Pamior samy stary mužčyna ŭ śviecie. Jon pražyŭ amal 115 hadoŭ, štodnia vypivajučy kielich brendzi
Razam z tym mužčyna dobra charčavaŭsia, maliŭsia, piŭ vadu i rana kłaŭsia spać.
Žychar Vieniesueły Chuan Visente Pieres Mora pamior va ŭzroście 114 hadoŭ i 339 dzion niezadoŭha da svajho 115-hodździa z-za reśpiratornych uskładnieńniaŭ, piša El National.
4 lutaha 2022 hoda Pieres Mora byŭ uniesieny ŭ Knihu rekordaŭ Hiniesa jak samy stary mužčyna ŭ śviecie va ŭzroście 112 hadoŭ i 253 dzion, abahnaŭšy ispanca Saturnina de ła Fuente Harsiju, jaki pamior va ŭzroście 112 hadoŭ.
Pieres Mora tłumačyŭ svajo daŭhalećcie «pastajannaj pracaj, paŭnavartasnym adpačynkam, rańnim snom i štodzionnym užyvańniem kielicha brendzi». Taksama mužčyna dobra charčavaŭsia, maliŭsia, piŭ vadu i rana kłaŭsia spać.
Pieres Mora naradziŭsia 27 maja 1909 hoda ŭ horadzie El-Kobre ŭ Vieniesuele i byŭ 9-m z 10 dziaciej. U samoha doŭhažychara 11 dziaciej.
Paśla śmierci Pieresa Mory najstarejšym žyvym mužčynam u śviecie moh by stać japoniec Hisabura Sanobe, jaki naradziŭsia 6 listapada 1911 hoda. Ale jon pamior na try dni raniej za vieniesuelca, 31 sakavika 2024 hoda, va ŭzroście 112 hadoŭ i 146 dzion. Tamu najstarejšy mužčyna ŭ śviecie ciapier brytaniec Džon Tynisvud, narodžany 26 žniŭnia 1912 hoda, to-bok jamu 111 hadoŭ i 220 dzion.
Śpis ža ŭsich najstarejšych ludziej śvietu na hety momant uznačalvaje ispanka Maryja Brańjas Marera, jakoj 117 hadoŭ i 30 dzion (naradziłasia 4 sakavika 1907 hoda).
Niabožčyk Chuan Visente Pieres Mora pierad śmierciu zajmaŭ u suśvietnym rejtynhu čaćviortuju pazicyju: jaho, akramia Brańjas Marery, apiaredžvali taksama japonka Tomika Itoka (naradziłasia 23 maja 1908 hoda) i braziljanka Inach Kanabara Łukas (8 červienia 1908-ha).
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2828
Kamientary