«Nie varta mierkavać, što pamiežniki nie buduć dahladać vaš telefon. Pravieryć mohuć kožnaha», — nahadvajuć «Kibierpartyzany». Pryvodzim ich parady, a taksama hajdy ad «Našaj Nivy», jakija vam u hetym dapamohuć.
Telegram
Pieršaje, što «Kibierpartyzany» rajać zrabić, — pakłapacicca pra telehram-akaŭnt. Dla hetaha varta zavieści asobny telehram-akaŭnt, jaki budzie vyhladać praŭdapadobna, ale jaki možna budzie biez strachu być zatrymanym pakazvać pamiežnikam. Tam mohuć być, naprykład, biaskryŭdnyja pierapiski z kalehami, padpiski na kanały z navinami (nie «ekstremisckija») i čaty pa vašaj prafiesii.
«Kibiery» źviartajuć uvahu na toje, što prosta vydalać telehram nie varta, bo pamiežniki mohuć pasprabavać uvajści ŭ jaho z vašaj sim-karty. Jak alternatyvu jany prapanujuć pastavić na telehram vobłačny parol i pry dahladzie skazać, što vy nie viedajecie, chto karystajecca akaŭntam. Ale parol mohuć vybić, a «niejtralny» akaŭnt vyhladaje praŭdapadobna.
Pierapiski i schoviščy
«Kibierpartyzany» rajać prahledzieć usie vašy miesiendžary i paštovyja klijenty. Vydalicie adtul usio, što moža być niebiaśpiečnym.
Źviarnicie ŭvahu na schovišča vašaha telefona. Nadziejna vyčyścicie «padazronyja» vyjavy i fajły. Vyčyścicie taksama «śmietnik» schoviščaŭ. Jak heta rabić my raspaviadajem, naprykład, u hajdzie pra ačystku huhł-fota i halerej, vy znojdziecie ich nižej.
Asobna źviarnicie ŭvahu na kantakty ŭ smartfonie i miesiendžarach (tut my raspaviadali, jak ich pačyścić).
Inšyja parady
«Kibierpartyzany» rajać rychtavacca da pravierki zahadzia i nie adkładać ačystku telefona na apošni momant.
Źviarnicie ŭvahu na ŭsie prahramy, u jakich vy prahladali fota abo videa, viali pierapisku abo dzie jość techničnaja mahčymaść niešta reposnuć abo łajknuć. Nieabaviazkovyja sacsietki lepš vydalić zusim.
Nie panikujcie, kali supracoŭnik budzie ŭvodzić niejkija kamandy ŭ telefonie — imavierna, jon pierapisvaje vaš IMEI («asabisty numar» smartfona). Imi karystajucca, kab adsočvać tych, chto pryjazdžaje ŭ Biełaruś. Trymajcie heta ŭ hałavie i nie biarycie vaš smartfon tudy, dzie vas nie musiać bačyć.
A što rabić nie varta?
«Kibierpartyzany» vydzielili try punkty:
- Najpierš — nie dbać pra biaśpieku. «Nie varta mierkavać, što pamiežniki nie buduć dahladać vaš telefon. Pravieryć mohuć kožnaha», — pišuć jany.
- Pierasiakać miažu z novym abo zusim čystym telefonam. Heta moža vyklikać padazreńni.
- Vostra reahavać na toje, što robiać u vašym telefonie, i pakazvać zanadta niervovuju reakcyju na heta.
Parady i hajdy ad «Našaj Nivy»
Pry pierasiačeńni miažy my nie raim vam brać noŭtbuk, ź jakoha vy rabili niešta «pratesnaje». Vyčyścić jaho składaniej, bo tam u siłavikoŭ bolš mahčymaściaŭ dla analizu fajłavaj sistemy.
Dla tych, chto bolšaść času žyvie za miažoj: padumajcie dvojčy pierad tym, jak jechać u Biełaruś, asabliva kali vy daŭno tudy nie jeździli, i ŭzvažcie ryzyki. Padumajcie, za što vas mohuć pryciahnuć — ci pisali vy niešta ŭ sacsietkach abo miesiendžarach u 2020-m i paźniej (navat u zakrytych čatach, uzłamanych siłavikami), ci vychodzili na pratesty ŭ Biełarusi abo emihracyi, ci ŭdzielničali ŭ niejkich mierapryjemstvach, jakija mohuć traktavać nieadnaznačna (śpiecsłužby Biełarusi aktyŭna manitorać akcyi dyjaspary), ci rabili achviaravańni ź biełaruskaj kartki (abo sprabavali, ale płaciož nie prajšoŭ) abo praz fejsbuk, ci zaŭvažali vas u praŭkrainskaj aktyŭnaści.
Kali vy achviaravali z zamiežnaj kartki ŭ padtrymku Ukrainy abo biełaruskich arhanizacyj za miažoj, to vydalicie bankaŭskuju prahramu i nie biarycie z saboj vašu zamiežnuju kartku. Vydalicie ŭsie zhadki pra vaš zamiežny bank sa śpisu sms dy paštovych siervisaŭ.
«Naša Niva» stvaryła šmat hajdaŭ pa roznych halinach biaśpieki. Jany prydaducca vam pry ačystcy smartfona, a ich vykanańnie zojmie čas. Kali vy źbirajeciesia ŭ Biełaruś, to znajdzicie čas, bo heta moža kaštavać vam svabody:
- Pačyścicie telehram i inšyja miesiendžary. Asobna źviarnicie ŭvahu na ŭkładki «spampavanyja» i «miedyja» (jak ich pačyścić my pisali tut). Kab razumieć mahčymaści siłavikoŭ pry pošuku ŭ telehramie — pračytajcie artykuł. Źviarnicie ŭvahu na toje, jak vyčyścić «ekstremisckija» telehram-boty z vašaha akaŭnta.
- Pačyścicie vaš Instagram. Potym pahladzicie na «Adnakłaśniki», «Ukantakcie» i Facebook. Pierapraviercie vašy łajki. Kali vy achviaravali praz Facebook, to pahladzicie jak vydalić akaŭnt pravilna. Asobna źviarnicie ŭvahu na TikTok (1 častka, 2 častka).
- Paśla hetaha pierapraviercie YouTube i Google-akaŭnt.
- Prahladzicie halereju i pačyścicie fota adtul, paśla pierapraviercie Google Photos. Kali ŭ vas iPhone, to vam pasuje hety hajd.
- My pisali pra toje, jak zrazumieć, što vy ŭ niebiaśpiecy, kali vy niekudy achviaravali (asobna — pra Patreon i Stripe). Taksama — pra toje, jakich danacioraŭ sadziać za kraty. A tut — pra toje, jakaja imaviernaść taho, što vaš telehram-akaŭnt zdeananimizavali. Źviarnicie na ich uvahu.
«Naša Niva» — bastyjon biełaruščyny
PADTRYMAĆŠto novaha praviarajuć u telefonach na miažy pry viartańni ŭ Biełaruś
HUBAZiK źbirajecca manitoryć akcyi na Dzień Voli ŭ Biełarusi i za miažoj. Adkazny — sumnaviadomy Hajko
Zatrymali dziaŭčynu z Mahilova. Kažuć: za ŭdzieł u mitynhach za miažoju
Haradzieniec paśla viartańnia ŭ Biełaruś atrymaŭ piać kryminalnych spraŭ i staŭ «terarystam»
Ciapier čytajuć
Anton čatyry hady chavaŭsia ad łukašystaŭ u rodnych Baranavičach — zatrymali, kali vyrašyŭ zdać na pravy3
Kamientary