Dalnabojščyk raskazaŭ, jak žyvie na dapamohu pa biespracoŭi paśla avaryi ŭ Francyi

— Artur, vy raniej pracavali ŭ Hiermanii, jak tak atrymałasia, što pajechali ŭ Francyju i pačali atrymlivać dapamohu pa biespracoŭi?

— Dy ŭsio davoli prosta. Maja žonka — francužanka, i my vymušana pierajechali z Hiermanii ŭ Francyju, kali jana vyrašyła viarnucca na radzimu. Ale, pakolki ja pracavaŭ u Hiermanii, mnie ŭdałosia aformić niamieckuju dapamohu pa biespracoŭi.

Spačatku ja padaŭ dakumienty ŭ Francyi, a zatym vykarystaŭ jeŭrapiejski farmular, jaki dazvalaje «ekspartavać» dapamohu z adnoj krainy ES u inšuju. U vyniku Hiermanija vypłačvała mnie dapamohu pa biespracoŭi na praciahu 12 miesiacaŭ.

— Cikava, jakuju sumu vy atrymlivali?

— U zaležnaści ad kolkaści dzion u miesiacy, atrymlivałasia prykładna 1200-1300 jeŭra. Heta było kala 60-70% ad majho zarobku ŭ Hiermanii. Ja zarablaŭ tady prykładna 1800-2000 jeŭra, i dapamoha raźličvałasia na asnovie hetaha dachodu.

Darečy, u Francyi adsotak dapamohi trochi vyšejšy — tut vypłačvajuć kala 70% ad apošniaha zarobku.

— Atrymlivajecca, Hiermanija vypłačvała vam dapamohu, niahledziačy na toje, što vy ŭžo žyli ŭ Francyi? Heta davoli niezvyčajnaja situacyja.

— Tak, i heta adna z asablivaściaŭ ES. Ja byŭ vymušany pakinuć Hiermaniju praź siamiejnyja abstaviny, a značyć, mieŭ prava na atrymańnie dapamohi ŭ inšaj krainie. Praŭda, majoj žoncy skaracili termin vypłat — joj dali tolki 9 miesiacaŭ, tamu što jana była inicyjatarkaj pierajezdu. Ale mnie pašancavała — 12 miesiacaŭ poŭnaja dapamoha.

— A što było paśla taho, jak dapamoha skončyłasia? Znajšli pracu?

— Tak, paśla zakančeńnia vypłat ja adrazu ŭładkavaŭsia na pracu. Heta była praca kiroŭcam — ja kiruju cysternami ź niebiaśpiečnymi hruzami. Ale doŭha nie prapracavaŭ. Spaliŭ pieršuju bočku litaralna praź niekalki dzion pracy. Heta byŭ taki niedarečny vypadak — tarmazy klin dali, i pačaŭsia pažar. Na ščaście, nichto nie paciarpieŭ, ale heta byŭ moj pieršy incydent u Francyi.

Paśla hetaha ja pajšoŭ z toj pracy i ŭładkavaŭsia ŭ inšuju kampaniju. Mianie tam adrazu ŭziali, tamu što šukali čałavieka z maimi navykami: viedańnie niamieckaj, anhlijskaj, plus u mianie byŭ ADR (dazvoł na pieravozku niebiaśpiečnych hruzaŭ) i vopyt na cysternach. Ja prapracavaŭ tam dva hady, da śniežnia 2023 hoda.

— Vy zhadali avaryju. Što adbyłosia?

— Heta było ŭ śniežni 2023 hoda. Ja jechaŭ pa nacyjanalnaj darozie, nadvorje było drennaje — doždž sa śnieham, plus try hradusy. U niejki momant ja adciahnuŭ uvahu — padkurvaŭ cyharetu, i heta adyhrała zły žart. Ja na siekundu straciŭ bačnaść, i, kali viarnuŭsia da darohi, užo byŭ na ŭzbočynie.

U vyniku adarvała siadło na ciahačy, i cysterna lehła na zadniuju častku ciahača. Kabinu pačało ściskać, jak akardeon, i ŭ niejki momant ja vyrašyŭ adpuścić tarmazy, kab paźbiehnuć bolš surjoznych nastupstvaŭ. Na ščaście, pažarniki chutka pryjechali i kantralavali situacyju, ale strach byŭ jašče toj.

