Asudžanych nie pryviazuć, buduć vyrašać los rečavych dokazaŭ. Što viadoma pra novy sud u spravie Cichanoŭskaha
U Homielskim abłasnym sudzie 25 krasavika adbudziecca pasiadžeńnie. Słuchańni praviadzie sudździa Mikałaj Dola, piša Radyjo Svaboda.
U farmuloŭcy anonsa suda havorycca pra «inšyja pytańni, źviazanyja z pryviadzieńniem prysudu, vyraku, pastanovy ŭ vykanańnie». Praces projdzie ŭ miežach artykuła 402 Kryminalna-pracesualnaha kodeksa.
Jak stała viadoma Svabodzie, u pieršym prysudzie ŭ «spravie Cichanoŭskaha» pieralik rečavych dokazaŭ zaniaŭ niekalki dziasiatkaŭ staronak. Tam byli mabilnyja telefony asudžanych, kampjutary, aŭtamabili i inšaja majomaść.
«Vidać, niešta ŭpuścili ci sud vyrašyŭ bolš nie zachoŭvać rečavyja dokazy, źniščyć ich. Tamu pravodziać pasiadžeńnie», — ličyć krynica Svabody i jurydyčnych kołaŭ.
Juryst taksama patłumačyŭ, što jość rečavyja dokazy, jakija zastajucca pry spravie nazaŭždy. Heta dyski z pratakołami apytańniaŭ, apieratyŭna-pošukavymi mierapryjemstvami, pratakoły ahladaŭ i tak dalej. A jość takija, jakija nie majuć asablivaj kaštoŭnaści — heta znački, ściahi, ulotki, litaratura, miehafony i tak dalej.
«Heta idzie na źniščeńnie, zvyčajna takoje rašeńnie prapisvajuć u prysudzie. Dokazy źniščajucca, kali prysud nabyvaje moc. Hrošy i materyjalnyja kaštoŭnaści iduć u kaznu, na karyść dziaržavie. Narkotyki, zbroja, falšyvyja hrošy taksama źniščajucca. Tut chutčej pytańnie pra tyja rečavyja dokazy, jakija nie majuć pramoha dačynieńnia da prysudu. Tamu i budzie razhlad», — patłumačyŭ juryst.
Jak paviedamili Svabodzie krynicy, blizkija da situacyi, fihurantaŭ spravy na pasiadžeńnie pryvozić nie płanujuć.
U anonsie pracesu, zajaŭlenaha na 25 krasavika, značacca palitviaźni Ihar Łosik, Dźmitry Papoŭ, Arciom Sakaŭ, Mikoła Statkievič, Siarhiej Cichanoŭski i Uładzimir Cyhanovič, jakija byli asudžanyja na zakrytym pracesie ŭ budynku SIZA-3 u Homieli 14 śniežnia 2021 hoda.
Siarhieja Cichanoŭskaha tady asudzili na 18 hadoŭ kałonii, Mikołu Statkieviča — na 14 hadoŭ, Ihara Łosika i Uładzimira Cyhanoviča — na 15 hadoŭ, Dźmitryja Papova i Arcioma Sakava — na 16 hadoŭ.
U Lepieli zatrymali palaka, jaki nibyta zdabyŭ dakumienty vučeńniaŭ «Zachad-2025»10
Kamientary