U Rasii vahnieraviec zabiŭ dvuch čałaviek, pajšoŭ na vajnu, viarnuŭsia i napaŭ z nažom na žančynu. Ale sudzić jaho nie buduć
Jon zaklučyŭ kantrakt i znoŭ viartajecca na front.
U Rasii nie buduć sudzić najomnika PVK «Vahnier» Alaksieja Patrušava, jaki ŭ Čycie sprabavaŭ zarezać miascovuju žycharku. Sud admianiŭ aryšt abvinavačanaha, bo jon zaklučyŭ kantrakt ź Ministerstvam abarony i maje namier adpravicca na vajnu. Norma, jakaja dazvalaje adpuskać padsudnych pa kryminalnych spravach u vojska, pačała dziejničać u Rasii z 2 kastryčnika.
Pavodle zakona, vytvorčaść pa kryminalnaj spravie suprać padsudnych, jakija zaklučyli kantrakt ź Ministerstvam abarony, prypyniajecca, a miera strymańnia admianiajecca, paviedamlaje «Sibir. Realii».
Patrušaŭ u krasaviku 2024 hoda napaŭ na žančynu, jakaja siadzieła ŭ pryparkavanym aŭtamabili, i niekalki razoŭ udaryŭ jaje nažom u hrudzi, žyvot, ruki i nohi, a zatym pasprabavaŭ uhnać aŭtamabil. Pavodle śledstva, u momant napadu jon byŭ pjany. Žančyna vyžyła, ale atrymała surjoznyja ranieńni. Sam abvinavačany svajoj viny nie pryznaŭ i rastłumačyŭ, što padyšoŭ da žančyny na jaje kryki ab dapamozie.
Heta daloka nie pieršaje surjoznaje złačynstva Patrušava. U 2014 hodzie jon byŭ asudžany na 23 hady kałonii za dvajnoje zabojstva, zhvałtavańnie i zamach na zabojstva. Tady jon napaŭ na haspadara doma, na jakoha pakryŭdziŭsia padčas zastolla, a zatym zhvałciŭ jaho sužycielnicu. Paźniej jon zabiŭ jašče adnaho čałavieka. Z kałonii Patrušaŭ byŭ zavierbavany ŭ PVK «Vahnier» i adpraviŭsia na vajnu va Ukrainu.
U vieraśni rasijskaja Dziaržduma pryniała zakon, jaki dazvalaje vyzvalać ad kryminalnaj adkaznaści padčas sudovaha razhladu spravy suprać mabilizavanych ci tych, chto zaklučyŭ kantrakt ź Ministerstvam abarony. Kali prysud užo ŭstupiŭ u siłu, takija asoby vyzvalajucca ad pakarańnia ŭmoŭna, i kantrol za imi pieradajecca kamandavańniu vajennaj častki. Paśla atrymańnia dziaržaŭnaj uznaharody jany vyzvalajucca ad kryminalnaj adkaznaści abo ad pryznačanaha pakarańnia, i sudzimaść anulujecca.
Były ministr kultury Rusłan Čarniecki znajšoŭ sabie padpracoŭku9
Kamientary