Toj «Maksim z Łatvii», jaki ŭciok u Biełaruś, — idejny zmahar z alimientami

Niekalki dzion tamu ŭ internecie źjaviŭsia rolik, u jakim Maksim, jaki pierajechaŭ z Łatvii ŭ Biełaruś, pachvaliŭsia svaim pieršym zarobkam, častku jakoha atrymaŭ praduktami. Hety Maksim — davoli viadomy błohier, jaki viadzie svoj kanał Maksomietr.

Viadoma, što naradziŭsia jon u 1975 hodzie. Svajho proźvišča jon nidzie nie ahučvaje. Miarkujučy pa videarolikach, z 1978 hoda mužčyna pražyvaŭ u Łatvii, chacia rodam jon z Kazachstana.

Sam błohier zajaŭlaŭ, što jaho baćka — biełarus. Heta dazvoliła Maksomietru paśla pierajezdu ŭ Biełaruś vosieńniu minułaha hoda atrymać dazvoł na žycharstva pa paskoranaj pracedury. Da hetaha ŭ našu krainu pierajechała jaho maci — hramadzianka Rasii.

U 2019 hodzie Maksomietr stvaryŭ kanał na YouTube, jaki chutka staŭ papularnym u peŭnaj katehoryi karystalnikaŭ internetu. Ciapier na im 890 videa i 154 tysiačy padpisčykaŭ. Akramia hetaha, mužčyna maje kanały ŭ ciktoku i telehramie.

Asnoŭnaj temaj dla razvah Maksomietra źjaŭlajucca «pravilnyja» pavodziny ŭ adnosinach z žančynami. Błohier pryznajecca, što siem hadoŭ tamu raźvioŭsia z žonkaj.

Pa jaho słovach, paśla hetaha jon nie moh mieć znosin z dačkoj.

Mužčyna daje parady, jak sučasnamu siaredniestatystyčnamu chałaściaku zaścierahčy siabie, nie trapić na kručok da «mierkantylnaj asoby, jakaja prahnie vypić ź jaho ŭsie soki».

Jak kaža sam błohier, 85% jaho padpisčykaŭ — «siaredniestatystyčny mužčyna ad 30 da 50 hadoŭ», jaki «pabyvaŭ u šlubie i ŭ jakoha nie skłałasia siamiejnaje žyćcio. (…) Heta mužčyny, jakich, mahčyma, navat pieraśledujuć ci prymušajuć płacić alimienty za tych dziaciej, jakich jany nie bačać uvohule. (…)

Siońnia žančyna moža spakojna ŭziać, zdradzić mužu, zabrać dzicia, pasadzić muža na alimienty, prymusić jaho płacić, pieravieźci da hetaha dziciaci novaha mužčynu, a pra rodnaha baćku zabycca. A rodny baćka pavinien prosta płacić hrošy i nie bačyć svajo dzicia. (…)

I hetyja mužčyny bačać u mnie taho błohiera, jaki prajšoŭ sam praz usio heta. I tamu ŭ nas jość supolnaść, dzie my dapamahajem hetym mužčynam».

Jak raskazvaŭ sam Maksomietr, jon maje łatvijskaje hramadzianstva, u Łatvii jon žyŭ u Ryzie, pracavaŭ u vajenizavanaj achovie čyhunki. U dziacinstvie časta byvaŭ u Biełarusi ŭ svajoj babuli ŭ vioscy.

U adnym ź intervju błohier raskazvaŭ, što paśla pačatku vajny va Ukrainie da jaho stali prajaŭlać cikavaść śpiecsłužby Łatvii. Nakolki heta praŭda, nieviadoma.

Pa słovach mužčyny, svajo rašeńnie pierajechać jon chavaŭ ad usich. U adzin ź dzion u vieraśni 2023 hoda jon pradaŭ kvateru ŭ Ryzie, schavaŭ hrošy ŭ mašynie i viečaram taho ž dnia vyjechaŭ z krainy. Da hetaha jon pieravioz u Biełaruś niekatoryja svaje rečy.

Znachodziačysia ŭ Biełarusi, Maksomietr staŭ razdavać intervju, u jakich raskazvaŭ pra toje, jak ciažka žyć u Łatvii i jak u hetaj krainie pryhniatajuć ruskich.

U adnym z apošnich videa Maksomietr raskazvaje, što słužba dziaržbiaśpieki Łatvii nibyta asudziła jaho pa artykule ab vajennych złačynstvach, pa jakim jamu pahražaje da 20 hadoŭ turmy — adnak vyhladaje, što heta vydumka.

Błohier raskazvaŭ, što kupiŭ dom, u jakim robić ramont i žyvie na źbieražeńni.

Nie curajecca błohier i danataŭ. Pad svaimi videa ŭ jutubie jon raźmiaščaje rekvizity kartki Biełarusbanka i prosić akazać dapamohu.

Niekalki dzion tamu Maksomietr paviedamiŭ, što maci ad jaho pajechała, tamu što «ŭvachodzić u siektu Ijehovy». Błohier prasiŭ svaich padpisčykaŭ dapamahčy jamu hrašyma, kab kupić «pralnuju mašynu, niejki šrubakrut i hetak dalej».

Taksama błohier raskazaŭ, što jahonaja žonka padała na jaho ŭ sud dla taho, kab spahnać alimienty. A jon pierakanany, što paśla razvodu nie pavinien płacić ničoha.

• 2
• 0
• 14
• 19
• 0
• 0
• 4
• 0