadziernaja zbroja źjaŭlajecca «tym faktaram, jakoha baicca ŭvieś śviet, i mienavita hety faktar strymlivaje źniešniuju ahresiju».

Što viadoma pra siamju

Siarhiej Bartaš maje žonku Taćcianu, ale pra dziaciej ničoha nie paviedamlajecca.

Kamientujučy sioleta čarhovuju hadavinu pačatku Druhoj suvietnaj vajny, jon paviedamiŭ, što jahony adzin dzied byŭ u partyzanach usiu vajnu, a druhi — u kancłahiery. «Pieradaju hetyja viedy i dzieciam. Chaciełasia b, kab kožnaje dzicia, kožny školnik viedaŭ, jak jahonuju siamju zakranuła vajna», — skazaŭ jon.

Vaziŭ padarunki ŭciekačam z Ukrainy

Letaś pierad Novym hodam Siarhiej Bartaš naviedaŭ u Homieli ŭkrainskuju siamju, jakaja ŭciakła z Łuhanskaj vobłaści paśla pačatku poŭnamaštabnaj vajny va Ukrainie. Siamji z dvuma dziećmi vydzielili trochpakajovuju kvateru. Baćki, jak kazałasia, atrymali mahčymaść pracavać, a dzieci vučycca.

«Heta buduć užo našy dzietki», — skazaŭ Siarhiej Bartaš, pieradajučy dzieciam sałodkija padarunki i cacki.

• 1
• 0
• 4
• 1
• 0
• 4
• 4
• 0