Na vajskovych mohiłkach u Hrodnie praciahvajuć ramantavać staradaŭniuju kaplicu
U Hrodnie adramantujuć luteranskuju mahiłu-kaplicu hienierał-majora Alaksandra Rusau. Hetym razam tam adnoviać dekaratyŭnyja razietki i praviaduć restaŭracyju tynkoŭki. Kaplica — častka historyka-kulturnaj kaštoŭnaści vajskovych mohiłak na vulicy Biełuša, piša Hrodna Life.
Na ścienach kaplicy adpłastavałasia tynkoŭka, jość razbureńni admostki i bietonnaj asnovy. Taksama miescami razburany cahlany mur. Heta vyjaviła pry abśledavańni śpiecyjalnaja kamisija.
Tamu na abjekcie praviaduć ramont:
- adrestaŭrujuć cahlanyja sklapieńni sučasnymi materyjałami i vysakajakasnaj tynkoŭkaj;
- ustalujuć bartavyja bietonnyja kamiani;
- atynkujuć unutranyja pavierchni ścien i stoli;
- zrobiać hazon;
- adramantujuć dekaratyŭnyja razietki;
- adramantujuć prystupki i załadziać vyboiny;
- adrestaŭrujuć tynkoŭku vapnava-cemientnym rastvoram.
Hrodzienskaja haradskaja žyllova-kamunalnaja haspadarka pravodzić zapyt cenavych prapanoŭ. Raboty abyducca haradskomu biudžetu ŭ 26 248 rubloŭ. Pavodle płana raboty praviaduć z 4 vieraśnia pa 13 listapada 2023 hoda. Da hetaha sprabavali pravieści jašče adnu dziaržzakupku, ale jana nie adbyłasia.
Ramontam kaplicy ŭžo zajmalisia ŭ minułym hodzie: adnavili dach, kładkavyja švy i vadaściokavuju sistemu. Zrabili admostku pa pierymietry kaplicy, zamianili stračanyja cahliny na vuhłavych karnizach, zašklili zachavanyja mietaličnyja pieraploty voknaŭ, adrestaŭravali mietaličnyja dźviery.
U płanach było adnavić stračanyja kamiennyja kryžy z ružovaha hranitu i dekaratyŭnyja razietki ź piasčaniku. Ale, vierahodna, razietki zrabić u ramkach letašnich rabot nie paśpieli. Na ramont vydzielili hrošy ŭ ramkach dziaržprahramy «Kultura Biełarusi».
U śniežni minułaha hoda praviali dadatkovyja raboty.
Alaksandr Rusau — hienierał-major, luteranin, jaki ŭdzielničaŭ u Krymskaj vajnie, kiravaŭ padaŭleńniem sialanskich chvalavańniaŭ u Kijeŭskaj hubierni. Byŭ pryznačany pravadyrom dvaranstva Hrodzienskaha pavieta. Z 1892 hoda byŭ členam Hrodzienskaha paviatovaha adździaleńnia Litoŭskaj jeparchijalnaj navučalnaj rady.
Mahčyma, mienavita jon dapamoh hrodzienskim luteranam atrymać učastak na sučasnaj vulicy Biełuša pad mohiłki, jakija z časam zraślisia z susiednimi vajskovymi mohiłkami. Tam jon i byŭ pachavany, nad jaho mahiłaj uźviali kaplicu. Pabudova pieražyła saviecki čas, kali źniščyli luteranskuju častku mohiłak, a na častcy pachavańniaŭ zbudavali šmatpaviarchoŭku.
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary