Adzin z najstarejšych biełaruskich palitviaźniaŭ adznačaje siońnia dzień narodzinaŭ. Jaho asudzili na dzieviać hadoŭ
Siońnia svoj 74-y dzień narodzinaŭ adznačaje palitźniavoleny lidar aršanskaha niezaležnaha prafsajuzu Radyjoelektronnaj pramysłovaści Vasil Bieraśnieŭ — adzin z najstarejšych palitviaźniaŭ Biełarusi. Padčas źniavoleńnia ŭ jaho mocna abvastrylisia prablemy sa zdaroŭjem — jon pakutuje ad bolaŭ u adzinaj nyrcy.
Raniej u svoj dzień narodzinaŭ spadar Vasil haścinna źbiraŭ u siabie adnadumcaŭ i kalehaŭ pa hramadskaj dziejnaści na Aršanščynie. Ciapier jon adbyvaje dzieviacihadovy termin za prafsajuznuju dziejnaść u papraŭčaj kałonii № 15 u Viejnie pad Mahilovam, piša «Viasna».
Šlach ad nastaŭnika historyi da prafsajuznaha aktyvista
Paśla skančeńnia histaryčnaha fakulteta BDU Vasil nastaŭničaŭ, zatym kiravaŭ ahrarnym vučyliščam u Vysokim na Bieraściejščynie i za niadoŭhi čas vyvieŭ jaho na vysoki abłasny ŭzrovień.
Napačatku 90-ch hadoŭ, u hady demakratyčnaha ŭzdymu ŭ Biełarusi, byŭ abrany deputatam Aršanskaha rajsavieta, a zatym i jaho staršynioj. Paśla prychodu da ŭłady Alaksandra Łukašenki syjšoŭ z pasady staršyni i pačaŭ cikavicca hramadskaj dziejnaściu. Nieŭzabavie dałučyŭsia da Biełaruskaha Chielsinskaha kamiteta, a praź niekatory čas staŭ siabram sacyjał-demakratyčnaj partyi. Pry hetym, Vasil amal da samaj piensii vykładaŭ historyju ŭ viaskovych škołach.
Vasil Bieraśnieŭ adzin ź pieršych zajmieŭ u Oršy svoj publičny ofis, jakim časta karystalisia mnohija hramadskija arhanizacyi i inicyjatyvy.
«Budziem źbiracca ŭ Bieraśnieva», — tak niaredka kazali miascovyja aktyvisty adzin adnamu.
Vasila za jaho hramadskuju dziejnaść nieadnarazova zatrymlivali i administracyjna aryštoŭvali. Padčas «Maršu niedarmajedaŭ» u 2017 hodzie ŭ Oršy jon na prystupkach vykankama razarvaŭ mulaž na temu antydarmajedskaha dekreta.
Paśla vybaraŭ 2010 hoda Vasil dałučyŭsia da prafsajuzu REP, aršanskaja struktura prafsajuzu chutka stała adnoj z samych bujnych u Biełarusi ź nievialikimi pradstaŭnictvami ŭ Kruhłym i Bahušeŭsku. Praź niekatory čas jon staŭ namieśnikam staršyni respublikanskaha prafsajuzu REP. Mienavita jahonaja prafsajuznaja dziejnaść i pasłužyła padstavaj dla kryminalnaha pieraśledu paśla vybarčych akcyj.
Zakryty sud i vialikija terminy pa spravie niezaležnych prafsajuzaŭ
Vasila Bieraśnieva zatrymali 19 krasavika 2022 hoda ŭ miežach kryminalnaj spravy suprać aktyvistaŭ niezaležnych prafsajuzaŭ.
5 studzienia 2023 hoda Anastasija Papko abvinavaciła troch prafsajuznych aktyvistaŭ — Vasila Bieraśnieva, Hienadzia Fiadyniča i Vacłava Arešku — u «zaklikach da sankcyj» (č. 3 art. 361 KK), «raspalvańni inšaj sacyjalnaj varožaści» (č. 3 art. 130 KK), «stvareńni ekstremisckaha farmavańnia albo ŭdziele ŭ im» (č. 1 i č. 3 art. 361-1 KK). Vasilu pryznačyli dzieviać hadoŭ pazbaŭleńnia voli va ŭmovach uzmocnienaha režymu.
Prablemy za zdaroŭjem u źniavoleńni
U pačatku kastryčnika minułaha hoda stała viadoma, što Vasila terminova nakiravali z kałonii ŭ Mahiloŭski abłasny špital. Jašče padčas znachodžańnia ŭ SIZA ŭ Vasila značna pahoršyŭsia stan zdaroŭja — jon pakutuje ad bolaŭ u adzinaj nyrcy. Adnak situacyja nastolki krytyčnaja, što miedykamientoznaje lačeńnie nie maje sensu. Patrebna pierasadka nyrki. Na šmatlikija prośby i zajavy viaźnia ab akazańni miedyčnaj dapamohi, albo nakiravańni na abśledavańnie — doŭhi čas reakcyi nie było. Na fonie prablem sa zdaroŭjem značna pavysiŭsia cisk i zaraz nieabchodna štodnia prymać adpaviednyja leki.
Pa źviestkach ad kaleh Vasilu nyrku tak i nie pierasadzili. Ciaham dvuch dzion jaho abśledavali ŭ špitali, ale vynikaŭ nie paviedamili. Skazali, što atrymaje ich potym, u kałonii. Jak pačuvajecca ciapier Vasil, — nieviadoma.
Padtrymajcie palitviaźnia telehramaj: PK № 15. 213105, h. Mahiloŭ, p/a Viejna, Słaŭharadskaja šaša, 183. Vasil Cichanavič Bieraśnieŭ
Ciapier čytajuć
Načalnik kryminalnaha vyšuku MUS bačyŭ prahułačny dvoryk SIZA KDB z akna svajho kabinieta, a potym sam staŭ viaźniem6
Kamientary