На вайсковых могілках у Гродне працягваюць рамантаваць старадаўнюю капліцу
У Гродне адрамантуюць лютэранскую магілу-капліцу генерал-маёра Аляксандра Русау. Гэтым разам там адновяць дэкаратыўныя разеткі і правядуць рэстаўрацыю тынкоўкі. Капліца — частка гісторыка-культурнай каштоўнасці вайсковых могілак на вуліцы Белуша, піша Hrodna Life.
На сценах капліцы адпластавалася тынкоўка, ёсць разбурэнні адмосткі і бетоннай асновы. Таксама месцамі разбураны цагляны мур. Гэта выявіла пры абследаванні спецыяльная камісія.
Таму на аб’екце правядуць рамонт:
- адрэстаўруюць цагляныя скляпенні сучаснымі матэрыяламі і высакаякаснай тынкоўкай;
- усталююць бартавыя бетонныя камяні;
- атынкуюць унутраныя паверхні сцен і столі;
- зробяць газон;
- адрамантуюць дэкаратыўныя разеткі;
- адрамантуюць прыступкі і заладзяць выбоіны;
- адрэстаўруюць тынкоўку вапнава-цэментным растворам.
Гродзенская гарадская жыллёва-камунальная гаспадарка праводзіць запыт цэнавых прапаноў. Работы абыдуцца гарадскому бюджэту ў 26 248 рублёў. Паводле плана работы правядуць з 4 верасня па 13 лістапада 2023 года. Да гэтага спрабавалі правесці яшчэ адну дзяржзакупку, але яна не адбылася.
Рамонтам капліцы ўжо займаліся ў мінулым годзе: аднавілі дах, кладкавыя швы і вадасцёкавую сістэму. Зрабілі адмостку па перыметры капліцы, замянілі страчаныя цагліны на вуглавых карнізах, зашклілі захаваныя металічныя пераплёты вокнаў, адрэстаўравалі металічныя дзверы.
У планах было аднавіць страчаныя каменныя крыжы з ружовага граніту і дэкаратыўныя разеткі з пясчаніку. Але, верагодна, разеткі зрабіць у рамках леташніх работ не паспелі. На рамонт выдзелілі грошы ў рамках дзяржпраграмы «Культура Беларусі».
У снежні мінулага года правялі дадатковыя работы.
Аляксандр Русау — генерал-маёр, лютэранін, які ўдзельнічаў у Крымскай вайне, кіраваў падаўленнем сялянскіх хваляванняў у Кіеўскай губерні. Быў прызначаны правадыром дваранства Гродзенскага павета. З 1892 года быў членам Гродзенскага павятовага аддзялення Літоўскай епархіяльнай навучальнай рады.
Магчыма, менавіта ён дапамог гродзенскім лютэранам атрымаць участак на сучаснай вуліцы Белуша пад могілкі, якія з часам зрасліся з суседнімі вайсковымі могілкамі. Там ён і быў пахаваны, над яго магілай узвялі капліцу. Пабудова перажыла савецкі час, калі знішчылі лютэранскую частку могілак, а на частцы пахаванняў збудавалі шматпавярхоўку.
Цяпер чытаюць
Былога міліцыянера асудзілі за жаданне ваяваць у Палку Каліноўскага. Пагражала да 15 гадоў калоніі16
Каментары