Sud u Kijevie admoviŭsia vyzvalić z-pad varty padazravanuju ŭ špijanažy Inu Kardaš
Hramadzianka Biełarusi była zatrymanaja sioleta 21 studzienia pavodle padazreńnia ŭ špijanažy na Kamitet dziaržaŭnaj biaśpieki, i jaje advakat prasili sud admianić rašeńnie pieršaj sudovaj instancyi ab pradaŭžeńni jaje ŭtrymańnia pad vartaj i vyzvalić jaje pad zakład i padpisku ab niavyjeździe.
Jak stała viadoma Radyjo Svaboda, apielacyjnuju skarhu hramadzianki Biełarusi 13 maja razhladała sudovaja kalehija. Ina Kardaš udzielničała ŭ sudovym pasiadžeńni praź videasuviaź z Kijeŭskaha śledčaha izalatara.
Advakat i Ina Kardaš abhruntoŭvali nieabchodnaść admianić utrymańnie jaje pad vartaj tym, što vystaŭlenyja joj padazreńni hruntujucca «tolki na zdahadkach i nie padmacavanyja nijakimi dokazami».
Sudovaja kalehija adznačyła, što śledčy sudździa, jaki vynies pastanovu ab pradaŭžeńni ŭtrymańnia Kardaš pad vartaj da 14 červienia, abhruntavana pryjšoŭ da vysnovy ab isnavańni ryzyki, što padazravanaja moža schavacca ad śledstva, źniščyć abo prychavać istotnyja dla rasśledavańnia rečy i dakumienty, a taksama niezakonna ŭpłyvać na śviedkaŭ ci ekśpiertaŭ.
Pry hetym apielacyjny sud spasłaŭsia na praktyku Jeŭrapiejskaha suda pravoŭ čałavieka, pavodle jakoj najaŭnaść padstaŭ dla ŭtrymańnia asoby pad vartaj pavinna aceńvacca z ulikam kankretnych abstavin kryminalnaj spravy, a samo abmiežavańnie svabody na čas dasudovaha rasśledavańnia moža być apraŭdanym, pakolki hetaha patrabujuć intaresy hramadstva, i jany, niahledziačy na prezumpcyju nievinavataści, majuć pieravahu nad pryncypam pavahi da asabistaj svabody.
Sudovaja kalehija pry vyniasieńni rašeńnia hruntavałasia na šaści rašeńniach Jeŭrapiejskaha suda pa pravach čałavieka, vyniesienych u spravach zamiežnych i ŭkrainskich hramadzian suprać Bałharyi, Francyi, Ukrainy i Šviejcaryi.
U vyniku sudździ adchilili apielacyju Iny Kardaš i jaje advakata i pryznali zakonnym pradaŭžeńnie jaje aryštu da 14 červienia.
Ciapier čytajuć
Aryštavany ministr pryrodnych resursaŭ vybraŭ «stratehiju Bryło»12
Kamientary
[Zredahavana]