Jakija aŭdyjaknihi słuchajuć biełarusy? Najpapularnaje z Audiobooks.by

Na hety momant na sajcie sabranyja spasyłki na 585 knih z sajtaŭ «Knižny Voz», «Biełaruskaja palička», «Kamunikat», «Radyjo Svaboda», «Biełaruski PEN-centr», «Mininfarm Respubliki Biełaruś», a taksama va ŭłasnym ahučvańni. Na sajcie jość aŭdyjaknihi pa tvorach kłasikaŭ, sučasnych aŭtaraŭ, a taksama aŭdyjaknihi dla dziaciej, tamu kožny zmoža znajści niešta na svoj hust.

Pavialičyć

Siarod knih, ahučanych samim prajektam pa-biełarusku i vykładzienych biaspłatna, niečakana pa prasłuchoŭvańniach lidziruje kniha «Karotkaja historyja Biełarusi» Alesia Kraŭceviča. U joj na praciahu 2 hadzin hołasam Uładzimira Lisoŭskaha raspaviadajecca historyja biełaruskaj ziamli ad źjaŭleńnia słavian u V-VI stst. da abviaščeńnia niezaležnaści ŭ 1991 h. Najvažniejšyja źjavy i padziei biełaruskaj historyi pierakazanyja litaraturnaj movaj u łahičnaj sistemnaj i chranałahičnaj paśladoŭnaści.

A voś na druhim miescy čakana akazałasia viečnaja kłasika — pryhodnickaja apovieść «Dzikaje palavańnie karala Stacha» Uładzimira Karatkieviča, ahučanaja kupałaŭcam Aleham Harbuzam. Hałoŭny hieroj vypadkova stanovicca śviedkam złaviesnaha pryvidu dzikaha palavańnia z dalokaha minułaha, jaki trymaje ŭ strachu ludziej.

Pavialičyć

Zamykaje trojku biaspłatnych knih niaskončanaja apovieść Vasila Bykava «Blindaž», napisanaja ŭ 1987 hodzie. Upieršyniu jana była apublikavanaja ŭ 2006 hodzie na staronkach časopisa «Dziejasłoŭ», a vydadzienaja ŭ 2007-m u Biblijatečcy taho ž časopisa. Kniha ahučanaja Iharam Dzianisavym i vydadziena Mižnarodnym sajuzam biełaruskich piśmieńnikaŭ.

Siarod płatnych biełaruskich knih pieršaje miesca pa prasłuchoŭvańniach zajmaje kniha «Maja škoła» Hanny Sieviaryniec, u jakoj apovied viadziecca ad imia «rusicy» ź siaredniaj škoły ŭ vydumanym horadzie. 

Pavialičyć

Trymajecca ŭ lidarach i «Apošniaja kniha pana A.» Alhierda Bachareviča. Jana składajecca z 30 kazak, jakija raspaviadaje kupcu-vydaŭcu piśmieńnik, što trapiŭ u doŭh. Kniha była vydadziena ŭ revalucyjnym 2020 hodzie i ŭžo letaś uniesiena režymam Łukašenki ŭ śpis ekstremisckich materyjałaŭ.

Treciaje miesca siarod płatnych aŭdyjaknih zdabyŭ jašče adzin tvor Sieviaryniec — raman «Dzień Śviatoha Patryka», vydadzieny ŭ 2018 hodzie ŭ vydaviectvie «Januškievič». Kniha raspaviadaje pra Marynu Damiejku, ekśpiertku mižnarodnaj moŭnaj kamisii, jakaja prymaje rašeńnie pryznać biełaruskuju movu miortvaj. Jana sutykajecca z prablemaj, što zachavać ź biełaruskaha mastactva ŭ śpiecyjalnym archivie, a što nazaŭždy vykinuć.

Jak pryznajucca sami stvaralniki sajta, biełarusy vielmi mała kuplajuć knih. Najbolš ich nabyvajuć biełarusy zamiežža — z ZŠA, Polščy i Kanady, tolki paśla iduć biełarusy ŭ Biełarusi. 

Heta tłumačycca ŭ pieršuju čarhu niedastupnaściu ŭ krainie takich šyrokaviadomych płatnych servisaŭ, jak Google Play Books, Spotify, Apple. Da taho ž u pačatku hetaha hoda Ministerstva infarmacyi abmiežavała dostup da sajta ź Biełarusi, a płacić za niekatoryja tvory, pryznanyja ekstremisckimi, paprostu niebiaśpiečna. 

Stvaralniki sajta adznačajuć, što hetuju situacyju treba niejak vypraŭlać, bo ŭsio ž bolšaść biełarusaŭ zastajecca na Radzimie.

Pavialičyć

Što cikava, najbolš papularnymi aŭdyjaknihami na sajcie akazalisia zusim nie biełaruskamoŭnyja tvory, a ruskamoŭnyja. Heta dva kursy Latučaha ŭniviersiteta «PR: jak budavać kamunikacyju ŭ publičnaj prastory» Iryny Sidorskaj i «Sučasnaja miedyja-prastora. Jak trapić u svaju aŭdytoryju» Haliny Mališeŭskaj. Hetyja knihi nijak admysłova nie rekłamavali pa-za biełaruskimi kanałami, ale kolkaść ich spampovak u 2-3 razy bolšaja za biełaruskamoŭnyja knihi. Bolšaść spampovak prypadaje na Rasiju.

• 10
• 0
• 1
• 0
• 2
• 1
• 1
• 0