U Łukašenki znajšłasia pazašlubnaja dačka Kryścina? Voś što viadoma
Nitački viaduć da cyrulnicy Łukašenki, raskazvaje ŭ svaim rasśledavańni «Biuro».
Cyrulnica Łukašenki Śniažana Mocnaja pierajechała ŭ stalicu sa Škłova sa svajoj siamjoj.
Upieršyniu pra žančynu jak pra asabistuju cyrulnicu Łukašenki i «aŭtarku jahonaha znakamitaha začosu» raskazaŭ Aljans rasśledavalnikaŭ Biełarusi.
Śniažana Mocnaja i Łukašenka znajomyja jašče z dalokaha 1991 hoda. 24 krasavika 1991 hoda ŭ rajonnaj škłoŭskaj haziecie «Udarnyj front» vyjšaŭ materyjał «Mis piedahohiku zavuć Śniažana».
Na miascovym konkursie pryhažości Śniažana Mocnaja atrymała dva pryzy — za pieršaje miesca i pryz simpatyj hledačoŭ:
«…mahnitafon «Biełaruś», jaki taksama zavajavała mis Śniažana, ad sponsaraŭ, joj uručyŭ dyrektar saŭhasa «Haradziec», narodny deputat BSSR A.R. Łukašenka».
Ale, pavodle słoŭ krynic «Biuro», jakija pracavali z Łukašenkam, sapraŭdnaja ŭdača ŭśmichnułasia Śniažanie ŭ siaredzinie — kancy 90-ch: Alaksandr Ryhoravič apynuŭsia ŭ jaje cyrulnickim kreśle.
«U Administracyju prezidenta, to-bok na toj momant heta byŭ adras Karła Marksa, 38, jaje pryvozili na aŭtamabili [słužbovym]», — raskazvajuć ludzi, jakija pracavali ŭ toj čas na Łukašenku.
«Pryvozili da Łukašenki, kab jana [jaho] pryčesvała. Tamu što, dapuścim, uziać jaho vobraz tam 94-ha hoda, tam 96-ha, heta taki byŭ davoli kałhasnavaty typaž, nu voś jamu paraili ŭziać kahości, chto b sačyŭ za jaho vobrazam».
Pavodle źviestak, atrymanych dziakujučy «Kibierpartyzanam», Śniažana značyłasia studentkaj MDŁU ŭ 1994 hodzie. Sama Mocnaja ŭ siabie na sajcie piša, što skončyła ŭniviersitet u 1996-m. Ale zatym až da 2001 hoda choć jakaja infarmacyja pra pracoŭnuju dziejnaść dziaŭčyny adsutničaje.
Adnak z pašpartnaj bazy vynikaje, što ŭviesnu 1999 hoda niadaŭniaja studentka Mocnaja zaciažarała, a zatym zajmieła kvateru ŭ cahlanaj novabudoŭli palepšanaj płaniroŭki na staličnaj vulicy Mahiloŭskaja.
U lutym 2000 hoda ŭ Śniažany naradziłasia dačka Kryścina. Ni na toj momant, ni paśla Śniažana Mocnaja zamužam aficyjna nie była. Jana i pa siońnia nosić svajo dziavočaje proźvišča. U hrafie «baćka» maci Kryściny paznačyła Mocnaha Alaksandra Ryhoraviča, ale, pavodle danych «Kibierpartyzan», takoha čałavieka ŭ Biełarusi prosta nie isnuje.
Možna dapuścić, što Śniažana zapisała dačku na svajo proźvišča, a voś chto taki Alaksandr Ryhoravič, vyśvietlić nie ŭdałosia.
Padobnyja mietamarfozy z «nieisnujučym» baćkam raniej užo byli zafiksavanyja rasśledavalnikami ŭ siamji Viktara Šejmana. U 2018 hodzie ŭčarašniaja studentka Akademii mastactvaŭ i pa sumiaščalnictvie kachanka Šejmana Hanna Puškarova naradziła chłopčyka, jakoha zapisała ŭ paśviedčańni ab naradžeńni jak Puškaroŭ Michaił Viktaravič. U hrafie «baćka» jana paznačyła niejkaha Puškarova Viktara Uładzimiraviča.
Čałaviek, jaki pracavaŭ na Łukašenku ŭ kancy 90-ch, raskazaŭ, što Śniažana Mocnaja naradziła dačku ad svajho vysokapastaŭlenaha ziemlaka. Toje, što ŭ Łukašenki ŭ 2000-m naradziłasia dačka, paćvierdziła i inšaja krynica, jakaja była vielmi blizkaja z Łukašenkam u kancy 90-ch.
