U Rasii mužčyna, jakoha asudzili na 20 hadoŭ za zhvałtavańnie i zabojstva, atrymaŭ pamiłavańnie za ŭdzieł u vajnie z Ukrainaj
U žniŭni 2022 hoda ŭ Čusavym (Piermski kraj, Rasija) źnikła 23-hadovaja miedsiastra Taćciana Rakucina. Jaje cieła znajšli na ŭskrainie horada, pobač lažaŭ akryvaŭleny kamień. Padazravanaha ŭ zabojstvie zatrymali praź niekalki dzion, im akazaŭsia miascovy žychar Arciom Bučyn, piša 59.ru.
U lutym hetaha hoda sud prysudziŭ jaho da 20 hadoŭ kałonii, choć prakuror prasiŭ ab pažyćciovym. Nie adsiedzieŭšy i hoda, Bučyn staŭ udzielnikam PVK «Vahnier» i źjechaŭ na vajnu suprać Ukrainy. Ciapier mužčyna atrymaŭ pamiłavańnie.
Byłaja sužycielka abvinavačanaha raspaviadała, što Bučyn pryjšoŭ da jaje i va ŭsim pryznaŭsia. Pavodle jaho słoŭ, ranicaj jon sustreŭ dziaŭčynu na vulicy, jana paprasiła jaho pakazać prypynak transpartu, i jon pavioŭ jaje praź lesapałasu. Dziaŭčynie heta zdałosia padazronym, i jana ŭdaryła jaho torbaj. Sa słoŭ byłoj sužycielki, paśla armii ŭ Bučyna była kantuzija, jon razzłavaŭsia i zadušyŭ Taćcianu. Adnak, pa viersii śledstva, pierad zabojstvam Bučyn zhvałciŭ dziaŭčynu i potym udaryŭ kamieniem pa hałavie, Taćciana zahinuła ad traŭmaŭ. U dziaŭčyny zastałosia maleńkaje dzicia.
Sud pryznaŭ Arcioma Bučyna vinavatym pavodle troch artykułaŭ. Prysud abviaścili ŭ lutym 2023 hoda: Bučynu dali 20 hadoŭ kałonii strohaha režymu i abaviazali vypłacić pazovy maci i baćku zabitaj u pamiery dva miljony rubloŭ (25 tysiač dalaraŭ). Jon padavaŭ apielacyju, ale vierdykt suda pakinuli raniejšym. Pakarańnie Bučyn adbyvaŭ u kałonii № 9 Salikamska.
Niekalki dzion tamu Bučyn viarnuŭsia ŭ Čusavaje z ranieńniem, jon znachodzicca na voli. Na vajnu jon syšoŭ u žniŭni hetaha hoda.
Krynica 59.ru ŭ palicyi paćvierdziła, što Bučyn atrymaŭ pamiłavańnie, bo byŭ udzielnikam vajny.
Taksama maci Taćciany Rakucinaj raspaviała, što ad Bučyna spynilisia vypłaty pa pazovach.
— Apošniaja vypłata ad jaho była ŭ vieraśni hetaha hoda — 13 700 rubloŭ (150 dalaraŭ), — adznačyła surazmoŭca. — Pavodle majoj infarmacyi, jon źjechaŭ na vajnu 21 žniŭnia. Heta značyć, try miesiacy ja sprabavała daviedacca, u jakoj kałonii jon znachodzicca, adpraŭlała zapyty ŭ sud, prakuraturu. Doŭha maŭčali, a potym u vieraśni mnie pastupiŭ zvanok z suda, mnie prosta vusna paviedamili, što jon 21 žniŭnia padpisaŭ kantrakt i znachodzicca va Ukrainie. Tak ja daviedałasia pra heta.
Kamientary