Paśla hetaha vypadku mianie zvolnili praz šeść tydniaŭ, jak jany skazali, za toje, što ja «nie adaptavaŭ chutkaść pad umovy nadvorja».

— To-bok vas zvolnili praz avaryju? Vam dali kampiensacyju?

— Tak, mianie zvolnili za parušeńnie, ale vypłatu ja atrymaŭ. Mnie vydali dva minimalnyja zarobki, heta było kala 3200 jeŭraŭ. Paśla hetaha ja znoŭ staŭ na ŭlik u biržy pracy i pačaŭ atrymlivać dapamohu pa biespracoŭi.

U studzieni mianie zvolnili, a vypłaty pačalisia z sakavika 2024 hoda. Dapamohu mnie pryznačyli na 560 dzion, i kožny dzień mnie vypłačvajuć pa 45 jeŭra. Ciapier u mianie zastałosia kala 330 dzion, tak što jašče jość čas.

— Jak vy ličycie, ci možna pražyć na takuju dapamohu?

— Tak, całkam možna. U mianie fiksavanyja vydatki, i ja dzialu ich z žonkaj. Na dvaich u nas idzie prykładna 1200 jeŭra ŭ miesiac — heta z ulikam usich strachovak, kredytaŭ na dom i tamu padobnaha. Ja płaču 600 jeŭra, i ŭ mianie zastajecca prykładna 700 jeŭra na asabistyja vydatki. Dla nas dvaich — heta całkam dastatkova.

Na pradukty idzie prykładna 150-200 jeŭra na tydzień, ale navat z hetym zastajucca hrošy na niešta pryjemnaje, naprykład, novy instrumient abo hadžet. Niadaŭna ja kupiŭ sabie novy iPad — spatrebiŭsia dla pracy i vučoby.

— A jak ciapier prachodziać Vašy budni? Čym zajmajeciesia, pakul nie pracujecie?

— Ciapier ja sapraŭdy atrymlivaju asałodu ad žyćcia (śmiajecca). Chadžu na rybałku, hraju na hitary ź miascovymi muzykami. My źbirajemsia raz na tydzień, kamunikujem, hulajem, časam pjem niašmat. Byvaju z palaŭničymi, vychodžu ź imi na načnyja vyłazki. Časam chočacca viarnucca da pracy, ale pakul što ja vykarystoŭvaju hety čas dla adpačynku.

Pavialičyć

Paśla avaryi ŭ mianie byŭ posttraŭmatyčny sindrom, i ja ŭziaŭ 12 tydniaŭ na reabilitacyju. Ja navat jeździŭ da psichołaha — tut heta častka pracesu adnaŭleńnia paśla avaryi. Jany ceniać zdaroŭje rabotnikaŭ, tamu što treba prapracavać da piensii, i im važna, kab ty byŭ u paradku.

Tak što ciapier ja adnaŭlajusia, vuču francuzskuju, naviedvaju kursy. Na kursy i reabilitacyju kali jezdžu, kampiensujuć darohu.

— A što dalej? Što adbudziecca, kali dapamoha skončycca, a pracu vy nie znojdziecie?

— Kali ja nie znajdu pracu da kanca pieryjadu vypłat, to daviadziecca pierachodzić na sacyjalnuju dapamohu. Heta ŭžo inšy ŭzrovień — tam vypłačvajuć kala 400 jeŭra, i ŭ takim vypadku, viadoma, jany chutka znojduć tabie pracu.

Ale pakul u mianie jość prava vybaru, ja nie śpiašajusia. Kali zastaniecca miesiacy dva-try da kanca vypłat, tady ŭžo budu bolš aktyŭna šukać pracu.

— A jak vašy siabry i susiedzi staviacca da taho, što vy ciapier biespracoŭny?

— Nijakaha asudžeńnia niama. Tut, u Francyi, da hetaha staviacca inakš, čym, skažam, u krainach SND. Nichto nie sprabuje šukać u inšych niedachopy, kab ich abmiarkoŭvać. Usie razumiejuć, što čałaviek moža znachodzicca ŭ pošuku pracy, i heta narmalna.

U Hiermanii, naprykład, na inšaziemcaŭ mohuć kasavurycca, maŭlaŭ, «jany žyvuć na našy padatki». Ale tut u Francyi takoha niama. Ja płaču padatki, kali pracuju, i ciapier atrymlivaju dapamohu, jakuju ja sam zarabiŭ.

• 3
• 0
• 2
• 1
• 0
• 0
• 0
• 0