Miarkujučy pa dopisach Biehuna, na froncie jon z kanca krasavika.
Pra svaju słužbu ŭ jakaści kamandzira adździaleńnia radyjoelektronnaj baraćby (REB) Illa Biahun piša ŭ svaim telehram-kanale.
Jak śćviardžaje Biahun, na vajnu jon pajšoŭ dobraachvotnikam i jaho adrazu pastavili kamandziram adździaleńnia na druhoj linii dla vykanańnia bajavoj zadačy.
Mužčyna dzielicca śpiecyfikaj raboty: «davodzicca pracavać u niepasrednaj blizkaści da ŁBS (linii bajavoha sudakranańnia. — NN), paru kiłamietraŭ».
Jon tłumačyć, jak zmahajecca ź bieśpiłotnikami. U pryvatnaści raskazvaje, što razam z sasłužboŭcami ŭstaloŭvali mabilny kompleks REB biełaruskaj vytvorčaści na kulamiotnuju turel (prystasavańnie dla ŭstanoŭki i pavarotu pa kruhu kulamiota) dla pašyreńnia jaje mahčymaściej.
Biahun dzielicca, što nie pajšoŭ na kantrakt ź Ministerstvam abarony Rasii, bo tak mienš biurakratyi i abmiežavańniaŭ pry pryniaćci rašeńniaŭ na froncie.
«U našym vypadku my asnaščany na ŭzroŭni, ale majem bolšy dyjapazon mahčymaściaŭ ekspłuatacyi techniki, jaje madernizacyi i navat raspracoŭki novaj. (…) Jak by heta hučna ni hučała, ale va ŭmovach chutkapłynnaści madernizacyi z boku voraha, niama mahčymaści čakać, pakul z našaha boku abnoviać toj ci inšy kompleks REB abo padviazuć patrebny modul u vypadku jaho najaŭnaści, kali ŭ voraha idzie surjoznaja źmiena častaty pracy abstalavańnia abo naohuł pryncypova źmianiajecca taktyka pracy».
Jak piša były prapahandyst, na vajnie «mianiajucca adnosiny šmat da jakich paŭsiadzionnych pytańniaŭ» i «padajucca śmiešnymi natacyi i vokličy pad markaj «pakul našy chłopcy na SVA (tak prapahanda nazyvaje vajnu. — NN)».
Biahun nie raskryvaje kankretnaha miesca słužby, ale abiacaje praz paŭhoda dać bolš kankretyki.
«Adkažu na pytańnie, jakoje niekalki tydniaŭ tamu ŭbačyŭ. Čamu ja nie «šyfrujusia», bo REBaŭcy, BPŁAšniki i suviazisty — heta vielmi žadanyja mety, pryčym tut pa nastroi — nakryć ź nieba abo ŭziać žyvym.
Tłumaču.
U siłu śpiecyfiki pracy, kali ja navat 200-y, to ŭvohule plavać, byŭ ja publičny ci nie. Ja ž nie toje što kirunak, navat nie kažu ŁNR abo DNR.
(…) Kali zatrochsociać i mianie nie evakujujuć inšyja, plus na našy pazicyi jašče i [ŭkrainiec] zojdzie, to dastatkova maju mordu sfotkać biez bałakłavy i ŭ pošukaviku znajści. A z ulikam majoj ukamplektoŭki i kaniu budzie zrazumieła, chto ja pa pasadzie, navat biez pošuku ŭ sietkach. Kamandzir užo ci nie, to absalutna budzie plavać».
Druhi prapahandyst — Ihar Tur — zachaplajecca tym, što Biahun pajechaŭ vajavać na liniju frontu, a «nie ŭ karotkuju turkamandziroŭku žurnalisckuju tudy, dzie niebiaśpiečna na 1 z 10».
Illa Biahun u minułym prahramist, jaki ŭ 2020-m staŭ aktyvistam štaba Valeryja Capkały, a paśla niejki čas byŭ palitemihrantam, staraŭsia zblizicca z asiarodkam Śviatłany Cichanoŭskaj. Paśla svajho viartańnia ŭ Biełaruś u pačatku 2021 hoda Biahun byŭ udzielnikam Kruhłaha stała Vaskrasienskaha i hościem prapahandysckich ŚMI.
Ciapier čytajuć
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary