U Polščy vyjavili «studenckuju» častku vizavaha skandału. Nastupstvy mohuć zakranuć i biełarusaŭ
Dziasiatki tysiač zamiežnikaŭ mahli atrymać studenckija vizy i nie prystupić da vučoby.
Reč u tym, što takija vizy dajuć mahčymaść pracaŭładkavacca ŭ ES biez atrymańnia dazvołu na pracu, tamu mnohija «fiktyŭnyja» studenty faktyčna kuplali dostup da rynku pracy pa canie hoda navučańnia. Hetaja schiema była vyhadnaja i šerahu pryvatnych VNU Polščy, piša Mostmedia.io sa spasyłkaj na Dziennik Gazeta Prawna.
Da vučoby nie prystupała bolšaść atrymalnikaŭ studenckich viz. Ale kurs vučoby jany apłačvali — hod u polskaj ustanovie adukacyi z vykładańniem na anhlijskaj movie moža abychodzicca prykładna ŭ 3120 jeŭra. Niekatoryja VNU hatovyja byli zapluščvać vočy na studentaŭ, jakija nie źjavilisia na zaniatki.
Schiema akazałasia nastolki raspaŭsiudžanaj, što ŭ niekatorych VNU bolš za pałovu studentaŭ byli zamiežnikami. Naprykład, u Vyšejšaj škole kiravańnia i administracyi ŭ Apole zamiežniki składajuć 61% usich studentaŭ.
U chodzie dopytu na kamisii pa rasśledavańni skandału vice-konsuł Polščy ŭ Indyi Matevuš Reščyk pryznaŭ, što pryvatnyja navučalnyja ŭstanovy Polščy razhladajuć zamiežnikaŭ jak sposab zarobku i nie ŭ stanie pravieryć navat, ci sapraŭdy abituryjent skončyŭ siaredniuju škołu ŭ svajoj krainie.
Pradstaŭnik škoły ŭ Apole skazaŭ, što ŭ jaje niama mahčymaści daviedacca, ci atrymaŭ ich patencyjny student vizu. Tamu kali inšaziemiec nie źviartajecca pa atrymańnie lehitymacyi-anałaha studenckaha bileta, — VNU miarkuje, što toj prosta nie zajechaŭ u Polšču.
Kab vyklučyć schiemu «fiktyŭnych» studentaŭ u budučyni, u Polščy płanujuć uvieści źmieny dla VNU. Jany pavinny buduć praviarać, ci jość u patencyjnych studentaŭ anałah polskaha atestata stałaści.
Taksama kandydatam daviadziecca dakazać, što jany vałodajuć polskaj ci anhielskaj. Dla hetaha ŭniviersitety pavinny buduć pravodzić sumoŭi.
Schiemu mahli vykarystoŭvać pieravažna studenty z Afryki i Azii. Ale jaje nastupstvy adčujuć i biełarusy. Pravierki navučencaŭ užo ŭzmacnilisia.
Paviedamlałasia ab niekalkich vypadkach, kali biełaruskim studentam admaŭlali ŭ novych vizach, kali ŭniviersitety nie paćviardžali, što jany sapraŭdy tam vučacca.
Akramia taho, niekatorym z tych, kamu ŭchvalili zajavy, vizy vydali na bolš karotkija terminy — nie na hod, a na paŭhoda.
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary