U minskich handlovych centrach i kaviarniach ciapier nie buduć uklučać suśvietnyja navahodnija chity. Zatoje dajuć zarabić praŭładnym artystam
Minskija arhanizacyi handlu i hramadskaha charčavańnia atrymali ad miascovych uładaŭ ukazańni nakont navahodnich upryhažeńniaŭ. Učora stała viadoma, jak rekamiendujuć azdablać navahodnija vitryny. Ale nakont fonavaj muzyki dla mahazinaŭ i kafe ŭ Minharvykankama taksama jość pažadańni. Vydańnie «Lusterka» vyvučyła repiertuar, jaki prapanujuć uklučać dla navahodniaha nastroju.
Nijakaha Last Christmas i rasijskaj «papsy»
Zhodna z dakumientam, jaki atrymała redakcyja, miełodyi treba ŭziać z płejlista, «sfarmavanaha Ministerstvam kultury». Da dakumienta prykładajecca spasyłka na Google-dysk, dzie možna spampavać bolš za 160 trekaŭ.
Pieśni padzielenyja pa čatyroch hrupach:
«Darosłyja savieckija». Naprykład, pieśnia «Trojka» ŭ vykanańni Łarysy Dolinaj i «Piać chvilin» Ludmiły Hurčanki;
«Narodnyja». Jość biełaruskija pieśni kštałtu «Hej, Kalada!» i «Dobry viečar». Jość i ruskija narodnyja — «Varažba» i «Zima»;
«Estrada darosłyja». Heta zbornik pop-piesień, tak ci inakš źviazanych z Novym hodam, zimoj ci śnieham. Vykanaŭcy — vyklučna pradstaŭniki biełaruskaj estrady, jakija nie adznačylisia krytyčnymi vykazvańniami na adras biełaruskich uładaŭ. U płejliście — «Vierasy», Žaniet, «Aŭra», Viktoryja Aleška, Piatro Jałfimaŭ, Iryna Darafiejeva, art-hurt «Biełarusy» i mnohija inšyja.
«Estrada dzieci». Dziciačyja kampazicyi kštałtu «Śniehovik — nos morkovkoj» i «Maleńkoj jełočkie chołodno zimoj». U niekatorych fajłach zachavalisia danyja pra sajty, ź jakich jany byli spampavanyja (naprykład, detskie-pesni.com).
Bolš u śpisie ničoha niama. U papku nie trapiła nivodnaj anhłamoŭnaj kampazicyi. Naprykład, tam niama papularnych Jingle Bells, Carol Of The Bells abo All I Want for Christmas Is You ad Meraja Kery albo Last Christmas dueta Wham!
Niama ŭ śpisie ni ŭkrainskich, ni rasijskich, ni polskich, ni inšych vykanaŭcaŭ.
Samy časty vykanaŭca
Cikava, što ŭ 25 sa 164 fajłaŭ (heta značyć, u 15%) u nazvach fihuruje słova «Chvilinka». Miarkujučy pa ŭsim, heta muzyka, jakuju vykonvajuć udzielniki «Majsterni estradnaha mastactva «Chvilinka».
Sami fajły ŭ papku na Google-dysk zahružaŭ hukarežysior ź Minska Jarasłaŭ Fambaraŭ (heta možna zrazumieć pa jaho niku i fota). Na jaho staroncy va «VKontaktie» paznačana, što jon pracuje ŭ teatry estrady. A voś jahonyja baćki ŭznačalvajuć studyju «Chvilinka». Tata, Jaŭhien Fambaraŭ — kiraŭnik, mama, Taćciana Panova — mastacki kiraŭnik.
Ciapier «Chvilinka» ciesna źviazanaja z uładami. Mienavita jana pravodziła kancerty na vybarčych učastkach u Minsku ŭ adziny dzień hałasavańnia 25 lutaha 2024 hoda (suma kantraktu na placoŭcy dziaržzakupak paznačanaja jak 264 575 rubloŭ). A ciapier, miarkujučy pa sacsietkach majsterni, jaje ŭdzielniki aktyŭna vystupajuć na mierapryjemstvach «Marafonu adzinstva».
Pavodle biełaruskich zakonaŭ, za vykarystańnie fonavaj muzyki ŭ kaviarniach i kramach treba płacić. Kab nie šukać usich pravaŭładalnikaŭ paasobku, arhanizacyi mohuć zaklučyć damovu z Nacyjanalnym centram intelektualnaj ułasnaści. Hety centr źbiraje ŭznaharodžańnie za vykarystańnie muzyki i pieradaje jaho aŭtaram i inšym pravaŭładalnikam. Ciažka skazać, nakolki ciapier heta masavaja praktyka.
Jak pakazała pravierka «Lusterka», pieśnia «Maleńkoj jełočkie chołodno zimoj» z sajta «Dietskije pieśni» nie ŭvachodzić u «pieralik tvoraŭ i inšych abjektaŭ, majomasnyja pravy ŭ dačynieńni da jakich znachodziacca ŭ kalektyŭnym kiravańni NCIU» — vierahodna, aŭtarskija vypłaty za jaje centr nie zapatrabuje. A voś pieśni studyi «Chvilinka» ŭ hetym rejestry jość, jak i pieśni Viktoryi Aleški, hurta «Aŭra» i inšych biełaruskich pop-vykanaŭcaŭ.
Minskija ŭłady pradpisvajuć upryhožvać navahodnija vitryny tolki «elemientami słavianskaha pachodžańnia»
U Dana Mall znoŭ zrabili vielmi pryhožuju navahodniuju instalacyju FOTY
Stała viadoma, kolki sioleta daviadziecca zapłacić za naturalnuju navahodniuju jalinku
U hramadskim transparcie ŭ Minsku možna budzie adpravić list Dziedu Marozu
Navahodnija kirmašy ŭ Minsku adkryjucca praz dva tydni
Stała viadoma, kali zapalać ahieńčyki na jełcy na Kastryčnickaj płoščy
U Minsku źjaviłasia kazačna pryhožaja navahodniaja łakacyja
Jołačny kirmaš u Minsku adkryjecca 16 śniežnia
Stała viadoma, jak sioleta buduć vyhladać navahodnija jełki ŭ Minsku FOTY
Kamientary