Pucin aktyŭna šukaŭ sustrečy ź miljarderam, jaki stvaraje sistemy biaśpieki dla śpiecsłužb i armii ZŠA
Pra heta raspavioŭ sam miljarder, bo źjaŭlaŭsia tajemnym infarmataram amierykanskich śpiecsłužb. Pa jaho słovach, Pucin dvojčy zaprašaŭ jaho na asabistuju sustreču praz rasijskaha ataše ŭ Bierlinie.
Suzasnavalnik płaciežnaj sistemy PayPal i bujnoha raspracoŭščyka prahramnaha zabieśpiačeńnia Palantir Technologies miljarder Piter Cil raspavioŭ FBR pra sproby Uładzimira Pucina zładzić ź im asabistuju sustreču ŭ Rasii, piša vydańnie The Business Insider.
Piter Cil staŭ tajemnym infarmataram FBR pad kodavym imiem «Fiłosaf» paśla pieršaha zaprašeńnia Pucina ŭ 2018 hodzie, jakoje było pieradadziena jamu praz ataše rasijskaj ambasady ŭ Bierlinie Daniiła Biślinhiera.
Tady miljarder i rasijski dypłamat sustrelisia na śviatkavańni dnia naradžeńnia niamieckaha biznesmiena Kryścijana Anhiermajera, jaki i paznajomiŭ Cila ź Biślinhieram.
«Anhienmajer, na momant 2018 hoda prychilnik Trampa i Pucina, zaprasiŭ Cila i Biślinhiera na svajo 40-hodździe, dzie i paznajomiŭ ich. Biślinhier byŭ pradstaŭleny ŭ jakaści supracoŭnika rasijskaha MZS i asabistaha pierakładčyka Pucina. Dypłamat zaprasiŭ Cila na Pieciarburhski mižnarodny ekanamičny forum dla pryvatnaj sustrečy z rasijskim prezidentam, ale miljarder admoviŭsia», — pieradaje The Business Insider sa spasyłkaj na Pitera Cila.
Advakaty i pres-sakratary Kryścijana Anhienmajera, adkazvajučy na zapyty ŚMI, spačatku kazali, što niamiecki pradprymalnik u 2018 nie znajomiŭ Cila ź Biślinhieram. Potym jany kazali, što Anhienmajer nie pamiataje momantu znajomstva, ale ŭ vyniku ŭ kamientarach The Business Insider usio ž pryznali fakt pasiarednictva Anhienmajera pry znajomstvie amierykanskaha miljardera i rasijskaha ataše.
Ale na hetym usio nie skončyłasia. Užo paśla taho, jak miljarder staŭ infarmataram FBR, jaho znoŭ zaprasili na sustreču z Pucinym. Heta było ŭ studzieni 2022 hoda napiaredadni rasijskaha vajennaha ŭvarvańnia va Ukrainu.
Zaprašeńnie było pieradadziena ŭsio tym ža Daniiłam Biślinhieram. Adnak Cil jaho praihnaravaŭ.
Čamu ŭvohule Pucin moh zacikavicca Piteram Cilem? Vydańnie The Business Insider źviartaje ŭvahu na toj fakt, što Cil źjaŭlajecca zasnavalnikam kampanii Palantir, jakaja raspracoŭvaje śpiecyjalnyja štučnyja intelekty i inšyja sistemy biaśpieki amal dla ŭsiaho abaronnaha i siłavoha siektara ZŠA.
Pastajannymi klijentami Palantir źjaŭlajucca CRU, ANB, FBR, Pientahon i Siły śpiecyjalnych apieracyj ZŠA. Akramia taho Cil byŭ u radzie dyrektaraŭ Facebook i PayPal, aktyŭna inviestavaŭ u kaśmičnuju kampaniju SpaceX i ŭ abaronnaje pradpryjemstva Anduril.
Siabroŭstva z takim čałaviekam dało b Pucinu kluč da sistem biaśpieki i Silikonavaj daliny Złučanych Štataŭ, tłumačyć vydańnie.
U dadatak da hetaha Piter Cil maje šyrokija suviazi z kansiervatyŭnymi palitykami Jeŭrasajuza i ŭ minułym byŭ adnym z najbujniejšych inviestaraŭ prezidenckaj kampanii Donalda Trampa ŭ 2016 hodzie. Heta jašče adzin punkt, dziakujučy jakomu Pucin chacieŭ sustrecca i pasiabravać ź miljarderam.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary