U Arhiencinie ŭ druhi tur prezidenckich vybaraŭ vyjšaŭ kandydat, jaki vioŭ ahitacyju pieravažna ŭ tyktoku

Paśla padliku bolšaści hałasoŭ na prezidenckich vybarach u Arhiencinie ultrapravy kandydat Chaŭjer Milej, jaki pryciahvaŭ da siabie šmat uvahi, sastupaje ministru ekanomiki Sierchia Masa. Ni toj ni inšy, adnak, nie atrymali absalutnaj bolšaści, tamu jany sustrenucca ŭ druhim tury praz čatyry tydni, piša Bi-bi-si.

U vyniku padliku amal 90% biuleteniaŭ Masa lidziruje z vynikam bolš za 36%. Milej pakul nabiraje krychu bolš za 30%. Treciaja kandydatka, kansiervatar Patrysija Bułryč, vybyvaje z honki z 23,8% hałasoŭ.

Dla pieramohi ŭ pieršym tury kandydat pavinien nabrać bolš za 45% hałasoŭ albo 40%, ale pry ŭmovie, što jon apiaredžvaje najbližejšaha supiernika nie mienš čym na 10 pracentnych punktaŭ.

Druhi tur pavinien prajści 19 listapada. 

Apytańni da vybaraŭ pakazvali na pieramohu Mileja, ale ŭ Arhiencinie jany viadomyja svajoj niedakładnaściu. U pryvatnaści, kali Milej pieramoh na prajmieryz u žniŭni, apytańni hetaha nie pradkazvali.

Milej vioŭ ahitacyju pieravažna praz tyktok i zrabiŭ niekalki hučnych zajaŭ.

Tak, na adnym ź mitynhaŭ jon źjaviŭsia ź bienzapiłoj: heta byŭ simvał «adrazańnia» dziaržaŭnych vydatkaŭ, kab azdaravić ekanomiku krainy. Taksama jon prapanavaŭ admovicca ad piesa i pierajści na amierykanski dalar, kab pieramahčy inflacyju. Inflacyja ŭ krainie składaje 140%.

Taksama Milej admaŭlaje vialikuju kolkaść achviar vajskovaj dyktatury ŭ 1976—1983 hadach, choć viadoma, što tady źnikła 30 tys. čałaviek. Jon śćviardžaje, što heta kolkaść kudy mienšaja — 8 753 (takuju ličbu nazyvała sama chunta).

U 1990-ja Milej, darečy, ihraŭ u rok-hrupie, jakaja vykonvała pieravažna kaviery «Rolinh Stoŭnz». 

Napiaredadni vybaraŭ ścieny i rekłamnyja ščyty byli zaviešanyja płakatami z uśmiešlivymi kandydatami. Ale ni na adnym ź ich nie było tvaru Chaŭjera Mileja.

Milej vioŭ kampaniju pry dapamozie cełaj armii influensieraŭ, jakija viaduć ahitacyju ŭ asnoŭnym praz tyktok.

22-hadovy Ińjaki Hutjeres źviarnuŭsia da Chaŭjera Mileja i pierakanaŭ jaho, što kandydatu treba aktyŭna pracavać u sacyjalnych sietkach. Z tych časoŭ Ińjaki i jaho dziaŭčyna ŭznačalili kampaniju ŭ tyktoku i zdabyli vielizarnuju bazu fałovieraŭ.

«Bolš nie patrebnyja hruvastkija struktury, kab zajmacca palitykaj. [Dla praviadzieńnia kampanii] nie treba jeździć pa roznych haradach — z dapamohaj telefona možna za niekalki hadzin vyjści na suviaź z usioj krainaj i pahutaryć z usimi», — kazaŭ Ińjaki.

Praŭda, Milej źbiraŭ i šmattysiačnyja mitynhi i afłajn. Ludzi vystojvali šmat hadzin u čarzie, kab trapić na mitynh.

«Prychilnikaŭ Mileja možna znajści na ŭsich sacyjalna-ekanamičnych uzroŭniach», — ličyć palitołah Ana Iparahire.

Adnak pakul Milej druhi.

Dziŭny nie tolki jaho vynik, ale i toj fakt, što pieršaje miesca ŭ pieršym tury zaniaŭ ministr ekanomiki — heta ŭ krainie, dzie inflacyja ciapier składaje 140%.

U hetyja čatyry tydni da druhoha tura Arhiencinu čakaje vialikaja niavyznačanaść. I chto b ni pieramoh, jamu treba budzie raźbiracca ź ciažkaj ekanamičnaj situacyjaj, jakaja nastrojvaje arhiencincaŭ suprać ciapierašniaha palityčnaha isteblišmientu.

• 2
• 0
• 0
• 0
• 1
• 0
• 0
• 0