Rasija zajaviła pra zachop ruin Marjinki. Jakoje vajennaje značeńnie maje hety haradok
Ukraina aficyjna zajaŭlaje, što heta nie tak.
Ministr abarony Rasii Siarhiej Šajhu ŭ paniadziełak na sustrečy z prezidentam Uładzimiram Pucinym adrapartavaŭ ab pierachodzie horada Marjinka, prylehłaha da Daniecka, pad poŭny kantrol rasijskich vojskaŭ. Ukraina aficyjna zajaŭlaje, što heta nie tak, piša Bi-bi-si.
Jak pieradali rasijskija dziaržaŭnyja ahienctvy, Šajhu skazaŭ, što rasijskija vojski, zaniaŭšy Marjinku, «davoli istotna adsunuli pracu artyleryi [USU] ad Daniecka [ … ], i heta dazvalaje siońnia bolš efiektyŭna abaraniać Danieck ad naniasieńnia ŭdaraŭ».
Marjinka, raźmieščanaja zusim pobač z Danieckam, na paŭdniovy zachad ad jaho, stała ŭkrainskim umacavanym rajonam i zonaj bajavych dziejańniaŭ jašče ŭ 2014 hodzie, kali Rasija i jaje pamahatyja va Ukrainie raźviazali vajnu na Danbasie.
Ukrainskija vajskoŭcy aficyjna adkidajuć śćviardžeńni praciŭnika, što toj vycieśniŭ ich z Marjinki.
«Bai za Marjinku praciahvajucca. Ciapier našy vajskoŭcy znachodziacca ŭ administracyjnych miežach Marjinki», — skazaŭ u efiry telemarafona ŭkrainskich kanałaŭ pres-ataše Abjadnanaha pres-centra Sił abarony Taŭryckaha kirunku Alaksandr Štupun.
«Horad całkam źniščany. Ale kazać ab poŭnym zachopie Marjinki niekarektna», — dadaŭ Štupun.
Błohiery paćviardžajuć vychad na miažu horada.
U lubym vypadku, sprečki ab poŭnym ci nie poŭnym uziaćci Marjinki — heta sprečki ab kantroli nad sotniaj-druhoj mietraŭ sucelnych ruin.
Z adnaho boku, zachop rasijskimi vojskami Marjinki — nievialikaje nabyćcio. Haradok na zachad ad Daniecka, jaki da 2014 hoda naličvaŭ kala 10 tysiač žycharoŭ, ciapier razburany praktyčna daščentu. Jašče letam ukrainskija bajcy raspaviadali, što abaraniacca tam ciažka, bo nie zastałosia nivodnaha narmalnaha schovišča.
Ź inšaha boku, u vypadku z Marjinkaj armii Šajhu dastalisia nie tolki ruiny, ale i pole dla manieŭru.
Pierš za ŭsio, jana atrymlivaje mahčymaść atakavać z boku Marjinki inšy aporny punkt USU — raźmieščanuju na poŭdzień Novamichajłaŭku, a ŭ vypadku pośpiechu razharnuć nastup pa fłanhach na ŭkrainski płacdarm u rajonie Vuhladara.
Pakolki bai za Novamichajłaŭku ŭžo pačalisia, možna ličyć, što rasijskaje kamandavańnie prystupiła da realizacyi hetaj zadumy.
Dla USU vuhladarski płacdarm maje vialikaje apieratyŭnaje značeńnie, i vidavočna, što zdavać navat podstupy da jaho jany nie majuć namieru.
Inšym imaviernym napramkam prasoŭvańnia rasijskich vojskaŭ moža stać trasa N15, jakaja viadzie na zachad da horada Kurachava.
Adnak kamandavańnie USU zajaŭlaje, što śćviardžeńni ab poŭnym uziaćci Marjinki niekarektnyja, ukrainskija vajskoŭcy pa-raniejšamu znachodziacca ŭ jaje administracyjnych miežach, paviedamlałasia i ab budaŭnictvie novych umacavańniaŭ na zachad ad horada. Na chutki praryŭ na hetym kirunku raźličvać ciažka.
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie19
Kamientary