Spačatku harodnina, a potym vuhlavody. Heta sapraŭdy karysna?

Apošnim časam u sacyjalnych sietkach raspaŭsiudzilisia parady adnosna «pravilnaha» paradku charčavańnia. Aŭtary śćviardžajuć, što dla zdaroŭja karysna spačatku źjadać sałat, paśla pradukty z utrymańniem białkoŭ i tłuščaŭ, i ŭ apošniuju čarhu — ježu, bahatuju na vuhlavody.

Prychilniki takoj dyjety śćviardžajuć, što jana dapamahaje značna źnizić skački ŭzroŭniu cukru ŭ kryvi. U vyniku źmianšajucca apietyt, stomlenaść i ryzyki dla zdaroŭja.

Što pakazvajuć daśledavańni

Vydańnie The New York Times źviarnułasia pa kamientar da doktarki Alpany Šukła (Alpana Shukla) ź Miedycynskaha kaledža Viejł Korneł u Ńju-Jorku, jakaja daśledavała źmienu paradku pryjomu ježy.

Vučonaja zaŭvažaje, što hetaje praviła pakazała svaju efiektyŭnaść u ludziej ź pieraddyjabietam ci dyjabietam 2 typu.

Pa słovach dyjetołaha i daśledčyka z Oksfardaskaha ŭniviersiteta Nikoły Hies (Nicola Guess), efiekt ad źnižeńnia ŭzroŭniu cukru ŭ kryvi ŭ vyniku źmieny paśladoŭnaści pryjomu ježy, jak pakazali niekatoryja daśledavańni, supastaŭny ź dziejańniem niekatorych lekaŭ ad dyjabietu. Heta, adnak, jašče patrabuje dalejšaha vyvučeńnia.

Vučonyja nie da kanca razumiejuć, čamu heta adbyvajecca. Adna z teoryj zaklučajecca ŭ tym, što spažyvańnie tłuščaŭ, klatčatki i białkoŭ zapavolvaje praces aparažnieńnia straŭnika, što ŭ vyniku zatrymlivaje ŭsmoktvańnie hlukozy ŭ kroŭ.

A jak heta dziejničaje na zdarovych ludziej?

Daśledavańni taksama pakazali, što ŭžyvańnie vuhlavodaŭ u kancy pryjomu ježy moža źnizić skački ŭzroŭniu cukru ŭ kryvi ŭ ludziej biez dyjabietu. Adnak ekśpierty havorać, što zdarovym ludziam zvyčajna nie treba tak staranna kantralavać uzrovień cukru ŭ kryvi, bo arhanizm viernie jaho da normy na praciahu niekalkich hadzin paśla ježy.

Tym nie mienš, pakolki białki, tłuščy i harodnina, bahatyja klatčatkaj, pieratraŭlivajucca daŭžej, čym prostyja vuhlavody, pakidańnie vuhlavodaŭ na kaniec moža dapamahčy ludziam daŭžej adčuvać sytaść.

Daśledavańni taksama pakazvajuć, što taki paradak pryjomu ježy moža stymulavać kišečnik da vypracoŭki bolšaj kolkaści harmonu nasyčeńnia — hlukahonapadobnaha pieptydu-1 (GLP-1 ). Dla imitacyi hetaha harmonu jakraz raspracavany preparat ad dyjabietu Ozempic.

Akramia taho, zaŭvažaje doktar Šukła, kali vy schilnyja adčuvać mlavaść paśla ježy, to ŭžyvańnie harodniny ci białkoŭ napačatku moža dapamahčy pazbavicca hetaha.

Niekatoryja daśledavańni taksama pakazvajuć, što pakidańnie vuhlavodaŭ na kaniec pryjomu ježy moža pavialičyć imaviernaść taho, što vy natoliciesia harodninaj i białkami dy źjaście mienš prostych vuhlavodaŭ, jakija, jak praviła, utrymlivajuć mienš pažyŭnych rečyvaŭ i bolš kałoryj.

Adnak, adznačajuć ekśpierty, nie varta imknucca da źmieny svaich zvyčak u paśladoŭnaści pryjomu ježy, bo heta moža vyklikać razład charčovych pavodzin.

Pa słovach doktara Hies, užyvańnie vialikaj kolkaści harodniny pry kožnym pryjomie ježy važniejšaje, čym zanadta pilnaja ŭvaha da paradku pryjomu ježy.

• 6
• 0
• 0
• 2
• 0
• 0
• 0
• 0