«Arešnik» dla Biełarusi. Kudy Łukašenka ŭciahvaje krainu

Uładzimir Pucin druhi raz za hod pryjechaŭ u Biełaruś. Byvali hady, kali Pucin naviedvaŭ Minsk i čaściej, ale heta byli pajezdki na roznyja samity (SND, ADKB, JEAES). A voś sioleta prezident Rasii dvojčy naviedaŭ Biełaruś śpiecyjalna ź vizitami, nie pryviazvajučy ich da samitaŭ niejkich intehracyjnych abjadnańniaŭ. I abodva razy mieli admysłovyja nahody.

Pieršy vizit Pucina ŭ Biełaruś sioleta ŭ traŭni nasiŭ demanstracyjny charaktar. Reč u tym, što ŭ traŭni 2024 hoda jon čarhovy raz byŭ pieraabrany prezidentam RF. Pavodle mižnarodnaj tradycyi, novaabrany kiraŭnik dziaržavy ładzić pieršy vizit u krainu, jakaja najbolš važnaja z punktu hledžańnia nacyjanalnych intaresaŭ. Heta demanstracyja pryjarytetu ŭ źniešniaj palitycy. Apošnija čverć stahodździa prezidenty Rasii adrazu paśla abrańnia pieršy vizit, jak praviła, ładzili ŭ Minsk. Bolš za toje, navat rasijskija premjer-ministry paśla pryznačeńnia spačatku naviedvali biełaruskuju stalicu.

Hetym razam paśla inaŭhuracyi Pucin pajechaŭ najpierš u Kitaj. Vidavočna, u Kramli zychodzili z łohiki, što Biełaruś nikudy nie dzieniecca: Łukašenka kryŭdavać nie budzie, jamu niama kudy ŭciakać z padvodnaj łodki. A ad pazicyi Kitaja dla Maskvy ciapier šmat što zaležyć.

A voś druhi vizit Pucinu treba było ładzić u Minsk, inšych varyjantaŭ tut nie było. Inakš jaho nie zrazumieli b nie tolki ŭ Biełarusi, ale i ŭ samoj Rasii, u blizkim zamiežžy.

Dla śniežańskaha vizitu była inšaja nahoda. Heta pasiadžeńnie Vyšejšaha dziaržsavieta Sajuznaj dziaržavy. Mienavita tamu Pucin pryjechaŭ siudy nie adzin. U Minsk prylacieła ŭsio vyšejšaje kiraŭnictva Rasii, uklučna z premjeram Michaiłam Mišuścinym i staršynioj vierchniaj pałaty parłamienta Valancinaj Maćvijenka. (Staršynia Dziarždumy Viačasłaŭ Vałodzin zachvareŭ.) Bo jany ŭvachodziać u skład hetaha samaha Vyšejšaha dziaržsavieta.

Pavodle rehłamientu, Vyšejšyja dziaržsaviety pavinny pravodzicca raz na hod, kab zaćvierdzić biudžet hetaha intehracyjnaha sajuza, vyrašyć inšyja pracedurnyja pytańni. Zvyčajna jany pravodziacca ŭ Rasii.

Ale sioleta pasiadžeńnie dziaržsavieta asablivaje: jano prymierkavana da jubileju. 25 hadoŭ tamu była stvorana Sajuznaja dziaržava. I tamu ŭračystaje pasiadžeńnie vyrašyli pravieści ŭ Minsku.

U cełym hetyja vizity nosiać palityka-simvaličny charaktar, vyhladajuć jak demanstracyja dobrazyčlivaści Pucina da svajho adzinaha sajuźnika. Bo sajuźnik padčas vajny kaštuje doraha i ŭ palityčnym, i ŭ finansavym sensie. U vyniku abodva baki atrymali pijarnyja dyvidendy.

Vykažu, mahčyma, krychu paradaksalnuju dumku. Na fonie razmoŭ, tryvožnych prahnozaŭ nakont mahčymaha anšlusu Biełarusi Rasijaj sam fakt taho, što prezident RF dvojčy na hod pryjazdžaje ŭ Biełaruś, abjektyŭna ŭmacoŭvaje farmalny biełaruski suvierenitet.

Bo rasijskija aficyjnyja asoby i dziaržaŭnyja miedyja padkreślivajuć, što heta zamiežnyja vizity. Biełaruś — nie hubiernia RF. Naprykład, kudy-niebudź u Varoniežskuju ci Ćviarskuju vobłaść Pucin nie jeździć z aficyjnymi ci pracoŭnymi vizitami. I Abchaziju ci Paŭdniovuju Asieciju nie naviedvaje. A ŭ Biełaruś pryjazdžaje.

I heta padšturchoŭvaje da vysnovy, što niejkich płanaŭ chutkaha dałučeńnia krainy da RF u Kramla pakul niama. Ale što tyčycca realnaha suvierenitetu, tut situacyja inšaja.

Hałoŭny vynik vizitu vysokaj rasijskaj delehacyi ŭ Minsk — heta rašeńni ŭ śfiery biaśpieki, padpisańnie Kancepcyi biaśpieki Sajuznaj dziaržavy i miždziaržaŭnaj Damovy ab harantyjach biaśpieki pamiž Biełaruśsiu i Rasijaj. Źmiest apošniaha dakumienta nieviadomy. Ale, miarkujučy pa ŭsim, havorka idzie pra źmienu rasijskaj jadziernaj daktryny, pavodle jakoj Rasija moža prymianić jadziernuju zbroju ŭ vypadku napadu na Biełaruś.

Samaje važnaje rašeńnie — heta raźmiaščeńnie ŭ Biełarusi najnoŭšaj rasijskaj sistemy «Arešnik» u druhoj pałovie 2025 hoda na prośbu Łukašenki. U vyniku ciapier na biełaruskaj terytoryi, akramia jadziernaj zbroi, buduć jašče i novyja rakiety — pavodle acenak ekśpiertaŭ, jany siaredniaj dalokaści.

Meta Pucina zrazumiełaja. Jon imkniecca ŭzmacnić stratehičnyja pazicyi RF napiaredadni mierkavanych pieramoŭ ab miry va Ukrainie, kab dziejničać z pazicyi siły. Pucin pavyšaje staŭki.

I adnačasova Rasija poŭnaściu ŭciahvaje Biełaruś u svaju vajennuju palityku, hieapalityčny kanflikt z Zachadam.

Mienš zrazumiełaja łohika Łukašenki.

Biełaruś apynajecca na piaredniaj linii frontu ŭ hieapalityčnym supraćstajańni z Zachadam. Mahčyma, jon dumaje, što heta ŭzmacniaje palityčnuju vahu krainy. Ale nasamreč jon hetym zamacoŭvaje ŭjaŭleńni ŭ śviecie pra svoj status jak rasijskaha vasała. I mocna paharšaje lubyja mahčymaści razmarožvańnia adnosin z ZŠA i ES. U peŭnym sensie spalvaje masty na Zachad. Zrešty, mahčyma, što jon ciapier užo ŭ takim stanie, što i nie zdolny piarečyć Pucinu.

• 0
• 0
• 3
• 0
• 1
• 0
• 7
• 0