Alesia Bialackaha ŭhanaravali pieršaj Premijaj zasłužanych vypusknikoŭ Centra Maršała
U niamieckim Harmiš-Partenkirchienie prajšło ŭručeńnie Premii zasłužanych vypusknikoŭ Centra Džordža Maršała. Pieršym łaŭreatam zasnavanaj sioleta premii staŭ palitźniavoleny pravaabaronca, kiraŭnik «Viasny» i nobieleŭski łaŭreat Aleś Bialacki, jaki ŭ 2000 hodzie byŭ słuchačom Centra.
Alesia na cyrymonii pradstaŭlała jahonaja žonka Natalla Pinčuk. U svajoj pramovie jana vykazała padziaku kiraŭnictvu Centra Maršała za hety akt salidarnaści z Alesiem Bialackim, a ŭ jaho abliččy — z usimi palityčnymi viaźniami Biełarusi, z usim biełaruskim narodam, jaki prahnie vyzvaleńnia ad pramaskoŭskaj dyktatury, piša Radyjo Svaboda.
«Aleś svoj vybar zrabiŭ ad pačatku śviadomaha žyćcia — jašče ŭ antykamunistyčnym padpolli rańnich 1980-ch hadoŭ jon zmahaŭsia za svabodu i niezaležnaść Biełarusi. Aleś pierakanany, što naša kraina histaryčna naležyć da jeŭrapiejskaha i jeŭraatłantyčnaha svabodnaha śvietu i musić u jaho viarnucca. Niahledziačy na toje, što jaje adtul hvałtam vyryvaje susiedniaja impieryja, jak by jana ni nazyvałasia — to rasijskaja, to savieckaja, to pucinskaja. I ja vielmi spadziajusia, što vierać u biełarusaŭ i našyja siabry na Zachadzie. Što jany adroźnivajuć biełaruski narod ad režymu, jaki trymajecca ciapier na rasijskich štykach i padačkach, zdaje suvierenitet Biełarusi dziela samazachavańnia», — zajaviła Natalla Pinčuk.
Natalla patrabuje vyzvaleńnia ź viaźnicy Alesia Bialackaha, i razam ź im «biezumoŭna i nieadkładna musiać być vyzvalenyja tysiačy inšych advažnych biełaruskich mužčyn i žančyn, kinutych za kraty za žadańnie bačyć svaju krainu volnaj ad dyktatury i rasijskaha paniavoleńnia. Čas prośbaŭ i namiokaŭ daŭno prajšoŭ. Heta musić być ultymatum, bo ŭviaźnieńnie moža abiarnucca dla kožnaha śmierciu za murami».
Alesia Bialackaha zatrymali 14 lipienia 2021 hodam z paplečnikami: Valancinam Stefanovičam i Uładziem Łabkovičam. 3 sakavika 2023 hoda Bialackaha asudzili na 10 hadoŭ kałonii.
Ciapier čytajuć
Lehiendarnaja žurnalistka Luboŭ Łuniova raskazała pra Viktara Łukašenku i adnakurśnikaŭ, stvareńnie «Viasny» i palityčny bamond8
Kamientary