Taksama žurnalisty źviarnulisia da niekalkich supracoŭnikaŭ śpiecsłužbaŭ i pravaachoŭnikaŭ, jakich vučać «sčytvać tvary», i paprasili ich praanalizavać fatahrafii Kryściny Alaksandraŭny Mocnaj i Alaksandra Łukašenki:
«Jość prykmiety, jakija śviedčać pra toje, što jana vielmi padobnaja da łukašenkaŭskaj parody. Pa-pieršaje — łob, brovy, adlehłaść pamiž vačyma i adlehłaść pamiž vačnicami — jany dastatkova na vialikaj adlehłaści adna ad adnoj. To-bok heta voś takoje siamiejnaje [padabienstva] — u samoha Łukašenki tak. I ŭ tym liku ŭ jaje. U jaje jašče vialiki rot, i kali ŭziać fatahrafiju Łukašenki biez vusoŭ, to mienavita voś hety frahmient — jany taksama davoli padobnyja».
Žurnalisty patelefanavali Śniažanie Mocnaj. Jana adkazała, što «heta ŭsio łuchta», i kinuła słuchaŭku.
Z naradžeńniem dački Śniažana Mocnaja stała chutka prasoŭvacca pa karjernaj leśvicy.
Kali małoj było 1,5 hoda, zhodna sa źviestkami z bazy FSAN, maładaja mama trapiła na pracu ŭ Ministerstva zamiežnych spraŭ, dzie dasłužyłasia da pieršaha sakratara hałoŭnaha ŭpraŭleńnia Jeŭropy.
U 2002 hodzie z Škłova ŭ Minsk pryjazdžaje maci Mocnaj Lidzija i ŭ 2003-m zajmaje pasadu viadučaj śpiecyjalistki ŭ Kamitecie dziaržaŭnaha kantrolu, a sama Śniažana idzie ŭ biznes i spačatku pracuje ŭ firmie «Biełrosnafta», a zatym robicca viadučaj śpiecyjalistkaj kampanii «BiełPoŭdzieńnaftapradukt». Praz paru hadoŭ u hetuju ž kampaniju z Kaaphandlu Škłoŭskaha rajspažyŭtavarystva padciahnułasia i rodnaja małodšaja siastra Śniažany — Łarysa. Žančyny buduć pracavać razam da 2009 hoda, a zatym Łarysa pojdzie ŭ «Biełaruśhandal» Upraŭleńnia spraŭ Łukašenki.
A voś Śniažana niekatory čas prapracuje ŭ Pałacy Respubliki i Fiederacyi chakieja Biełarusi, a zatym kančatkova zamacuje svaje pazicyi ŭ biznesie i stanie pracavać vyklučna ŭ kampanijach «kašalkoŭ» Łukašenki — «Trajple», «Sochry», «Haz Vienčure», «BSZT — Novyja technałohii».
Jak raskazvaŭ Aljans rasśledavalnikaŭ Biełarusi, u 2016 hodzie «Junis-Ojł» upłyvovaha biełaruskaha biznesoŭca Anatola Tarnaŭskaha, jaki ŭ toj čas ličyŭsia «kašalkom» Łukašenki, pieradaść Śniažanie Mocnaj biaspłatna kvateru płoščaj 134 kvadratnyja mietry i koštam 250 tysiač dalaraŭ.
U 2016 hodzie Śniažana vyrašyć padacca ŭ imidžmejkiery, paralelna kirujučy biznesami.
«U minułym ja dypłamat, chakiejny funkcyjanier i kiraŭnik u biznesie. Siońnia ž ja — dypłamavany śpiecyjalist u halinie imidžu i stylu — stylist-imidžmejkier», — kaža Śniažana ŭ svaim błohu.
Pavodle źviestak «Kibierpartyzan», u 2023 hodzie Mocnaja zajmała pasadu pamočnicy kiraŭnika ŭ kampanii Alaksieja Aleksina, Mikałaja Varabja i Alaksandra Zajcava «Bremina hrup» i pa sumiaščalnictvie pracavała ŭ kampanii «Eliksir Maładości Plus».
Sama Śniažana Mocnaja svoj karjerny šlach apisvaje takimi słovami:
«Da prafiesii stylista ja pryjšła nie vypadkova. Usia maja karjera była źviazanaja ź jarkimi asobami i ŭpłyvovymi ludźmi, palityčnymi «ciažkavahavikami» i paśpiachovymi biznesoŭcami».
Kamientary