«Dźmitryjevu skazali: «Kali niešta nie toje, adrazu vierniešsia ŭ turmu»
Były ŭdzielnik «Havary praŭdu» ananimna padzialiŭsia z «Našaj Nivaj» reakcyjaj na artykuł Andreja Dźmitryjeva, u jakim toj zaklikaje Zachad da viartańnia pasłoŭ u Minsk. A taksama raskazaŭ, čamu z radaraŭ źnik Siarhiej Čeračań i jak trymajuć «na ałoŭku» Taćcianu Karatkievič.
Naš surazmoŭca viedaje Andreja Dźmitryjeva na praciahu amal siami hadoŭ i ŭpeŭnieny, što toj chacieŭ by vykazacca jašče pra mnohaje, ale toje, što źjaviłasia na staronkach časopisa «IPG — Mižnarodnaja palityka i hramadstva» — adzinaje, što jamu pakul dazvolili.
«Nakolki ja viedaju, Andreju zabaraniajuć navat narmalna vieści sacsietki. Kali jon vyzvaliŭsia z turmy, jamu skazali: kali ŭ sacsietkach nie toje niešta vyjdzie, adrazu vierniešsia ŭ turmu. Pa vyzvaleńni ja dasłaŭ Andreju paviedamleńnie, a jon u adkaz tolki «pryvitańnie». I ja nie ŭpeŭnieny, što heta jon sam mnie adkazaŭ. Ale ja dakładna viedaju, što jon nie stvaraŭ by artykuł pad zakaz. Chutčej, tekst pisaŭsia ad dušy, ale ŭ miežach dazvolenaha».
Surazmoŭca adznačaje, što ŭ jaho šmat pytańniaŭ nakont taho, čamu hety artykuł byŭ apublikavany mienavita ciapier, ale jon ličyć, što adkazy my atrymajem, tolki kali ŭłada źmienicca i praŭda budzie biaśpiečnaj.
«Ja kaliści niefarmalna spytaŭ u Andreja pra 2010 hod: maŭlaŭ, usie krytykujuć tvoj učynak z tym «pakajalnym videa». I jon tady adkazaŭ: «Viedaješ, jak było ŭsio? U KDB mianie trymali tydzień, skazali, što kali vyjdu, to tolki starym dziedam, truchlavym i biazzubym. A potym pakazali praz akno žonku i skazali, što maje dzieci pabačać jaje taksama, tolki kali jana babulaj zrobicca. Ci ja na kamieru skažu, što treba». Nu voś jon i skazaŭ».
Artykuł Dźmitryjeva byŭ apublikavany na fonie naviny pra zatrymańnie jašče adnoj lidarki «Havary praŭdu» Taćciany Karatkievič. Surazmoŭca adznačaje, što z abaimi razmaŭlaŭ na temu vyjezdu ź Biełarusi, ale kožny ź ich znachodziŭ svaje pryčyny zastavacca.
«Taćciana siońnia prosta choča spakoju. Jana dapamahała ludziam, hulała ŭ futboł. Ale voś joj zhadali 2020 hod… Viedaju, što joj navat nie dazvalali leźci ŭ niejkija zbory podpisaŭ za łavački. Jana niešta pačynała rabić, a joj adrazu: «Ty akuratniej».
U Andreja ž choć i žonka ŭ Ispanii žyvie, ale jon by siabie za miažoj nie znajšoŭ, mnie zdajecca. Jon ničoha nie ŭmieje rabić, jon palityk. I jak pa mnie, to jon — samy mocny palittechnołah u Biełarusi. Čałaviek, jaki z maładych hadoŭ zajmaŭsia vyvučeńniem palitałohii. Čamu ŭ 2010 hodzie Uładzimira Niaklajeva vyłučyli ŭ prezidenty? Tamu što Dźmitryjevu było tolki 29 hadoŭ. A heta jon sam, pa vialikim rachunku, arhanizavaŭ tuju prezidenckuju kampaniju. U 2015-m jamu jašče było 34, tamu na vybary pajšła Karatkievič. Jon płanamierna išoŭ da taho, kab samastojna vyłučycca na vybarach u 2020-m.
U nas nie va ŭsim sychodziacca pohlady z Andrejem, ale toje, što jon mocny palittechnołah — heta praŭda. I jon nie bačyć siabie nidzie, akramia palityki. Jaki-nijaki rejtynh u jaho ŭ Biełarusi jość. A tyja, chto ŭnutry krainy, mienš słuchajuć palitykaŭ, jakija za miažoj.
I znachodziačysia ŭ Biełarusi, Dźmitryjeŭ moža ludziej i padbadziorvać, i padšturchoŭvać. Takich, chto nie asabliva radykalny, ale choča źmieny ŭłady».
Majučy status «ekstremista» i sudzimaść, Dźmitryjeŭ pa zakonie nie zmoža ŭdzielničać u novych vybarach.
U pačatku 2021 hoda Dźmitryjeŭ anansavaŭ stvareńnie «Našaj partyi», praŭda, usia dziejnaść prycichła paśla aryštu i pasadki samoha lidara ŭ 2023-m.
Surazmoŭca «Našy Nivy» znajomy asabista i jašče z adnym eks-kandydatam u prezidenty-2020 — Siarhiejem Čeračniem. Jon miarkuje, što toj vymušana zamoŭk mienavita paśla prysudu Dźmitryjevu.
«Siarhiej krytykavaŭ ułady jašče mienš, čym Dźmitryjeŭ. Ale kali Andrej najpierš — palityk, jon moh razhladać turmu jak dadatkovuju palityčnuju škołu, to Siarhiej — u pieršuju čarhu biznesmen, jakomu jość što hublać. Tamu jon ciapier i maŭčyć».
Chto ž tady moža pajści na vybary-2025?
«Ja takich ludziej nie baču, — kaža surazmoŭca. — Buduć, moža, Kanapackaja i Hajdukievič, ale heta nie apazicyja. Apazicyja — heta, kali ty krytykuješ apanienta. A siońnia my bačym, što nijakaja krytyka ŭłady niedapuščalnaja ŭ Biełarusi.
Dla taho, kab pasprabavać iści na vybary, treba być mocnym čałaviekam, nastolki, kab nie bajacca sieści ŭ turmu, a ŭsie takija ludzi ci ŭžo siadziać, ci źjechali za miažu».
Kamientary