Bramniki ŭsprymajuć śviet pa-inšamu — navukoŭcy

Jak piša The Gardian, daśledčyki Dublinskaha haradskoha ŭniviersiteta i Univiersiteckaha kaledža Dublina dla praviadzieńnia sieryi testaŭ nabrali 60 čałaviek, jakija byli padzielenyja na try hrupy: prafiesijnych bramnikaŭ, palavych hulcoŭ i tych, chto prafiesijna nie zajmajecca sportam.

Hałoŭnaj zadačaj navukoŭcaŭ było vyvučeńnie zdolnaści ŭdzielnikaŭ daśledavańnia adroźnivać huki i vizualnyja stymuły jak asobnyja padziei ci jak častki adnoj padziei. Dla hetaha aceńvalisia časavyja vokny pryviazki (temporal binding windows) — intervały času, na praciahu jakoha roznyja sensarnyja sihnały abjadnoŭvajucca ŭ mozhu.

Vyniki daśledavańnia, apublikavanyja ŭ časopisie Current Biology, pakazali, što ŭ hałkipieraŭ časavyja vokny pryviazki bolš karotkija, čym u pradstaŭnikoŭ dźviuch astatnich hrup. U toj ža čas u ich nazirałasia źnižeńnie stupieni aŭdyjavizualnaj intehracyi.

Takim čynam, hałkipiery prademanstravali najlepšuju aŭdyjavizualnuju acenku i prajavili tendencyju da padziełu sensarnych sihnałaŭ u paraŭnańni ź dźviuma astatnimi hrupami. Heta moža być źviazana ź nieabchodnaściu prymać chutkija rašeńni na asnovie niapoŭnaj ci častkova viadomaj infarmacyi.

Jak adznačyŭ kiraŭnik daśledavańnia psichołah Devid Mak-Hoviern (David McGovern), «być hałkipieram — heta šmat u čym multysensarnaja prafiesija. Jana patrabuje nie tolki dobrych zdolnaściaŭ usprymać jak vizualnuju infarmacyju, tak i słychavuju. U niekatorych vypadkach bramniki naohuł nie bačać miača, i im prosta treba ŭličvać huk udaru miača, kab lepš zrazumieć, dzie jon moža apynucca».

Navukoŭcy śćviardžajuć, što bramniki apracoŭvajuć infarmacyju inakš, čym inšyja hulcy ci prostyja ludzi. Praź nieabchodnaść chutka prymać rašeńni, jany nie intehrujuć źviestki, atrymanyja ad roznych orhanaŭ pačućciaŭ, a kirujucca infarmacyjaj ad taho orhana, jaki daje im jaje chutčej za astatnija.

Mak-Hoviern adznačaje: «Choć mnohim futbalistam i zaŭziataram va ŭsim śviecie znajomaja ideja ab tym, što hałkipiery «adroźnivajucca» ad usich nas, hetaje daśledavańnie — pieršy vypadak, kali my atrymali navukovyja dokazy hetaha».

Aŭtary adznačajuć, što ich vysnova ab tym, što prafiesijnyja bramniki demanstrujuć vuziejšaje časavaje akno pryviazki ŭ paraŭnańni ź dźviuma inšymi hrupami, paćviardžajecca papiarednimi daśledavańniami, jakija pakazvajuć, što ludzi, jakija časta intehrujuć niekalki sensarnych sihnałaŭ, naprykład, muzyki i hulcy ŭ videahulni, demanstrujuć bolš dakładnuju multysensarnuju časavuju apracoŭku.

Adnak niavyrašanym zastajecca važnaje pytańnie ab tym, ci vynikaje heta multysensarnaja pieravaha z naboru navykaŭ, jaki raniej u ich byŭ i dazvoliŭ stać bramnikami, ci heta vynik pierceptyŭnaha navučańnia, z dapamohaj jakoha šmatrazovaje ŭździejańnie aŭdyjavizualnych stymułaŭ z časam palepšyła ich multysensarnuju časavuju apracoŭku. Kab heta vyznačyć, nieabchodnyja daśledavańni praktyki padrychtoŭki bramnikaŭ-pačatkoŭcaŭ.

Čytajcie jašče:

Udar hałavoju? Byłyja futbalisty-prafiesijanały majuć značna bolšuju ryzyku raźvićcia demiencyi

U śpis samych pierśpiektyŭnych hulcoŭ śvietu ŭvajšli dva biełaruskija futbalisty

Padčas tavaryskaj hulni pabilisia futbalisty dvuch biełaruskich kłubaŭ

• 4
• 0
• 1
• 1
• 1
• 0
• 0
• 0