U biełaruskim Mintransie raskazali, čamu nie kuplajuć rasijskich samalotaŭ
Ministr transpartu i kamunikacyj Alaksiej Lachnovič 18 listapada ŭ efiry dziaržtelekanała «Biełaruś 1» zajaviŭ, što jaho viedamstva chacieła b kupić rasijski samalot dla pasažyrskich pieravozak. Ale dla realizacyi žadańnia jość abjektyŭnaja pieraškoda.
«Na žal, pakul my nie možam jaho nabyć pa zrazumiełych pryčynach — na rynku niama čysta rasijskaha samalota, — pryznaŭsia Lachnovič. — Tamu pracujem z rasijskim bokam, kab nas trochi pasunuli pa terminach, kali źjavicca hety samalot. Chutčej za ŭsio, heta budzie paśla 2026 hoda».
Raniej hienieralny dyrektar avijakampanii «Biełavija» Ihar Čarhiniec taksama zajaŭlaŭ, što płanuje kuplu rasijskich samalotaŭ, ale pakul što kuplać niama čaho.
«MS-21 i Sukhoi Superjet New — čakajem, kali Rasijskaja Fiederacyja vyrabić hetyja samaloty. Jany častkova ŭžo vypraboŭvajucca, z roznymi ruchavikami. Samaloty jašče nie hatovyja, ale ŭ 2024-2026 hadach pavinny stać na kryło i pajści ŭ kamiercyjnuju ekspłuatacyju», — zajaviŭ Ihar Čarhiniec.
Kamientary